रूमी 7 - Korwa Bible

बियाह अते मीटोंग अउल-तउल कता

¹ दो ईंगरिकुःआ अजी बोपोहकूतिंग, अपे मोसेसराः नियमकूनपे सुसुदीतना। हनालगा अपे एचेरेयिंग कतायतना, तोनोंगीग होड़ जीयते दोहोन, हना वरी हाँय नियमकून इया सलाः पराःता।

² मीटोंग अउल-तउल कतायिंग कतायतना, तोनोंगीग बियाहतो अइमी अनँयग हेरेल जीयते दोहोन वरी, नियम इया हाँय सुदा जोड़ावतो इदानिया। मनदो हेरेलतो गोएग जुवाःतान दो हाँय एटाः होड़ सुदा सगइगुः लगा नियम अतेय उडुंग जुवाःता।

³ हेरेलतो जीयते दोहोन मेला हाँय एटाः होड़ सुदाय सगइगुःतान दो हाँय सनहीता। मनदो हेरेलतो गोएग जुवाःतान दो हाँय एटाः होड़ सुदा सगइगुः अते मेरेय सनहीता।

⁴ ईंगरिकुःआ अजी बोपोहकूतिंग, हनन इया अबू ईसू मसी सुदाबू गोएगनेना। हनालगा नुँहू अपे भगवान ननायगे लगा मोसेस एमेकेरा हना मड़ंगाः नियमकूनराः बोझारे कोवापेःआ। ईसू गोएगतो होड़कू अते भगवान जियाव रेमकिरिया, जेमहा अबू हाँय लगा नपाय बुताबू बुता अवेय। अरू नुँहू अबू नाँयग ईसूरिकुःआ होड़कू हवे।

⁵ मड़ंगरे अबू कसूर लूर-नेवनतेबू जियाःआ। नियम अहाबू एचे लगा उदुःवाबुःआ, हनानाः एचेगोड ञवन लगाबू चहाःआ। नाःआ अते अबू अरू बगराबू कसूरतेडखन गुजुःबू पवाःता।

⁶ मनदो ईसू मसी गोएगनेनते अबू एएचे पराःआ हना नियमराः बोझा अते भगवान अबूय सडावकेडबुःआ। हनाते अबूराः कसूर जीव टुटीगयना, जेमहा अबू ओजाःतो नियम इया कोवान, मनदो सुद बिरुवाराः ओंगोलते नँवा जीवते भगवानबू सेवा अवेय।

मोसेसराः नियम अबूराः कसूर एचे सुदीबूता

⁷ नुँहू अबू कता अवेयता जा नियमकून बेलूर इदा, माःआन? ओरोबू कता अवेतेरा। नियमकून अलो दोहोकुः दो, अबू कसूर बदीरे ओरोबू सुदीकेःआ। नियमकूनरे अलोपे ललचीःआ, माःआन मेर कताकेः दो अबू जीवराः ललची ओंगोलराः बदीरे अबू ओरोबू सुदी अवेकेःआ।

⁸ मोसेसराः नियम मेर दोहोकुः दो अबू कसूरराः बोझा ओरोबू सुदी अवेतेरा। ईंग मी होड़ कसूर होड़ हवे। हनालगा नियमकून कतायता, अलोपे ललचीःआ, हिनिनमिन ईंग जीवरे जमालेःआ ललचीते पेरेगयना।

⁹ मड़ंगरे ईंग मोसेसराः नियम बदीरे अनसिनहार दोहोन घड़ीनिंग जियाःआ। मनदो नियम ईंग सुदीकेड दो, ईंग कसूर बदीरे होयिंग सुदीबाःगोतेडा अरू ईंग भगवानराः ओंगोलरे गोएगतो होड़िंग बड़ाँवयना।

¹⁰ ईंग, जीव पवाः लगा दोहोना, हनानाः नियमिंग टड़ाव एंडाकेरा अरू हनानाः नियमतेयिंग गोएगयना।

¹¹ मोसेसराः नियम कतायतना, अलोपे एचे, माःआन। मनदो ईंग हनानाःयिंग एचेयता। अरू हनानाः कसूरते ईंग अडिगयना अरूयिंग गोएगनेना।

¹² हनते हों हना नियमकून सुद इदा अरू हुकुमकून जमा नपाय, सताय अरू सुद इदा।

¹³ नाःआ इया इदान दो, नपाय नियमते ईंग गोएगतो इयायिंग बड़ाँवयना जा? बुरी! ईंग जीवराः कसूर लूर-नेवनते नपाय नियम उपयोत घड़ीन गोएगतो होड़िंग बड़ाँवगोतेडा। हनानाः अते कसूर कनासूर हवे माःआन उदुःवाडबुःआ। अरू नियमतेबू सुदीगोतेड, अबूराः कसूर लूर-नेवन तुमिनाः बेनेलूर हवे, माःआन।

नियम मनाः लगा जीव बार बंटा जुवाःता

¹⁴ अबू सुसुदीतना मोसेसराः नियम भगवान अगीते इदा। मनदो ईंग मी होड़ होड़ हवे अरू ईंग कनासूरगोड ञवनता। हनाते ईंग कसूरगे लगा ईंग बेगारी होड़ इया इदानिंगा।

¹⁵ ईंग मेरिंग सुदीयतना ईंग चिलायिंग एचेयतना। नपाय एएचे लगा ईंग ओंगलेतना, हना ईंग मेरिंग एचे अवेयतना। मनदो ईंग एरंगवाता, हनानाःयिंग एचेगोड ञवनतना।

¹⁶ ईंग एएचेय लगा मेरिंग चहाःतना, हनानाः बेलूरिंग एएचेतना दो, ईंग मनेवातना, नियम ननपाय हवे, माःआन।

¹⁷ सतायरे ईंग इनिंग मेरिंग कसूरगेतना। मनदो ईंग जीवरे कसूर दोनोहो जुवाःता अरू हनानाः अते ईंग कनासूरगोड ञवनतना।

¹⁸ ईंग जीवरे तोनोंगाः नपाय कोवानेःआ अरू ईंगराः लूर-नेवन बेनेलूरयना। दो हना अते ईंग नपाय एएचे लगायिंग चहाःतना, हना ओनोरिंग एचे अवेतेरा।

¹⁹ नपाय लूर-नेवन इया एचेय लगायिंग ओंगलेतना, हनानाः ईंग मेरिंग एचे अवेयतना। मनदो ईंग जीवरे बेनेलूराः लूर-नेवन इदा, हनानाःतोयिंग एचेगोड ञवनतना।

²⁰ ईंग अरूयिंग कतायतना, ईंग इनिंग मेरिंग कसूरगेतना। मनदो ईंग जीवरे कसूर दोनोहो जुवाःता अरू हनानाःतेयिंग कनासूरगोड ञवनतना।

²¹ दो ईंगराः जीवरे ननन इया होयाःता। ईंग नपाय लूर-नेवनते नपाय एएचे लगायिंग ओंगलेतना। हनते हों बेनेलूर नेवन इया ईंग कसूरगेतना।

²² ईंगराः इनिंदरी इंदरीते भगवानराः नियमिंग एनेचेय लगा बनाहालतेयिंग दोहोनता।

²³ मनदो ईंग जीवरे एनेटाः इयाःआ लूर-नेवन इदा, अरू हना भगवानराः नियम अते एटाः इया इदा। हनानाः लूर-नेवनते ईंग जीव बार बंटाकियानखन, ईंग कसूरराः बेगारी होड़ इयायिंग कनासूरगोड ञवनता।

²⁴ ओहरे, दइया! ईंग अनाडतो होड़ इदानिंगा। दो नाःआ गुजुः इया देहते इये ईंगे सडावगींगता?

²⁵ हाव, अबूरीग परबू ईसू मसीते भगवान ईंगे सडावकिडिंगा। हनालगा ईंग भगवानिंग जागगेयता। दो ईंग इनिंगराः ओंगोलते भगवानराः नियम इया सलाः लगायिंग ओंगलेतना, मनदो ईंग बेलूर नेवन इयायिंग कनासूरगोड ञवनतना।