1 पतरस 3 - बिलासपुरी नौआं नियम

पति कने पत्नी

¹ अरे पत्नियो, तुहें बी अपणे-अपणे पतियां रे अधीन रौआ, इस खातर भई जे तिन्हां चते कोई परमेशरा रे वचना पर विश्वास नीं करदा हो,

² तुहांरे बिणा किछ बोल्ले सिर्फ तुहांरे चाल-चलना जो देखीने इ तिन्हां यीशुये पर विश्वास करना, काँह्भई तिन्हां तुहांरा पवित्र कने अच्छा स्वभाव देखणा।

³ तुहांरा सजणा-संबरना दिखावटी नीं हूणा चाहिन्दा, यनिके किसी रा ध्यान खिंजणे रे खातर बाल बनाणा, सोने रे गैहणे कने मैहंगे कपड़े पैहनणा,

⁴ बल्कि तुहांरी सुन्दरता तुहांरिया अन्तरात्मा पर निर्भर हूणी चाहिन्दी यनि नम्रता कने शाँत स्वभाव सै जे कदीं नाश नीं हूणा, परमेशरा रिया नज़राँ च बौहत कीमती आ।

⁵ काँह्भई बौहत पैहले पवित्र औरतां बी तिन्हें जे परमेशरा पर अपणी आस्सां रखियां थिआं, अप्पूँजो इस तरिके ने स्वाराँ थिआं कने सै अपणे-अपणे पतिये रे अधीन रैयां थिआं।

⁶ तियां जे सारा अपणे पति अब्राहमा रा हुक्म मन्नां थी कने तिस्सो अपणा स्वामी बोलां थी। जे तुहें सैई करो सै जे ठीक आ कने किसी गल्ला ते नीं डरो, तां तुहां तिसारी बेटियां साई हूणा।

पति

⁷ तियां इ पतियो, तुहें बी अपणी पत्नियां रा आदर करा कने तिन्हांने समझदारिया ने बर्ताव करा तियां जे तुहें कट्ठा जीआ राँये, काँह्भई सै तुहां साई मजबूत निआं, पर तुहें कने सै परमेशरा रे जीवना रे बरदाना च बराबरिया रे वारस ये। येढ़ा करने ते तुहांरियां प्राथनां रे जबाबां च अड़चन नीं औणी।

भलाई करने रिया बजह ने सताव

⁸ आखिर च हऊँ तुहांजो ये बोलणा चांह, तुहां सारयां जो इक मन हूणा चाहिन्दा, इक दूये रे प्रति सहानुभूति रखा कने इक दूये जो इक परिवारा रे सदस्या साई प्यार करा, कने इक दूये रे प्रति दयालु कने नम्र बणा।

⁹ बुराईया रे बदले बुराई कने बेईज्जतिया रे बदले बेईज्जति मत करा बल्कि तुहौं आशीष देणी चाहिन्दी; काँह्भई आशीष देणे खातर तुहें परमेशरा रे जरिये चुणे गईरे, ताकि तुहें परमेशरा ते आशीष पाओ।

¹⁰ काँह्भई पवित्रशास्त्र बोलां, “सै जे कोई अपणिया जिन्दगिया री मौज लेणा चांह कने अच्छे दिन देखणा चांह, सै अपणिया जीभा जो बुराईया ते, कने होंठां जो झूट्ठा ते बचाओ।

¹¹ तिस्सो बुराईया रा साथ छड्डिने भलाई करनी चाहिन्दी; तिस्सो दुज्जेयां सौगी मेल-मलापा ने रैहणे खातर कोशिश करनी चाहिन्दा।

¹² काँह्भई प्रभु रियां आक्खीं धर्मियां पर लगी रियां रैईं, कने तिसरे कान्न तिन्हां रिया प्राथनां खौ लगीरे रैं; पर प्रभु बुरा करने औल़यां रा बरोध कराँ।”

¹³ जे तुहें हमेशा भलाई करने री कोशिश करया राँये, तां असल च कोई तुहांजो घायल नीं करी सकदा।

¹⁴ पर जे तुहें सही काम्म करने पर दुख सैयां ये, तां तुहांजो परमेशरा आशीष देणी, तियां जे यशायाह भविष्यवक्ते लिखिरा तियां करा, “तिन्हांरे डराणे ते मत डरा कने नां घबरावा।”

¹⁵ बल्कि मसीह जो अपणी जिन्दगिया रा प्रभु जाणीने आदर करा। जे कोई तुहांते तुहांरिया आशा रे बारे च पुछो, तां तिस्सो जबाब देणे रे खातर हमेशा त्यार रौआ, पर बिनम्र कने आदरा ने ये करा;

¹⁶ कने अपणी अन्तरात्मा साफ रखा, ताकि यीशु मसीह च तुहांरे खरे चाल-चलना री निंध्या करने औल़े लोक तुहांरी बेज्जति करदे हुये शर्म महसूस करो।

¹⁷ जे परमेशरा री येई इच्छा इ, तां बुराई करीने सजा भुगतणे ते जादा भलाई करीने दुख सैहणा ठीक आ।

मसीह रा दुख

¹⁸ हऊँ इस खातर सै बोलां भई, मसीहे बी दुख सैहण कित्या कने अहांरे पापां रे खातर इक इ बार मरया। सै धर्मी माहणु था सै जे पापी लोकां रे खातर मरया, ताकि सै तुहांजो परमेशरा रे नजदीक ल्याई सक्को। तिसरी शारीरिक मौत त हुईगी, पर सै परमेशरा रिया आत्मा रे जरिये जिऊंदा कित्या गया।

¹⁹ फेरी मसीहे अपणी आत्मा च जाईने कैदी आत्मां जो प्रचार कित्या।

²⁰ ये तिन्हां लोकां रियां आत्मां थिआं तिन्हेंजे बौहत पैहले परमेशरा रा हुक्म नीं मन्नया था ताहली जे नूँह जहाज बणाईराँ था, कने परमेशर धीरजा ने इन्तजार करया राँ था भई सै मन फिराई लो। पर येढ़ा नीं हुया कने जलप्रलय ते बाद सिर्फ आट्ठ माहणु इ बची पाये।

²¹ ये पाणी बपतिस्मे रा प्रतीक आ सै जे हुण तुहांजो बचां। तिस पाणिये ते जे तुहें बपतिस्मा लेईरा सै पाणी शरीरा रा मैल नीं दूर करदा, पर ये इक निशाण आ भई तुहें साफ अन्तरात्मा ने परमेशरा ते माफी मंगीरी। यीशु मसीह रे मूईरयां चते जिऊंदा हुणे रिया वजह ने तुहांजो माफी मिली सक्कां इ,

²² कने सै स्वर्गा च जाईने परमेशरा रे सज्जे पासे आदरा रिया जगह बैठिग्या; कने सारे स्वर्गदूत, अधिकारी कने शक्तियां तिसरे अधीन करीते।