1 थिस्सलुनीकियां 5 - बिलासपुरी नौआं नियमभीं ते औणे रे खातर त्यार रैहणा 1 साथी विश्वासियो, इसरी जरूरत नीं भई प्रभु यीशु मसीह रे वापस औणे रे वगता कने तारीका रे बारे च तुहांजो किछ लिखुं। 2 काँह्भई तुहें खुद जाणाँ ये भई तियां जे राति जो चोर औआं, तियां इ प्रभु यीशुये रे वापस औणे रा दिन औणे औल़ा। 3 तंजे लोक बोलदे हुणे, “सारे कुशल मंगल ये, कने किछ डर निआं, तां तिस वगत अचानक परमेशरा तिन्हांजो दर्दनाक सजा देणे खातर औणा! तियां जे भारहत्थिया जनाना जो पीड़ पौंई कने तदुआं तक जे सै बच्चा नीं जणी लैन्दी, तदुआं तक पीड़ नीं रुकदी; तियां इ विनाश औणा कने लोकां किसी रीति नीं बचणा। 4 पर साथी विश्वासियो, तुहें त अन्धकारा रिया बुराईया च नींये भई सै दिन तुहां पर चोरा साई आई पौ। 5 काँह्भई तुहें सारे ज्योति कने दिना री सन्तान ये; अहें नांत राति रे, नां अन्धेरे रे। 6 इस खातर अहें होरसीं साई सुत्तीरे नीं रौ, पर जागदे कने सावधान रौ। 7 काँह्भई सै जे सौआयें सै राति जोई सौआयें, कने सै जे मतवाले हुआं ये सै राति जोई मतवाले हुआं ये। 8 पर अहें सै जे दिनां रे, विश्वास कने प्यारा जो रक्षा कवचा साई पैहना तियां जे इक फौजी अपणी रक्षा करने खातर पैहनां, कने अहांरी आशा अहौं टोपा साई बचाओ। 9 काँह्भई परमेशरे अहौं अपणे गुस्से ते सजा देणे रे खातर अहाजों नीं चुणीरा, पर इस खातर चणीरा भई अहें अहांरे प्रभु यीशु मसीह रे जरिये छुटकारा पाओ। 10 यीशु मसीह अहां खातर इस वजह ते मरया भई अहें चाये जिऊंदा ओ या मूईरे ओ, अहें सदा तिसने सौगी जी सको। 11 इस वजह ते इक्की दूये जो हौंसला देओ कने इक्की दूये जो परमेशरा पर विश्वास करने रे खातर मदद करो, तेढ़ा जे तुहें कराँ बी ये।” कलीसिया जो उपदेश 12 साथी विश्वासियो अहें तिन्हांरा आदर करने खातर तुहांजो विनती कराँ ये सै जे तुहांरे बिच कड़ी मेहणत कराँ ये, कने प्रभुये च तुहांरे अगुवे, कने तुहांजो सखांये। 13 कने तिन्हारे कम्मां रिया वजह ते तिन्हांरे प्रति बौहत आदर कने प्रेम दस्सा। कने अप्पूँ चियें मेल-मिलापा ने रौ। 14 साथी विश्वासियो, अहें तुहांजो विनती कराँ ये भई सै जे विश्वासी आलसी ये तिन्हाजो सावधान करा, कायराँ जो हौंसला देआ, सै जे कमजोर ये तिन्हांरी मदद करा, कने सारयां खा सहनशीलता दस्सा। 15 ये ध्यान रखा भई कोई किसी ने बुराईयां रे बदले बुराई नीं करो; पर सदा अप्पूँ चियें कने सब्बीं ने भलाई करने री कोशिश करा। 16 सदा खुश रौ। 17 लगातार प्राथना करदे रौ। 18 हरेक हालता च परमेशरा रा धन्यवाद करो; काँह्भई तुहां खातर मसीह यीशु च परमेशरा री येई इच्छा इ। 19 पवित्र आत्मा रे कम्मा जो नीं रोका। 20 भविष्यवाणियां जो घटिया नीं जाणो। 21 सब्बीं गल्लां जो परखो; सै जे खरियां इया तिन्हौं ग्रहण करीने तिन्हांरा पालन करा। 22 हरेक बुराईया ते बचीने रौआ। आशीर्वाद 23 हऊँ परमेशरा ने प्राथना कराँ सै जे शान्ति देआं भई सै तुहांजो पूरे तरिके ने पवित्र करो; कने तुहांरी आत्मा, प्राण कने देह अहांरे प्रभु यीशु मसीह रे वापस औणे तक पूरे तौर पर निर्दोष कने सुरक्षित रौआ। 24 काँह्भई तुहांरा सदणे औल़ा सच्चा, कने तिस येढ़ा इ करना। 25 साथी विश्ववासियो, अहां खातर प्राथना करो। 26 सब्बीं साथी विश्ववासियां जो गले लाईने नमस्कार करो। 27 हऊँ तुहांजो प्रभु यीशुये रे नौआं ते हुक्म देआं भई ये पत्री सारयां साथी विश्वासियां जो पढ़ीने सुणाई जाओ। 28 अहांरे प्रभु यीशु मसीह रा अनुग्रह तुहां सौगी बणी रौ। |
This work is licensed under Creative Commons Attribution-ShareAlike 4.0 License.