तितूस 3 - Korwa Bible

नपाय बुता एचेगोड ञवन

¹ ने तितूस, परधानकू अरू हातपातदारकूराः कता मनावकियानखन हँकूराः आड़रे दोहोन लगा अरू जमा नपाय बुता बुता लगा सपड़ावतोकू दोहोन लगा बिसवासी होड़कूम कता उहियारगोड ञवन।

² हँकू तोनोंगीग बदीरे ओपता बड़रा अलोकू कताय लगा अरू कड़ीग अड़ाःकेडखन सलसतते सुधिया होड़कू बड़ाँः लगा होंम कता उहियारगोड ञवन।

³ मड़ंगरे अबू बोको होड़कू अरू भगवानराः कता मेरबू मनाःआ, अडिगतोबू दोहोना अरू जमा बरानाः बेलूर ओंगोलकूनते बझावतोबू दोहोना। अबूराः जीव टेनसाहा अरू इराते पेरेगतो दोहोना, अबू एरंगवा इयाबू दोहोना अरू हिनइस-बिनइस होड़ेंगाबू।

⁴ मनदो अबूरीग सडावदार भगवान अबूय दुलारकेडबुःआ, अरूय मयावाडबुःआ।

⁵ अबूराः तोनोंगाः नपाय बुताते भगवान मेरेय सडावगडबू, मनदो अनँयग आँयग मयावाडबूखन आँयगराः सुद बिरुवा अबू जीवरे पेरेगकेडखन अबूराः कसूरे बुहालकेरा अरू नँवा जीवे एमेकेरा।

⁶ भगवान अबूरीग सडावदार ईसू मसीते आँयगराः सुद बिरुवा अबू लगा मिनी जीवकेडखने एमेकेरा,

⁷ अरू मयावाडबूखन बेगर गारबार होड़कूय बड़ाँवकेडबुःआ, जेमहा ओरो टुटीगनेना हना जीवराः असरा इया इतडदारकूबू बड़ाँः।

⁸ नाःआ कता सनाताय हवे। ईंग चहाःतना आम भल-भलाय अरू जमाकू नफा पवाः लगा इदा हना कताकून तिंगीड घड़ीनमे चेडकू, जेमहा भगवान एचेरेकू बिसवासकेरा हँकुःआ होड़कू नपाय नपाय बुता तिंगीड घड़ीनकू एचे हड़ाःगे।

⁹ मनदो अड़ा-चउकीकू रिमुःता हना बेलूर बड़रा अरू खुटीपहारराः सदाःआ कहड़ीकून अरू एहूदाकूराः नियम बदीरे कड़ीग अरू बेलूर बेलूर कता होड़ेंग अते आम तोरेम दोहोन। नाःआ इयाःआ बड़राकून बेगर लूर इदा अरू तोनोंगाः नफा ओरो होयानेना।

¹⁰ तोनोंगीग हिगार हटिंगीग होड़ इदान होले, मी बार तुरहा सेताव सोयमे। हना तयोमते हों हाँय हनन उड़ीय एचे दो, हाँय अते तोरेम दोहोन।

¹¹ आम सुसुदीतना हाँय आडतो इदानिया अरू कसूरगोड ञवानताय। हनालगा हाँय अनँयग आँयग लूर-नेवनते एरांगगुः ञवनताय।

टुटीग चेडतो अरू सलाम

¹² दो ईंग बेटा, आम एचेरे अरतिमास सहे तुकिकूस वार मेला, ररंगराः बेला ईंग गुदरावगे लगायिंग ओंगलेतना हना निकुपुलिस सहररे आमके तोनोंग इया वेनेग इदा।

¹³ हाँयग उकील जेनास अरू अपलोस सेनेन सेन मेला हँकिन लगा एएमे इदा हना जिनिसराः संघराम एमेगोड, जेमहा हँकिनराः सेन दूररे तोनोंग इयाःआ हुडिंग बगरा हँकिन लगा अलो होयाः।

¹⁴ ने तितूस, अबूरिकुःआ होड़कू नपाय बुता एचेगोड ञवन लगाम चेडकू, जेमहा जरूरइत मेला संघरा अवेवाकूकू अरू हँकुःआ होड़कूराः जीव सदाःआ ओरो होयानेना।

¹⁵ ईंग सुदा इदानकुःआ हँकुःआ जमा सउंगताकू आमकू सलामतना। अबू सुदाकू दुलारता हँकुःआ बिसवासी होड़कूम सलाम। भगवान अपे जमा होड़कूय मयावागोड ञवन।