1 कुरिन्थियों 10 - बिलासपुरी नौआं नियमइस्राएल रे इतिहासा ते चेतावनी 1 अरे साथी विश्वासियो, हऊँ नीं चाहंदा भई तुहें इसा गल्ला ते अंजाण रौ भई अहांरे सब पूर्वज बदल़ां रे थल्ले थे, कने सारे समुद्रा रे बिच्चा ते हुईने पार हुईगे। 2 कने सब्बीं जणयां बद्दल़ा च कने समुद्रा च मूसे रा बपतिस्मा लैया। 3 कने तिन्हें सब्बीं इक्को इ आत्मिक रोटी खाद्दि; 4 कने सब्बीं इक्को इ आत्मिक पाणी पित्या, काँह्भई सै तिस आत्मिक चट्टान्ना ते पीआं थे सै जे तिन्हां सौगी-सौगी चलां थी, कने सै चट्टान मसीह था। 5 पर परमेशर तिन्हां चते बौहतां ते खुश नीं हुया था, इस खातर सै सुनसान जगह च मरीगे। 6 ये सारियां गल्लां अहां खातर इक उदाहरण आ, भई तियां जे अहांरे पूर्वजें लालच कित्या था, तियां इ अहें बुरियां चीज़ा रा लालच नीं करिये; 7 कने नां तुहें मूर्ति पूजक बणो, तेढ़े जे तिन्हां चते कितणे इ बणीगरे थे, तियां जे पवित्रशास्त्रा च लिखिरा, “लोक खाणे कने पीणे रे खातर बैट्ठे, कने खेलणे-कूदणे उट्ठे।” 8 कने नां अहें व्यभिचार करिये, तेढ़ा जे तिन्हां चते कितणेयां कित्या; कने इक्की दिना च तेई हज़ार मरीगे। 9 कने नां अहें प्रभुये जो परखिये, तियां जे तिन्हां चते कितणेयां कित्या, कने सर्पां रे डसणे ते मरीगे। 10 कने नां तुहें कुड़कुड़ाओ, तियां जे तिन्हां चते कितणे कुड़कुड़ाये कने नाश करने औल़े दूतां रे जरिये नाश कित्ते गये। 11 पर ये सब गल्लां, सै जे तिन्हां पर हुईयां, उदाहरणां रे तौरा पर थिआं; कने सै जे अहांरे खातर चेतावनिया रे रुपा च लिखी रियां, काँह्भई अहें तिस जुगा चे सै जे अन्त रे करीव आ। 12 इस खातर सै जे समझां भई, “हऊँ विश्वासा च मजबूत आ,” सै चौकन्ने रौ भई किति पापा च नीं पई जाओ। 13 तुहें अज्जा तक किसी येढ़िया परीक्षा च नीं पै, तिसा परीक्षा जो जे लोकें अनुभव नीं कित्या; कने परमेशर बफादार आ। तिस तुहांजो किसी येढ़िया परीक्षा च पौणे देणा सै जे तुहांरे सैहणे ते परे इ, पर परीक्षा ते बाहर निकल़णे खातर तिस तुहांजो ठीक रस्ता दसणा ताकि तिस्सो तुहें सही सक्को। मुर्तीपूजा रे खलाफ चेतावनी 14 इस खातर, अरे मेरे प्यारे मित्रो, मूर्ति पूजा ते दूर नट्ठा। 15 हऊँ तुहांजो बुद्धिमान जाणीने येढ़ा बोलां: सै जे हऊँ बोलां, तिस्सो तुहें अपणे खातर परखा। 16 सै कटोरा जे अहें प्रभु भोज्जा च इस्तेमाल कराँ ये कने तिस खातर जे अहें प्रभुये रा धन्यवाद कराँ ये: ताहली जे अहें तिस चते पीयें तां अहें मसीह रे खून्ना च सहभागी हुआं ये। कने रोटी सै जे अहें तोड़ां यें: ताहली जे अहें इसाजो खांये तां अहें मसीह रिया देहा च सहभागी हुआं ये। 17 काँह्भई इक रोटी ये दस्सां इ भई अहें सै जे बौहत ये मसीह च इक शरीर ये, काँह्भई अहें सारे तिसा रोटिया च भागी हुआं ये। 18 इस्राएली लोकां रे बारे च सोच्चा: क्या बलिदान्ना रे खाणे औल़े वेदिया रे सहभागी नींये? 19 फेरी हऊँ क्या बोलां? क्या येढ़ा भई मूर्तिया पर चढ़ीरा बलिदान किछ हया या मूर्ति किछ इ? 20 नां, पर सै लोक सै जे बलिदान कराँ ये; सै परमेशरा जो नीं पर बुरीआत्मा जो बलिदान कराँ ये कने हऊँ नीं चाहन्दा भई तुहें दुष्टात्मा रे सहभागी हो। 21 तुहें प्रभुये रे कटोरे कने बुरीआत्मा रे कटोरे दुईं चते नीं पी सकदे। तुहें प्रभुये री मेज बुरीआत्मां री मेज दुईं रे सहभागी नीं हुई सकदे। 22 क्या अहें प्रभुये जो गुस्सा दिलां ये? क्या अहें तिसते ताकतवर ये? सब किछ परमेशरा रिया महिमा खातर 23 “मिन्जो सब किछ करने री अनुमति हाई,” पर सब किछ फायदे रा निआं; “मिन्जो सब किछ करने री अनुमति हाई,” पर सब किछ उपयोगी नींआ। 24 हर किसी जो दुज्यां रिया भलाई रे खातर सोचणा चाहिन्दा बल्कि अपणे खातर नीं। 25 जो किछ कसाईयां ले बिकां, तिस्सो खाओ कने अन्तरात्मा रिया वजह ते किछ नीं पुछो। 26 काँह्भई “धरती कने तिसच जो किछ हया सै सारा प्रभुये राई हाया।” 27 कने जे अविश्वासियां चते कोई तुहौं निऊंदा देओ, कने तुहें जाणा चाओ, तां जो किछ तुहांरे सामणे रखया जाओ सैई खायों: कने अन्तरात्मा रिया वजह ते किछ नीं पुच्छयों। 28 पर जे कोई तुहांजो बोल्लो, “येत मूर्तिया जो बल़ि कित्तिरी चीज़ इ,” तां तिस दसणे औल़े रिया वजह ते कने अन्तरात्मा रिया वजह ते नीं खावा। 29 मेरा मतलब तेरे अन्तरात्मा रिया वजह ने नीं, पर दुज्जे रे रिया अन्तरात्मा रिया वजह नेआ। काँह्भई मेरी अजादी काँह दुज्यां रिया अन्तरात्मा रे जरिये परखी जाओ? 30 जे हऊँ धन्यवाद करीने खाणे च शामिल हुई सक्कां, तां तिस पर जे हऊँ धन्यवाद कराँ तिसरिया वजह ते मेरी बदनामी काँह हुआंईं? 31 इस खातर तुहें चाये खाओ, चाये पीओ, चाये जो किछ करो, सब किछ परमेशरा रिया महिमा रे खातर करा। 32 तुहें नां तां यहूदियां, नां यूनानियां, नां परमेशरा री कलीसिया रे खातर परेशानिया री वजह बणो। 33 तियां जे हऊँ बी सब्बीं गल्लां च सब्बीं जो खुश रखां, कने अपणा नीं पर बौहतां रे फायदे खातर कोशिश कराँ ताकि सै छुटकारा पाई सक्को। |
This work is licensed under Creative Commons Attribution-ShareAlike 4.0 License.