2 तिमुथियुस 1 - बिलासपुरी नौआं नियम

नमस्कार

¹ हऊँ पौलुस, परमेशरा री इच्छा ते यीशु मसीह रा प्रेरित आ ताकि हऊँ ये सन्देश प्रचार करी सक्कूँ भई परमेशरे अनन्त जीवन देणे रा वायदा कित्तिरा सै जे मसीह यीशुये चा।

² तिमुथियुस हऊँ ये चिट्ठी तिज्जो लिखिराँ कने तू मेरे खातर इक प्यारे पुत्रा साई आ। हऊँ प्राथना कराँ भई पिता परमेशर, कने मसीह यीशु अहांरे प्रभु तिज्जो अनुग्रह, दया कने शान्ति देओ।

बफादार हुणे खातर प्रोत्साहन

³ हऊँ तिस परमेशरा रा धन्यवाद कराँ, तिसरी सेवा जे हऊँ कराँ, तियां जे मेरे पूर्वजें शुद्ध अन्तरात्मा ने कित्तिरी। ताहली जे कदीं हऊँ प्राथना कराँ हऊँ हमेशा तिज्जो अपणियां प्राथनां च लगातार याद कराँ।

⁴ हऊँ याद कराँ भई तैं कियां आँसू बहाये थे, ताहली जे हऊँ तेरते लग हुया था, इस खातर तिज्जो देखणे री हऊँ बौहत इच्छा कराँ ताकि हऊँ खुशिया ने भरी जाऊँ।

⁵ हऊँ मसीह यीशुये च तेरे सच्चे विश्वासा जो बी याद कराँ सै जे पैहले तेरी नानी लोईसा कने तेरी माता यूनीके च था। मिन्जो ये निश्चा भई सैई विश्वास तेरे च बी आ।

⁶ इसा वजह ने हऊँ तिज्जो याद दिलाईराँ भई वरदान्ना जो भीं ते जल़ा सै जे परमेशरे तिज्जो दित्या ताहली जे मैं तेरे ऊपर अपणा हात्थ रखया था।

⁷ काँह्भई परमेशरे अहांजो सै जे आत्मा दित्तिरा, सै अहांजो कायर नीं बणांदा पर अहांजो प्यार, संयम कने सामर्था ने भराँ।

⁸ इस खातर अहांरे प्रभुये रे बारे च दुज्यां लोकां जो दसणे च शर्मिन्दा नीं हुयां कने नांई इसा गल्ला खातर शर्मिन्दा हुयां भई हऊँ तिसरे खातर कैदी आ, बल्कि परमेशर तिज्जो सै जे सामर्थ देआं तिसरा इस्तेमाल करदे हुये खुशखबरिया खातर मेरे सौगी दुख सै।

⁹ तिने इ अहांरा छुटकारा कित्तिरा कने पवित्र जीवना खातर अहांजो सद्दीरा, ये अहांरे भले कम्मां रिया वजह ने नीं, पर तिसरी अपणी योजना कने अनुग्रह रिया वजह नेआ। ये अनुग्रह परमेशरे यीशु मसीह च अहांजो सृष्टिया ते पैहले दित्या,

¹⁰ पर हुण अहांरा छुटकारा करने औल़े, यीशु मसीह रे प्रगट हुणे रे जरिये अनुग्रह अहां पर प्रगट हुईरा, तिने जे मौती रिया शक्तिया रा नाश करित्या, कने तिने जीवन कने अमरता जो खुशखबरिया रे जरिये प्रगट कित्तिरा।

¹¹ इसा खुशखबरिया जो फैलाणे खातर मिन्जो इक प्रचारक, प्रेरित कने सखाणे औल़े रे तौरा पर परमेशरे नियुक्त कित्तिरा।

¹² कने इसा वजह ने हऊँ इन्हां गल्लां रा दुख सैया राँ, फेरी बी हऊँ शर्मान्दा निआं, काँह्भई तिस पर जे मैं विश्वास कित्तिरा, हऊँ तिस्सो जाणाँ कने मिन्जो ये निश्चा भई तिने मिन्जो जो किछ दित्तिरा, सै तिसरिया रक्षा करने च तिस दिना तक समर्थी आ।

¹³ तिसा सही शिक्षा जो सै जे तैं माहते सुणिरी तिसजो आदर्श बणाईने रख, कने ये विश्वास कने प्यारा ने कर काँह्भई तू मसीह यीशुये चा।

¹⁴ पवित्र आत्मा रिया सामर्था रे जरिये सै जे अहां च वास कराँ तिसा सच्चाईया री रखवाल़ी कर सै जे तिज्जो सौपी गईरी।

¹⁵ तू जाणाँ भई आसिया प्रदेशा च रैहणे औल़े कई विश्वासी मिन्जो छड्डी चुक्कीरे, फुगिलुस कने हिरमुगिनेस बी मिन्जो छड्डी चुक्कीरे।

¹⁶ उनेसिफुरुस रे परिवारा पर प्रभु दया करो, काँह्भई तिने बौहत बार मिन्जो सुख दित्तिरा, कने सै मेरे जेल्ला च रैहणे ते शर्माया निआं।

¹⁷ पर ताहली जे सै रोमा नगरा च आया था, तां तदुआं तकौ जे सै मेरने नीं मिली गया, तदुआं तक मिन्जो टोलदा रैया।

¹⁸ प्रभु न्याय रे दिन तिस पर अपणी दया करो, तू ठीक-ढंगा ने जाणाँ भई तिने इफिसुस नगरा च मेरी लग-लग तरिके ने सेवा कित्तिरी।