1 तिमुथियुस 2 - बिलासपुरी नौआं नियमसारयां रे खातर प्राथना 1 हुण हऊँ सब्बीं ते पैहले तेरने ये अर्ज कराँ भई तू सब्बीं माहणुआं रे खातर निवेदन, प्राथना, विनती कने धन्यवाद कर। 2 राजयां कने सब्बीं अधिकारियां रे खातर प्राथना कर ताकि अहें आराम कने चैना सौगी परमेशरा रे प्रति सारी भगतिया कने ठीक बर्तावा ने जिन्दगी जी सक्को। 3 इस तरिके री प्राथना अहांरे छुटकारा करने औल़े परमेशरा जो खरी लगां इ कने खुश बी कराँ इ, 4 सै जे ये चांह भई सब्बीं माहणुआं रा छुटकारा हो, कने सै सच्चाईया जो ठीक-ढंगा ने पछयाणी लो। 5 काँह्भई परमेशर इक इ हाया, कने परमेशर कने माहणुआं रे बिच इक इ बिचौल़िया यनि यीशु मसीह सै जे माहणु बणीने इस संसारा च आया। 6 तिने जे अपणिया जिन्दगिया जो सब्बीं माहणुआं रे छुटकारे रे खातर कीमता रे रुपा च बल़ि करित्या, कने तिसरिया मौती रे जरिये परमेशरे सही वगता पर ये सबूत दित्या भई सै चांह भई सारे लोक छुटकारा पाओ। 7 हऊँ सच्च बोलां, झूट्ठ नीं बोलदा, भई हऊँ इसा इ वजह ने प्रचारक, प्रेरित कने अन्यजातियां खातर विश्वास कने सच्चाईया रा उपदेशक चुणया गईरा। 8 हऊँ चांह भई हर जगह मर्द, बिणा गुस्से कने बिणा बैहसा ते कने सै जे पवित्र जीवन जीयें सै अपणे हत्थां जो चक्कीने प्राथना करया करो। 9 तियां इ हऊँ बी चांह भई जनानां बी ठीक ढंगा रे बधिया कपड़े पैहनीने अप्पूँजो स्वारो; नां की किसी रा ध्यान खिंजणे रे खातर बाल बनाणा कने सोने कने मोतियां कने मैहंगे कपड़यां ते, 10 पर भलयां कम्मां ते, काँह्भई परमेशरा री भगती करने औलियां औरतां जो येई शोभा देआं। 11 ताहली जे मर्द तिन्हांजो सखांये, तां सारियां औरतां जो मर्दां रे पूरे अधिकारा जो जाणदे हुये चुपचाप सुणीने सिखणा चाहिन्दा। 12 हऊँ अनुमति नीं देन्दा भई औरतां मर्दां जो शिक्षा देओ कने नां मर्दा पर राज करो, पर सभां च चुप-चाप रौ। 13 काँह्भई परमेशरे पैहले आदम जो बणाया कने बाद बिच हव्वा जो; 14 कने आदम शैतान्ना रे जरिये बहकाया नीं गया, पर औरते बैहकावे च आईने परमेशरा रे हुक्मा जो तोड़या। 15 पर औरतां जन्म देंदे वगत खतरे ते बचाई लेई जाईयां, जे सै सब्र रखीने विश्वास, प्यार, कने पवित्रता च मजबूत रौ। |
This work is licensed under Creative Commons Attribution-ShareAlike 4.0 License.