1 कुरिन्थियों 7 - बिलासपुरी नौआं नियम

ब्याह रे सम्बन्धा च स्वाल

¹ तिन्हां गल्लां रे बारे च सै जे तुहें मिन्जो लिखीने पुच्छी रियां: ये मर्दा रे खातर ठीक आ भई सै ब्याह नीं करो।

² पर व्यभिचारा रे डरा ते हरेक मर्दा री जनाना, कने हरेक जनाना रा पति ओ।

³ मर्द अपणिया जनाना रा हक पूरा करो; कने तियां इ जनाना अपणे मर्दा रा।

⁴ जनाना जो अपणे शरीरा पर कोई हक निआं, पर तिसारे मर्दा रा हक आ; तियां इ मर्दा जो बी अपणे शरीरा पर कोई हक निआं, पर तिसरिया जनाना रा।

⁵ तुहें इक दुज्जे ते लग नीं रौआ; पर सिर्फ किछ बगता तका इक्की दुज्जे रिया सहमतिया ते प्राथना खातर बगत मिलो। कने फेरी इकट्ठे हुईजो; येढ़ा नीं हो भई तुहांरे असंयम रिया वजह ते शैतान तुहांजो परखो।

⁶ पर हऊँ ये हुक्मा रे रुपा च नीं, पर अनुमतिया रे रुपा च बोलां।

⁷ हऊँ येढ़ा चांह भई तेढ़ा जे हऊँ आ, तियां इ सब माहणु हो; पर हर इक्की जो परमेशरा रिया तरफा ते खास वरदान मिलीरे; किसी जो इक्की तरिके रा, कने किसी जो दुज्जे तरिके रा।

⁸ हुण हऊँ क्वारयां कने विधवां रे बारे च बोलां भई तिन्हां खातर तेढ़ा इ अच्छा रैहणा तियां जे हऊँ आ।

⁹ पर जे सै संयम नीं करी सक्को, तां सै ब्याह करो; काँह्भई बासना च जल़णे ते बेहतर ब्याह करना ठीक आ।

¹⁰ पर तिन्हांरा जे ब्याह हुईगरा, तिन्हांजो हऊँ नीं, पर प्रभु हुक्म देआं भई जनाना अपणे मर्दा ते लग नीं रौ।

¹¹ कने जे जनाना लग हुई बी जाओ, तां बिणा दुज्जा ब्याह कित्ते रौ या अपणे मर्दा ने मेल-मिलाप करी लो, कने नां मर्द अपणिया जनाना जो छड्डो।

¹² दुज्यां जो प्रभु नीं पर हऊँ बोलां, जे किसी साथी विश्वासिये री जनाना सै जे विश्वासी नीं कने तिस सौगी रैहणे ते खुश इ; तां सै तिसाजो नीं छड्डो।

¹³ कने जे किसी जनाना रा पति विश्वासी नीं हो कने तिसा सौगी रैहणे ते खुश आ; सै पतिये जो नीं छड्डो।

¹⁴ काँह्भई येढ़ा पति सै जे विश्वासी नींआ सै अपणी विश्वासी जनाना रिया वजह ते पवित्र ठैहराँ; कने येढ़ि जनाना सै जे विश्वासी नीं, अपणे विश्वासी पतिये रिया वजह ते पवित्र ठैहराँ इ। नैत तुहांरे बाल-बच्चे अपवित्र हुन्दे, पर हुण सै पवित्र ये।

¹⁵ पर जे अविश्वासी पति लग हूणा चाये, तां तिस्सो लग हुणे देओ, येढ़िया दशा च कोई बी विश्वासी मर्द या विश्वासी जनाना बन्धना च नींये; पर परमेशरे अहांजो मेल-मलापा खातर सद्दीरा।

¹⁶ अरे जनाना, तू कियां जाणाँ इ भई तू अपणे पतिये रा छुटकारा करी सक्कां इ? कने अरे पति, तू कियां जाणाँ भई तू अपणिया जनाना रा छुटकारा करी सक्कां?

परमेशरा रिया बुलाहटा रे मुतावक चला

¹⁷ फेरी बी हर इक माहणु तिसा दशा च जे सद्दया गईरा तिसच बणीरा रौ कने तिस्सो प्रभुये ते जो बरदान मिलीरा तिसरे मुतावक जीवन जीओ। हऊँ सारी कलीसियां रे खातर ये नियम तैह कराँ।

¹⁸ जे सद्दया जाणे रे वगत इक माहणुये रा खतना हुई चुक्कीरी था, तां सै इसा गल्ला जो छिपाणे री कोशिश नीं करो कने जे सद्दे जाणे रे वगत इक माहणुये रा खतना नीं हुईरा था, तां सै खतना नीं करवाये।

¹⁹ नांत खतना कराणे औल़े रा कोई महत्व हाया कने नांई बगैर खतने औल़े रा, पर परमेशरा रे हुक्मा रा पालन करना इ सब किछ आ।

²⁰ हरेक माहणु तिसा दशा च जे सद्दया गया, सै तिसा ची रौ।

²¹ जे तू सद्दया जाणे रे वगत दास था, तां इसरी चिन्ता नीं कर; पर जे तू अजाद हुई सक्को, तां तिस मौके रा फायदा लै।

²² काँह्भई प्रभुये रे जरिये सद्दया जाणे रे वगत सै जे दास था, सै प्रभुये रे जरिये अजाद कित्या गईरा। तियां इ सै जे प्रभुये रे जरिये सद्दया जाणे रे वगत सै जे अजाद था सै मसीह रा दास आ।

²³ परमेशरे दाम देईने तुहांजो खरीदी लरा इस खातर लोकां रे दास मत बणा।

²⁴ अरे साथी विश्वासियो, हरेक माहणुये जो तिसा दशा च जे सद्दया गया, सै तिस ची परमेशरा रिया संगतिया च रौ।

क्वारियाँ कने विधवां

²⁵ क्वारियाँ रे बारे च सै स्वाल जे तुहें पुच्छया था तिसरा जबाब हऊँ देणा चांह: प्रभुये रिया तरफा ते कोई हुक्म मिन्जो नीं मिलया, पर प्रभुये रिया दया ते बफादार हुणे रे नाते हऊँ अपणी राय देआं।

²⁶ हऊँ समझां भई अजके कलेशा रिया वजह ने माहणुये रे खातर ये अच्छा भई सै तेढ़ा जे हया तेढ़ा इ रौ।

²⁷ जे तू ब्याही रा तां तू अपणिया जनाना ते लग हुणे री कोशिश मत करयां; कने जे शादीशुदा नीं, तां ब्याह करने रे खातर कोशिश मत करयां।

²⁸ पर जे तू ब्याह बी करो, तां ये पाप निआं; कने जे क्वारी ब्याह करो, तां कोई पाप निआं। पर सै लोक जे ब्याह कराँ ये तिन्हां इस जीवना च बौहत समस्यां रा सामना करना, पर हऊँ तुहांजो इन्हांते बचाणा चांह।

²⁹ अरे साथी विश्वासियो, मेरा मतलब येआ भई अहांरा संसारा च रैहणे रा बगत कम आ, इस खातर हुण ते सै जे शादीशुदा सै बी इस तरिके ने रौ भई मन्नो सै शादीशुदा नींआ;

³⁰ सै जे शोक कराँ ये सै इयां रौ भई मन्नो सै शोक नीं करया राँये; कने खुश रैहणे औल़े येढ़े हो भई मन्नो सै आनन्द नीं करदे; कने मोल लेणे औल़े येढ़े हो, भई मन्नो तिन्हांले किछ हया इ निआं।

³¹ कने सै जे इस संसारा रियां चीजां रा इस्तेमाल कराँ ये सै इयां करो मन्नो भई तिन्हांरा इस्तेमाल नीं करदे। काँह्भई तियां जे अहें ये जाणाँ ये भई ये संसार जल्दी नाश हुई जाणा।

³² इस खातर हऊँ चांह भई तुहांजो चिन्ता नीं हो। सै मर्द जे शादीशुदा नींये सै प्रभुये रियां गल्लां री चिन्ता च रैआं भई सै प्रभुये जो कियां प्रसन्न करिये।

³³ पर ब्याही रे माहणु संसारा रियां गल्लां री चिन्ता च रैआं भई सै अपणिया जनाना जो कियां प्रसन्न करिये,

³⁴ इसरा नतीजा येआ भई तिसरी सोच दुईं तरफा हुई जांई। तिसारा पति जे नीं रैया कने सै जे क्वारी सै प्रभुये रियां गल्लां री चिन्ता कराँ इयां भई सै शरीर कने आत्मा दुईं च पवित्र हो, पर ब्याही री संसारा रिया चिन्ता च रैईं भई सै अपणे पतिये जो किंया खुश रखो।

³⁵ हऊँ ये गल्ल तुहांरे भले रे खातर इ बोल्या राँ, नां की तुहांजो फसाणे खातर, बल्कि हऊँ चांह भई तुहें सै करो सै जे सही आ कने तुहें इक मन हुईने प्रभुये रिया सेवा च लगीरे रौ।

³⁶ जे कोई ये समझां भई सै क्वारिया रे ब्याह च देर करने रिया वजह ने तिसाने अन्याय करया राँ, काँह्भई तिसारी उम्र ढल़या राईं, तां सै तियां इ करो सै जे तिसजो ठीक लगां, इसच पाप निआं, सै तिसारा ब्याह होणे देओ।

³⁷ पर सै जे मना च मजबूत आ, सै जे किसी बी तरिके ने मजबूर नींआ कने अपणिया इच्छां जो बशा च रखां, जे तिने अपणे मना च ये गल्ल ठाणी लरी भई तिस अपणिया क्वारिया जो बिणा ब्याहे रखणा, तां सै अच्छा कराँ।

³⁸ इस खातर सै जे अपणिया क्वारिया रा ब्याह कराँ, सै अच्छा कराँ, कने सै जे ब्याह नीं करदा, सै बी अच्छा कराँ।

³⁹ तदुआं तक जे किसी जनाना रा पति ज्यूंदा, तदुआं तका सै तिसने बझीरी; पर जे तिसारा पति मरी जाओ तां सै तिसने जे चाओ तिसने ब्याह करी सक्कां इ, पर सै प्रभुये च विश्वास करने औल़ी हो।

⁴⁰ पर जे सै तियां इ रैई जो, तां सै जादा धन्या इ। ये मेरा बिचार आ कने हऊँ समझां भई परमेशरा रा आत्मा मांह च बी आ।