1 कुरिन्थियों 11 - बिलासपुरी नौआं नियम

¹ तुहें मेरे साई चाल चला, तियां जे हऊँ मसीह रे साई चाल चलां।

अराधना च सिर ढकणा

² हऊँ तुहांरी तारीफ कराँ, काँह्भई तुहें मिन्जो हर वगत याद करदे रैं; कने सै जे शिक्षायें मैं तुहांजो दित्ति रियां, तिन्हांरा सावधानिया ने पालन करया राँये।

³ पर हऊँ चांह भई तुहें ये जाणी लो भई हरेक माहणुये रा सिर मसीह आ, कने जनानां रा सिर माहणु आ, कने मसीह रा सिर परमेशर आ।

⁴ सै जे माहणु सिर ढक्कीने प्राथना या भविष्यवाणी कराँ, सै मसीह रा अपमान कराँ सै जे सिर आ।

⁵ पर सै जे जनाना बिणा सिर ढक्कीने प्राथना या भविष्यवाणी कराँ इ, सै अपणे सिरा रा यनि अपणे पतिये रा अपमान कराँ इ, काँह्भई ये गंजी हुणे रे बराबर इ।

⁶ जे जनाना चादरु नीं ओड्डो तां बाल़ बी कटाई लो; जे जनाना खातर बाल कटाणा या सिर मुंडवाणा अपमान्ना री गल्ल इ, तां तिसाजो चादरु ओड्डणा चाहिन्दा।

⁷ इक्की माहणुये जो अपणा सिर ढकणा ठीक निआं, काँह्भई सै परमेशरा रे स्वरूपा च बणाया गईरा कने तिसरी महिमा इ; पर जनाना माहणुये री महिमा इ।

⁸ काँह्भई पैहला माहणु जनाना ते नीं आया, पर पैहली जनाना माहणुये ते आई;

⁹ कने माहणु जनाना खातर नीं बणाया गया, पर जनाना माहणुये खातर बणाईरी।

¹⁰ इस खातर स्वर्गदूतां रिया वजह ते जनाना जो अपणी अधीनता दिखाणे खातर अपणे सिरा जो ढक्कीने रखणा चाहिन्दा।

¹¹ फेरी बी प्रभु च जनाना माहणुये ते लग नीं कने माहणु जनाना ते लग नींआ।

¹² हलाँकि परमेशरे पैहलिया जनाना जो पैहले माहणुये ते बणाईरा, पर हुण जनाना माहणुये जो जन्म देईं; कने सब चिज़ां परमेशरा तेई हईयां।

¹³ तुहें खुद बचार करा: क्या जनाना जो बिणा सिर ढक्के परमेशरा ते प्राथना करना ठीक आ?

¹⁴ क्या प्रकृति खुद तुहांजो ये शिक्षा नीं देन्दी भई लम्बे बाल रखणा माहणुये रे खातर अपमान्ना री गल्ल इ,

¹⁵ जबकि जनाना रे खातर लम्बे बाल़ रखणा शोभा इ? काँह्भई बाल तिसाजो चादरुये रे रुपा च दित्तिरे।

¹⁶ पर जे कोई इस बारे च बैहस करना चाओ, तां सै ये जाणी लो भई नां अहांरी कने नां परमेशरा रिया कलीसियां री ये प्रथा इ।

प्रभु-भोज्जा रे बारे च

¹⁷ पर ये हुक्म देन्दे हुये हऊँ तुहांजो नीं सराँदा, इस खातर भई तुहांरे कट्ठे हुणे ते भलाई नीं, पर नुक्शान हुआं।

¹⁸ काँह्भई पैहले त हऊँ ये सुणां, भई तंजे तुहें कलीसिया च अराधना करने खातर कट्ठे हुआं ये, तां तुहां च फूट इ, कने हऊँ इस पर थोड़ा-थोड़ा विश्वास बी कराँ।

¹⁹ पर बटवारा बी तुहां च जरूर हुंगा, इस खातर भई सै लोक जे तुहां च खरे निकली रे सै सामणे आई जाओ!

²⁰ ताहली जे तुहें अहांरे प्रभु यीशु मसीह रिया मौती जो याद करने खातर कट्ठे हुआं ये, तां ये प्रभु भोज खाणे रे खातर नीं,

²¹ काँह्भई खाणे रे बगत इक दुज्जे ते पैहले अपणा खाणा खाई लेआं, तां कोई भूखा रैआं कने कोई मतवाला हुई जां।

²² क्या खाणे-पीणे रे खातर तुहांरे घर नींये? या परमेशरा री कलीसिया जो घटिया जाणाँ ये, कने तिन्हांले जे किछ निआं तिन्हांजो बेज्जत कराँ ये? हऊँ तुहांजो क्या बोलूं? क्या इसा गल्ला च तुहांरी तारीफ करूँ? नां, हऊँ तारीफ नीं करदा।

²³ काँह्भई मैं सै जे प्रभुये ते पाया सैई तुहां तक पहुँचाया: भई प्रभु यीशु तिसा राति जे पकड़वाया गया, रोटी लई,

²⁴ कने धन्यवाद करीने सै तोड़ी कने तिने बोल्या, “ये मेरी देह इ, सै जे तुहां खातर इ : मिन्जो याद करने खातर येढ़ा करया करो।”

²⁵ इसा इ रितिया ते तिने तिसते बाद कटोरा बी लया कने गलाया, “ये कटोरा मेरे खून्ना च नई वाचा ई: ताहली जे कदीं पीओ, तां मिन्जो याद करने खातर येढ़ा इ करया करा।”

²⁶ काँह्भई ताहली जे कदीं तुहें ये रोटी खांये कने इस कटोरे चते पींये, तां तुहें प्रभुये रे औणे तक तिसरिया मौती रा प्रचार कराँ ये।

²⁷ इस खातर सै जे कोई गल़त तरिके ने प्रभुये री रोटी खाओ या तिसरे कटोरे चते पीओ, तां सै प्रभुये री देह कने खून्ना रा दोषी हूणा।

²⁸ इस खातर माहणु अप्पूँजो परखी लौ कने इसा रितिया ते इसा रोटिया चते खाओ, कने इस कटोरे चते पीओ।

²⁹ काँह्भई सै जे खान्दे-पीन्दे बगता प्रभुये री देहा जो नीं पछयाणो, तिसरे इस खाणे कने पीणे ते परमेशरा तिसजो सजा देणी।

³⁰ इस वजह ते तुहांरे बिच बौहत सारे लोक कमजोर कने रोगी ये, कने बौहत सारे मरी बी गये।

³¹ जे अहें अप्पूँजो परखदे तां दण्ड नीं पान्दे।

³² पर प्रभु अहांजो सजा देईने अहांरी ताड़ना कराँ, इस खातर भई अहें संसारा सौगी सजा रे भागी नीं हो।

³³ इस खातर, अरे मेरे साथी विश्वासियो, तंजे तुहें खाणे खातर कट्ठे हुआं ये, तां इक्की दुज्जे खातर इन्तजार करा।

³⁴ जे कोई भूखा हो तां अपणे घरा च खाई लो, ताकि तुहांरा कट्ठा हूणा सजा री वजह नीं बणो। बाकी गल्लां जो हऊँ आईने ठीक करगा।