रूमी 9 - Korwa Bible

भगवान अरू सुनावतो होड़कू

¹ ईंग ईसू मसीरीग हवे अरू सनाताय कता ईंग कतायतना। सुद बिरुवा अगुवाइवायिंतना। हनालगा ईंग जीव कतायतना, ईंग मेरिंग लबरातना, माःआन।

² अरू ईंगरिकुःआ जइत सगाकू, इसराएल होड़कू लगा ईंग जीव ओंगोल हदराः घड़ीन कुहकाःतना।

³ होया अवेन दो भगवान ईंग सती-सरापतिरिंगखन ईसू मसीतेयिंग एटाः जुवाः, जेमहा हँकुःआ होड़कू हों ईसू मसीराः दुलारकू सुदी अवे।

⁴ हँकुःआ इसराएल होड़कू भगवानरिकुःआ समुटावतो होड़कू हवे। हँकू एचेरे भगवान तुमिन मरंग इदानिया हना अनँयग एचे उदुःवातेडकुःआ। हाँय हँकू सुदा कता-जमकावतेडखन नियमकूने एमेवातेडकुःआ। हाँय हँकू करा इयाकू जागगेय हना बदीरेय चेडतेडकुःआ अरू हँकू मुरुक बगराय जबानवातेडकुःआ।

⁵ इबराहीम, इसहाक अरू एकूब हँकूरिकुःआ खुटिपरिया होड़कू हवे अरू जमाकूरीग भगवान ईसू मसी होड़राः सुरइत मुरइतरे, हँकूरीग नइड़-बाँस होड़तेय जनमावनेना। सगर सइट होड़कू हाँयकू जागगोड ञवन। आमीन!

⁶ दो अपे ओंगलेतना, इसराएल होड़कू बदीरे भगवान अनँयग जबाने टड़ाव एंडागोतेडा जा? बुरी। इसराएल होड़कू अते मुरुक होड़कू सतायरे भगवानरिकुःआ होड़कू कोवाकुःआ।

⁷ अरू हँकू इबराहीमरिकुःआ नइड़-बाँस होड़कू होयाकियान अते सतायरे हाँयरिकुःआ लइंकू ओरोकू बड़ाँवनेना। इबराहीमरिकुःआ मुरुक बगरा लइंकू दोहोना, मनदो भगवान हाँय एचेरेय कतातेरा, “आमरीग बेटा इनिसहाकते आमरिकुःआ नइड़-बाँस होड़कू बड़ाँःता।”

⁸ दो अबू नाःआबू सुदीयतना, इबराहीमरिकुःआ नइड़-बाँस होड़कू अते मुरुक होड़कू भगवानरिकुःआ लइंकू ना लवे। मनदो भगवानराः जबान इयाकू जनमावकिया हँकुःआ लइंकू सतायरे भगवानरिकुःआ लइंकू हवे।

⁹ भगवान इसहाक बदीरे इबराहीम एचेरेय जबानतेरा, “ईंग कलोम ननानाः महिना आम एचेरेयिंग कुदा वेगता, अरू हनमेला सराह एचेरे मी होड़ हेरेल होन होयाःता।”

¹⁰ हनाँय अबूरीग खुटिपरिया होड़ इसहाक दोहोना अरू हाँयरीग अइमी रिबका जवा लइंकिने जनमावतेरा।

^11-12 हँकिन जनमावगुः अते मनाड़ंग इसराएल होड़कूराः रिती-बिधी अते एनेटाः इया भगवान रिबका एचेरेय कतातेरा, “मरंगीग हेरेल होन हुडिंगीग हेरेल होनरीग सेवकिया होड़े बड़ाँःता।” नाःआ कताते अबू सुदीयता, भगवान तोनोंगीग होड़ नपाय सहे बेलूर बुताय बुताता, हनाते हाँय मेरेय सुनावगेयता। मनदो हाँय अनँयग ओंगोल इया होड़कूय सुनावकूता।

¹³ दो नाःआ कता, भगवानराः कागदरे ओजाःतो इदा, हनानाः उदुःतना, “ईंग एसाव अते बगरा, एकूबिंग दुलारतेरा।”

¹⁴ दो अबू कता अवेयताबू जा, भगवानराः फड़ियाव सताय कोवानेःआ, माःआन? कहियो ओरोबू कता अवेतेरा।

¹⁵ भगवान मोसेस एचेरे मड़ंगरेय कतातेरा हना कता अपे उहियारगेपे, “ईंग मयावाय लगायिंग ओंगलेता, हनायिंग मयावाता, अरू सोगावाय लगायिंग ओंगलेता, हनायिंग सोगावाता।”

¹⁶ होड़कूराः ओंगोल इया सहे हँकू सेसा-दूराता हना अते भगवान तोनोंगीग होड़ मेरेय मयावायता, मनदो हाँय अनँयग ओंगोलते होड़कूय मयावायता।

¹⁷ भगवानराः कागदरे भगवान मिसिरी राजा पिरोन एचेरेय कतायतना, “ईंग आम राजायिंग बड़ाँवकेडमेःआ, अरू ईंगराः जंगर आमिंग उदुःवारा जेमहा चउंदीसरिकुःआ जमा होड़कू ईंग जाग घड़ीनकू मान मरजइतगिंग।”

¹⁸ दो भगवान मयावा लगाय ओंगलेयता हनाँयग होड़े मयावाता, अरू भगवान जीव केटेगगे लगाय ओंगलेता हनाँयग होड़राः जीवे केटेगगोडता।

भगवानराः रीस अरू मया

¹⁹ दो अपे अते तोनोंगीग ईंग एचेरेय कतायता, “भगवान जमाकून अनँयग ओंगोल इयाय एचेयता दो अबू चिला लगाय बदीबूता अरू इये हाँयराः ओंगोल अते एटाः इयाय सलाव अवेनता?”

²⁰ दो आम मी होड़ होनोड़ हवे अरू आम भगवान सुदाम अड़ा-चउकी अवेनता जा? कहिसाः तुलात जिनिस तुलादार एचेरे नाःआ इया कता अवेयता जा, ईंग नाःआ इया चिला लगाम तुलागोतेडिंगा?

²¹ अरू मी होड़ कुंभार अनँयग ओंगोल इया गोलहात हासते ननपाय बुता लगा अरू सगर दिनराः बुता लगा भंडाकून तुला लगा हाँय एचेरे हातपात कोवानेःआ जा?

²² हनन इया भगवान हों इदानिया। हाँय एचेरे अनँयग ओंगोल इया एएचे लगा हातपात इदा। कसूरकेडखन डंडकू पवावकुःआ, हँकुःआ होड़कू एचेरे भगवान रीसकियानखन अनँयग जंगरे उदुः अवेकेःआ, मनदो हाँय हँकू एचेरे सहाव घड़ीने दोहोना,

²³ जेमहा हाँय मान मरजइतकू लगा मनाड़ंगतेय सपड़ाव दोहोतेडकुःआ हँकुःआ होड़कू हाँय तुमिन मरंग इदानिया, हनाय एचे सुदी अवेकू।

²⁴ दो अबू एहूदाकू सहे बेगर एहूदाकू दोहोन अते भगवान मनाड़ंगतेय ओंगोल दोहोकेडखन अबू जमा होड़कूय सुनावकेडबुःआ।

²⁵ भगवान अनँयगराः बड़रा कता होड़ होसेराः कागदरेय कतायतान इया, “ईंगरिकुःआ होड़कू मेरकू दोहोगान, हँकुःआ होड़कू ईंग राःकूता, ईंगरिकुःआ होड़कू, माःआन अरू ईंग मेरिंग दुलारगाडकुःआ, हँकुःआ होड़कू ईंग राःकूता, ईंगरिकुःआ दुलारतो होड़कू, माःआन।”

²⁶ अरू, “अपे ईंगरिकुःआ होड़कू ना लवे, माःआने कता उदुःतेरा हँकुःआ होड़कूकू राःकूता, अपे जीयत भगवानरिकुःआ लइंकू हवे, माःआन।”

²⁷ भगवानराः बड़रा कता होड़ एसयाह हों इसराएल होड़कू बदीरे हुमइसकेय कतातेरा, “इसराएलरिकुःआ होड़कू समुंदरराः बितील इयाकू बनागराबाः जुवाःतान हों, हनामिन अते अनादोम होड़कू बनसाःता।

²⁸ भगवान चउंदीसरिकुःआ जमा होड़कू एचेरे अनँयग कता इयाय एचेयता, अरू हाँय सतायते ओहेने फड़ियावकूता।”

²⁹ अरू ननानाः कता एसयाह मड़ंगरेय कतातेरा, “मरंग जंगरदार भगवान अबू लगा नइड़-बाँस होड़कू मेरेय बनसावकेकुः दो, अबू हों सोदोम सहर अरू अमोरा सहररिकुःआ होड़कू इयाबू लाय एंडा जुवाःकुःआ।”

इसराएल होड़कू भगवान एचेरे मेरकू बिसवासगाड

³⁰ दो नाःआ बदीरे चेले माःआनबू कताय? बेगर एहूदाकू भगवानराः ओंगोल इया बेगर गारबार होड़कू बड़ाँः लगा मेरकू कुरनिसगेःआ। मनदो हँकू बिसवासकेडखन भगवानराः ओंगोल इया बेगर गारबार होड़कूकू बड़ाँवयना।

³¹ अरू इसराएल होड़कू भगवानराः ओंगोल इया बेगर गारबार होड़कू बड़ाँः लगा मुरुककू कुरनिस सोतेडा, मनदो मेरकू बड़ाँव अवेगान।

³² चिला लगा नाःआ इया होयायना? इसराएल होड़कू भगवान एचेरे बिसवासकेडखन बेगर गारबार होड़कू बड़ाँः लगा मेरकू ओंगोलगाड, मनदो नियम मनाः लगाकू कुरनिसगे अते बेगर गारबार होड़कू बड़ाँः लगाकू ओंगोलतेड। हनालगा हँकुःआ इसराएल होड़कू, होड़कू एचे तामकूता हनानाः खुंटातेकू तोहोडयना,

³³ ईसू बदीरे भगवानराः कागदरे ओजाःतो इदा, “ईंगपे अयूम, होड़कू एचे तोहोडकूता हना खुंटा ईंग सियोनरेयिंग बीडगोडता, अरू हान होड़कू एचे तामगोडकूता। अरू हाँय एचेरेकू बिसवासगेता, हँकुःआ होड़कू कहियो ओरोकू गियूनेना।”