1 पतरस 1 - बिलासपुरी नौआं नियम

नमस्कार

¹ हऊँ पतरस, यीशु मसीह रा प्रेरित ये चिट्ठी परमेशरा रे तिन्हां चुणी रे लोकां खातर लिख्या राँ सै जे पुन्तुस, गलातिया, कप्पदूकिया, आसिया कने बितूनिया रे प्रदेशां च खिण्डीने प्रदेशियां साई रैई कराँ ए।

² परमेशर पिता बौहत पैहले अपणे लोक हुणे खातर तुहांजो चुणने खातर तैह कित्या कने तुहांजो पवित्र आत्मा रे कम्मा रे जरिये पवित्र बणाया। तिने ये इस खातर कित्या ताकि तुहें यीशु मसीह जो मन्नी सक्को कने तिसरे खून्ना रे जरिये शुद्ध हुई सक्को। हऊँ प्राथना कराँ भई परमेशर तुहांजो बौहत जादा अनुग्रह कने शान्ति देओ।

इक बड्डी आशा

³ परमेशर कने अहांरे प्रभु यीशु मसीह रे पिता रा धन्यवाद हो, तिने जे यीशु मसीह रे मूईरेयां चते जिऊंदा हुणे रे जरिये अपणी बड़ी दया ते अहांजो नया जीवन दित्या। हुण अहें बडिया आस्सां ने जीयें,

⁴ कने अहें तिसा विरासता जो पाई सक्को तिसजो जे परमेशरे अपणयां लोकां रे खातर रखीरा। तिने तुहांरे खातर बी स्वर्गा च रखीरा तित्थी जे सै कदी सड़नी नीं, कदी बिगड़नी नीं, कदी मिटणी नीं।

⁵ परमेशर अपणिया सामर्था रे जरिये तुहांजो सुरक्षित रखां, काँह्भई तुहें मसीह पर विश्वास कराँ ये कने तिस तुहांजो लगातार आखिरी दिना तक सुरक्षित रखी रखणा, फेरी तुहां जाणना भई परमेशरे तुहांरा पूरे तरिके ने पापाँ ते कने मौती ते छुटकारा कित्तिरा।

⁶ इस वजह ने तुहांजो इन्हां सारियां गल्लां रे बारे च खुश हूणा चाहिन्दा, हलाँकि हुण तुहांजो किछ वगता तक कई तरह रियां परेशानियां उदास करी सक्कां इयां।

⁷ ये इस खातर आ भई तुहांरा विश्वास सच्चा साबित हो, मसीह यीशुये पर तुहांरा विश्वास सियुने ते बी बौहत कीमती आ। तियां जे नाशवान सियुना अग्गी ते परखया कने शुद्ध कित्या जां, तियां इ जे तुहांरा विश्वास समस्यां ते परखया जाणे ते बाद मजबूत बणीरा रौ, तां तुहां तिस दिन प्रशंसा, महिमा कने आदर पाणा ताहली जे यीशु मसीह वापस औणा।

⁸ हलाँकि तुहें कदी यीशु मसीह जो नीं देख्या फेरी बी तुहें तिसने प्यार कराँ ये; कने हुण तुहें तिस्सो नीं देखदे, फेरी बी तुहें तिस पर विश्वास कराँ ये कने येढ़े आनन्दित कने मगन हुआं ये सै जे बखान करने ते बाहर कने महिमा ने भरीरा,

⁹ काँह्भई तुहांरियां आत्मां पूरी तरह छुटकारा पाया कराँ ईयाँ। येई तुहांरे विश्वासा रा ईनाम आ।

¹⁰ इस छुटकारे रे बारे च तिन्हें भविष्यवक्तयां, बड़िया सावधानिया ने खोज-बीण कित्तिरी थी, कने तिन्हें तिस अनुग्रह रे वारे च भविष्यवाणी कित्ती सै जे तुहां पर हुणे औल़ा था।

¹¹ मसीह रा आत्मा तिन्हां च था कने तिन्हांजो दस्यारां था भई मसीहे कियां दुख सैहणा कने तिस्सो महान आदर दित्या जाणा। इस खातर तिन्हें ये पता लगाणे री खोज कित्ती भई मसीह कुण हूणा कने ये कदीं हूणा।

¹² पर परमेशरे इन्हां भविष्यवक्तयां जो परगट कित्या भई तिन्हांरा सन्देश तिन्हांरे फायदे रे खातर नीं था बल्कि तुहांरे खातर था। सै सन्देश यीशु मसीह री खुशखबरी आ तिसजो जे हुण तुहें सुणीरा। परमेशरे अपणे पवित्र आत्मा जो स्वर्गा ते इस खातर भेज्या ताकि सै खुशखबरिया रा प्रचार करने च लोकां री मदद करी सक्को। इन्हां गल्लां जो स्वर्गदूत बी बेसब्रिया ने देखणे री इच्छा रक्खां ये।

पवित्र जीवन जीणे री बुलाहट

¹³ इस खातर अपणे मना जो काम्म रे खातर त्यार करा। सचेत रौआ कने अपणी आस पूरी तरह तिस अनुग्रह पर रखा सै जे मसीह यीशुये रे भीं ते औणे रे बगत तुहांजो दित्या जाणा।

¹⁴ हुक्म मनणे औल़े बच्चयां साई रौआ कने अपणी बुरी इच्छां रे मुतावक बर्ताव मत करा, तियां जे तुहें पैहले कराँ थे ताहली जे तुहांजो परमेशरा री सच्चाई पता नीं थी।

¹⁵ पर तियां जे तुहांरा सदणे औल़ा परमेशर पवित्र आ, तियां इ तुहें बी अपणे सारे चालचलना च पवित्र बणा।

¹⁶ काँह्भई पवित्रशास्त्रा च ये लिख्‍या गईरा, “पवित्र बणा, काँह्भई हऊँ पवित्र आ।”

¹⁷ जे तुहें परमेशरा जो पिता बोल्लीने प्राथना कराँ ये सै जे बिणा तरफदारिया ते कित्तिरे हर इक्की रे कम्मां जो देखीने इन्साफ कराँ, तां इस संसारा च इक परदेसिये साई जींदे हुये तिसरा आदर करदे हुये अपणा जीवन बितावा।

¹⁸ काँह्भई तुहें जाणाँ ये भई तुहांरा निकम्मा चालचलन सै जे पूर्वजां रे वगता ते चलया आई कराँ तिसते तुहांरा छुटकारा चान्दी, सोने साई या नाशवान चिज़ां ते नीं हुई;

¹⁹ पर निर्दोष कने कलंक रहित मेमने यनि मसीह रे कीमती खून्ना ते हुई।

²⁰ परमेशरे मसीह जो इस संसारा रिया सृष्टिया ते पैहले इ चुणीलरा था, पर तुहां लोकां रिया भलाईया रे खातर तिस्सो इन्हां आखरी दिनां च प्रगट कित्या।

²¹ तिसरे जरिये तुहें परमेशरा पर विश्वास करदे रै तिने जे तिस्सो मूईरेयां चते जिऊंदा कित्या कने तिस्सो महिमा दित्ति, इस खातर तुहांरी आस कने तुहांरा विश्वास परमेशरा पर हुण मजबूत आ।

²² हुण तुहें सच्चाईया जो मनदे हुये अप्पूँजो परमेशरा रे जरिये पवित्र करील्या, ताकि तुहांरा प्यार साथी विश्वासियां रे प्रति सच्चा हो। कने लगातार इक्की दुज्जे जो दिला ते प्यार करा,

²³ काँह्भई तुहें परमेशरा ते नया जीवन पाईरा। तुहें ये जीवन येढ़ियां चीजां ते नीं पाईरा सै जे नाश हुई जाणा, पर येढ़ियां चीजां ते पाईरा सै जे सदा रे खातर हूणा यनि परमेशरा रा जीवित कने अनन्तकाल रे वचना ते।

²⁴ येई पवित्रशास्त्र बोलां, “हर इक माहणु घा साई आ कने तिसरी सारी खूबसूरती घा रे फूल्लां साई। घा सुक्की जां, कने फुल्ल झड़ी जांए,

²⁵ पर प्रभुये रा वचन जुगां-जुगां तक बणीरा रैआं।” कने येई वचन खुशखबरी सै जे तुहांजो सुणाई गईरी।