1 तिमुथियुस 3 - बिलासपुरी नौआं नियमकलीसिया रा अगुवा हुणे खातर कावलियत 1 ये गल्ल सच्च इ भई सै जे अगुवा हूणा चां, सै भले कम्मां री इच्छा कराँ। 2 इस खातर ये जरूरी आ भई अगुवा निर्दोष कने इक्की पत्निया रा पति, हरेक हालता च अपणे बर्ताव कने भावनां जो काबू करने औल़ा, ईज्जतदार, आदर-खातर करने औल़ा, कने परमेशरा रे वचना जो ठीक ढंगा ने सखाणे रे काविल हो। 3 सै पियक्कड़ कने मार-पीट करने औल़ा नीं हो पर दयालु हो, कने नां झगड़ने औल़ा, कने नां पैसे रा लालची हो। 4 तिस्सो अपणे घरा जो सही ढंगा ने चलाणा चाहिन्दा कने अपणे बाल-बच्चयां जो सारियां गल्लां च आदरा सौगी तिस्सो मनणे खातर सखाणा चाहिन्दा। 5 जे कोई अपणे घरा जोई ठीक ढंगा ने चलाणा नीं जाणदा, तां परमेशरा री कलीसिया री रखवाली कियां करगा? 6 फेरी येआ भई सै अगवा नया विश्वासी नीं हूणा चाहिन्दा, काँह्भई सै घमण्ड करी सक्कां कने शैतान्ना साई सजा पांगा। 7 कने कलीसिया रे बाहरा रे लोकां च बी तिसरी ईज्जत हो, ताकि सै बदनाम हुईने शैतान्ना रे फन्दे च फसी जाओ। कलीसिया रे सेवकां खातर कावलियत 8 तियां इ सेवक बी ईज्जतदार कने ईमानदार हुणे चाहिन्दे, कने सै पियक्कड़ कने नीच कमाईया रे लालची नीं हो; 9 पर तिन्हांरी साफ अन्तरात्मा हूणी चाहिन्दी, तियां जे सै लगातार तिस सच्चे सन्देशा पर विश्वास कराँ ये तिस्सो जे परमेशरे परगट कित्या। 10 ताहली जे सेवकां जो चुणया जां, तां सै पैहले परखे जाओ, कने जे निर्दोष निकल़ो तां सेवका रा काम्म करो। 11 तियां इ सेवकां रियां पत्नियां जो बी ईज्जतदार हूणा चाहिन्दा; सै दोष लाणे औल़ियां नीं हो पर हरेक हालता च अपणे बर्तावा जो काबू करने औल़ी कने सारियां गल्लां च विश्वासा लायक हो। 12 सेवक इक्की पत्निया रा पति हो, कने बाल-बच्चयां कने अपणे घरा जो ठीक ढंगा ने चलाणे औल़ा हो; 13 काँह्भई सै जे सेवका रा काम्म ठीक ढंगा ने कराँ ये, सै लोकां ते ईज्जत पांये इसरा नतीजा येआ भई सै यीशु मसीह च अपणे विश्वासा रे बारे च लोकां जो दिलेरिया ने दस्सी सक्कां ये। महान भेत 14 हलाँकि हऊँ आशा कराँ भई मांह जल्दी तेरले औणा, पर ये गल्लां तिज्जो इस खातर लिखया राँ, 15 भई जे मेरे औणे च देरी हुईजो, तां तू जाणी लेंगा भई परमेशरा रे परिवारा च लोकां रा वर्ताव केढ़ा हूणा चाहिन्दा सै जे जिऊंदा परमेशरा री कलीसिया, खम्भा कने सच्चाईया री निऊँ इ। 16 इसच शक निआं भई अहांरे विश्वासा च महान भेत आ : मसीह सै जे माहणु बणीने आया, पवित्र आत्मे दिखाया भई सै सच्चमुच परमेशरा रा पुत्र था, स्वर्गदूतें तिसजो देख्या, सारी जातियां रे लोकां च तिसरे बारे रा प्रचार हुया, संसारा रे लोकें तिस पर विश्वास कित्या, कने परमेशर तिस्सो स्वर्गा च लेईग्या। |
This work is licensed under Creative Commons Attribution-ShareAlike 4.0 License.