2 कुरिन्थियों 10 - बिलासपुरी नौआं नियम

पौलुसा रा अधिकार

¹ हऊँ पौलुस मसीह री नम्रता कने कोमलता च तुहांजो विनती करी रां, हलाँकि मैं महसूस कित्या भई तुहें सोच्चां ये हऊँ तुहांरे सामणे डरपोक आ कने ताहली जे तुहांते दूर आ हऊँ निडर आ।

² किछ लोक ये बोलां ये भई अहें संसारा रे लोकां साई व्यवहार कराँ ये। इस खातर ताहली जे हऊँ तित्थी आऊँ, तां हऊँ उम्मीद कराँ भई हऊँ तिन्हांरे प्रति बीरता दस्सूं। हऊँ तुहांजो ये विनती कराँ भई ताहली जे हऊँ आऊँ, तां तुहांरे प्रति तेढ़ा व्यवहार नीं करने पौ।

³ हलाँकि अहें बी त इसी संसारा च रैं, पर अहें अपणे दुश्मणा ने संसारा रे लोकां साई नीं लड़दे।

⁴ काँह्भई तिन्हां हत्थियाराँ ने जे अहें लड़ाई लड़ां ये, सै संसारिक नींये, बल्कि तिन्हां च गढ़ां जो तहस-नहस करने रे खातर परमेशरा री शक्ति शामिल इ।

⁵ कने इस खातर अहें लोकां रियां गल्लां रा कने तिस हरेक बिरोधा रा, सै जे परमेशरा रे ज्ञाना रे बिरोधा च खढ़िरा खण्डन कराँ ये; कने हर इक भावना जो कैद करीने मसीह रा आज्ञाकारी बणाई दें।

⁶ ताहली जे तुहें पूरी तरह मसीह रे आज्ञाकारी हुई जांगे, तां हर तरह रा हुक्म नीं मनणे औल़े जो अहां सजा देणी।

पौलुस रे अधिकार

⁷ तुहें सिर्फ सै जे सामणे आ तिसरे इ बाहरले रुपा जो देखां ये। जे किसी रा अपणे बारे च ये भरोसा भई सै मसीह रा, तां सै ये बी जाणी लो, भई तियां जे सै मसीह रा तियां इ अहें बी मसीह रे।

⁸ कने जे हऊँ अपणे तिस अधिकारा रे बारे च किछ होर घमण्ड करूँ, सै जे प्रभुये तुहांरे विश्वासा जो बिगाड़ने रे खातर नीं बल्कि तुहांजो विश्वासा च मजबूत करने खातर अहांजो दित्तिरा, तां इसरे खातर हऊँ शर्मिन्दा निआं।

⁹ हऊँ तुहांजो अपणी चिट्ठियां ने डराणे री कोशिश नीं करी रां।

¹⁰ काँह्भई किछ लोक बोलां ये, “पौलुस रियां चिट्ठियां त गम्भीर कने प्रभावशाली आ; पर सै दिखणे च कमजोर आ कने तिसरी गल्ल बेकार इ।”

¹¹ येढ़यां लोकां जो समझी लेणा चाहिन्दा भई ताहली जे अहें दूर रैं कने अहें अपणी चिट्ठियां च सै जे लिखां ये तिसरे बिच कोई फर्क नीं हुन्दा, ताहली जे अहें तुहां सौगी हुआं ये तां अहें क्या करगे तिसच बी कोई फर्क नींआ।

पौलुस रे अधिकाराँ री सीमा

¹² अहें तिन्हां किछ लोकां सौगी अपणी तुलना करने री हिम्मत नीं करदे, सै जे खुद अप्पूँजो बड़ा खास समझां ये; कने अप्पूँजो मापदण्ड समझीने अप्पूँ चियें परखां ये, कने इक दुज्जे ने अपणी तुलना कराँ ये, सै मूर्ख ये।

¹³ अहां किसी गल्ला रे खातर घमण्ड नीं करना तिसरे बारे च जे अहांजो घमण्ड करने रा अधिकार नींआ, पर अहां सिर्फ तिस कम्मा रे बारे च घमण्ड करना तिस्सो करने खातर जे परमेशरे अहांजो भेज्जिरा, कने तुहें तिस कम्मा रा हिस्सा ये।

¹⁴ अहांजो जितना घमण्ड करना चाहिन्दा अहें उसते जादा नीं करदे, तियां जे भई अहें खुशखबरिया जो तुहांले लेईने नीं आईरे पर आखिर च अहें इ तुहांले मसीह री खुशखबरी लेईने आये थे।

¹⁵ अहें सै काम्म जे दुज्यां कित्तिरा तिसरे बारे च घमण्ड नीं करदे, तियां जे भई अहें खुद सै काम्म कित्तिरे। पर अहांरी आशा येई भई तियां-तियां जे तुहांरा विश्वास बधदा जाणा, तियां इ तुहांरे बिच अहांरे अपणे कम्मां री सीमा बौहत बधणी,

¹⁶ ताकि अहें तुहांरिया सीमां ते परे दूर-दूर इलाकयां च बी खुशखबरिया रा प्रचार करी सक्को। काँह्भई अहें नीं चाहन्दे भई अहें दुज्जेयां लोकां रे जरिये दुज्जे इलाके च पैहले कित्तिरे कम्मां पर घमण्ड करो।

¹⁷ तियां जे पवित्रशास्त्र बोलां, जे तुहें घमण्ड करना चाँये तां सिर्फ प्रभुये रे बारे च घमण्ड करा।

¹⁸ काँह्भई सै जे अपणी बडयाई कराँ, सै नीं पर तिसरी बडयाई जे प्रभु कराँ, सैई परमेशरा रे जरिये ग्रहण कित्या जां।