2 थिस्सलुनीकियां 1 - बिलासपुरी नौआं नियम

नमस्कार

¹ हऊँ पौलुस, ये चिट्ठी सिलवानुस कने तिमुथियुस रिया मददा ने थिस्सलुनीकी नगरा रे विश्वासियां जो लिखिराँ, सै जे अहांरे पिता परमेशर कने प्रभु यीशु मसीह रे।

² अहांरे पिता परमेशर कने प्रभु यीशु मसीह तुहांजो अनुग्रह कने शान्ति देओ।

न्याय रा दिन

³ अहांरे साथी विश्वासियो, तुहांरे खातर अहांजो लगातार परमेशरा रा धन्यवाद करना चाहिन्दा, कने ये ठीक बी आ, काँह्भई मसीह च तुहांरा विश्वास बौहत बधदा जाया राँ, कने तुहांरा प्यार इक्की दूये रे प्रति बधदा जाया राँ।

⁴ इस खातर अहें खुद परमेशरा रिया कलीसियां रे विश्वासियां रे बिच तुहांरे बारे च घमण्ड कराँ ये, हलाँकि तुहें सताव कने दुखां रा अनुभव कराँ ये, फेरी बी तुहें लगातार धीरजा ने सैंये कने हुण तुहें यीशु मसीह पर बी विश्वास कराँ ये।

⁵ ये सब ये साबित कराँ भई परमेशरा रा न्याय सही आ कने इसरा नतीजा ये हूणा भई तुहें परमेशरा रे राज्जा रे लायक हुणे, तिस खातर जे तुहें दुख बी सैया राँये।

⁶ काँह्भई परमेशर सदा धार्मिकता ने न्याय करां, तिस तिन्हां लोकां पर दुख ल्यौणा तिन्हेंजे तुहांजो दुख दित्तिरा।

⁷ कने तुहें सै जे पीड़ा सैयां राँये कने अहांजो बी तिस चैन देणा। ये तिस वगत हूणा ताहली जे प्रभु यीशुये अपणे सामर्थी दूतां सौगी, भड़की रिया अग्गी च स्वर्गा ते प्रगट हूणा,

⁸ कने सै जे परमेशरा जो नीं पछयाणदे कने अहांरे प्रभु यीशुये रे खुशखबरिया जो ग्रहण नीं करदे तिन्हाजो तिस सजा देणी।

⁹ सै प्रभुये रिया मौजूदगिया ते हमेशा खातर लग हुई जाणे कने तिसरिया तेजोमय सामर्था च भागी नीं हुणे, कने तिस तिन्हांजो अनन्त विनाशा री सजा देणी।

¹⁰ ये तिस दिन हूणा, ताहली जे प्रभुये अपणे पवित्र लोकां ते महिमा पाणे कने सब विश्वास करने औल़यां ते आदर पाणे खातर फेरी भीं औंणा; कने तुहां बी तिन्हांरे बिच हूणा काँह्भई तुहें अहांरे सन्देशा पर विश्वास कित्या।

¹¹ इस खातर अहें सदा तुहां खातर प्राथना कराँ ये भई अहांरा परमेशरा तुहांजो अपणिया बुलाहटा रे लायक बणाई दो, कने सै तुहांरे भले काम्म करने री हरेक इच्छा कने तुहांरे विश्वासा रे जरिये कित्तिरे हरेक कम्मां जो अपणिया सामर्था सौगी पूरा करो,

¹² अहें ये प्राथना कराँ ये ताकि अहांरे परमेशरा कने प्रभु यीशु मसीह रे अनुग्रह रे मुतावक अहांरे प्रभु यीशुये रा नौं तुहां च महिमा पाओ, कने तुहां आदर पाणा काँह्भई तुहें तिसरे इ हाये।