रूमी 6 - Korwa Bible

कसूर बदीरे गोएगतो, मसी सुदा जिनियत

¹ भगवान मयावाडबूखन अबूराः कसूरे बराव एंडाकेरा दो, भगवान अबू अरूय मयावाबू लगा अबू कनासूरगोड ञवनता जा?

² नाःआ इया कहियो ओरो होयानेना। अबू कसूर जीव जियाः लगाबू अड़ाः एंडागोतेडा दो, अरूबू कनासूरगोड ञवनता जा?

³ नाःआ कता अपे लिड़िंगोतेडापे जा, अबू बतिसमा गोःतेडखन ईसू मसी सुदाबू मिनीयना, दो अउल-तउल इया अबू हों हाँय सुदाबू गोएगयना।

⁴ अबू बतिसमाबू गोःतेड मेला हाँय सुदाबू गोएगनेना दो अबू हों हाँय सुदा तीलतो इया इदानबुःआ। अरू अपांग भगवान ईसू मसी गोएगतो होड़कू अते अनँयगराः अगामाः जंगरतेय जियाव रेमकिरिया, हनन इया अबू हों नँवा जीवबू जियाव अवेनता।

⁵ हनालगा अबू ईसू मसीराः गुजुःरे हाँय सुदाबू मिनीयान दो हाँय गोएगतो अतेय जियाव रेमकिया हनन इया हाँय सुदा अबू हों नँवा जीवबू जियाःता।

⁶ अबू मीटोंग कताबू सुसुदीतना, अबूराः जुना जीव ईसू सुदा कुरूसरे ठोंकाव गोएगतो इदा, जेमहा अबूराः कसूर जीव टुटीग जुवाः अरू अबू कसूरराः बोझारे कहियो अलोबू पराः।

⁷ तोनोंगीग कसूर बदीरे गोएगतो होड़ इया इदानिया दो हाँय कसूरराः बोझारे कहियो ओरोय परावनेना।

⁸ अबू ईसू मसी सुदाबू गोएगकियान दो अबू बिसवासगेतना, अबू हों हाँय सुदा जिनियतबू दोहोनता।

⁹ अबू नाःआ हों सुसुदीतनाबू, ईसू मसी गोएगतो होड़कू अतेय जियाव रेमकिया अरू कहियो ओरोय गोएगनेना। हाँय अरू गोजेय लगा तोनोंगाः जंगर कोवानेःआ।

¹⁰ हाँय मिनी तुरहा गोएगनेनखन कसूर अतेय एटाःयना अरू हाँय नुँहूय जियाःतना हना जीव हाँय भगवान लगाय जियाःतना।

¹¹ हनालगा अपे अँननपे अपे ओंगोलबाःकान, अले एचे कसूरलेःआ हना जंगर नुँहू अले ओरो एचे कसूर अवेतेडलेःआ अरू ईसू मसी एमेकेरा हना जीवते अबू भगवान लगाबू जियाःतना।

¹² दो अपे नाःआ चउंदीसरेपे दोहोन मेला अपेराः लूर-नेवन बेलूराः कसूर ओंगोल इया सलाः लगा अहापे एमेय।

¹³ अपेराः देह दगलीकून बेलूर ओंगोल इया कसूरगे लगा अहापे एमेय। अपे कसूरते गोएगतो इयापे दोहोना, मनदो नुँहू अपे नँवा जीवपे पवावकिया। हनालागा अपेराः देह दगलीकून नपाय बुता बुता लगा भगवान एचेरेपे जिमागोड।

¹⁴ अपे नियम इयापे सलाःआ हना अते भगवान अपे मेरेय सडावगाडपेःआ, मनदो हाँय अपेय मयावाडपेखने सडावकेडपेःआ। हनालगा अपे अँननपेराः जीव, बेलूराः कसूर ओंगोल इया अलोपे सलाव ओवा।

बेगर गारबार जीव लगा भगवान एचेरेपे जिमान

¹⁵ दो अपे ईंगपे उदुःवा। अबू नियमकून मनाः अते भगवान अबू मेरेय सडावगाडबुःआ, मनदो मयावाडबूखने सडावकेडबुःआ। दो अबू कनासूरगोड ञवन जा? कहियो ओरो।

¹⁶ अपे मेरपे सुदीयतना जा, तोनोंगीग होड़ मी होड़रीग बेगारी होड़े बड़ाँव जुवाःता, दो हाँय आँयगरीग मालिकराः जमा कताकून मनाः पराःता? हनन इया कसूर बदीरे हों होयाःता। अपे कसूरगे लगा अँननपेराः जीवपे जिमागोड, दो अपे गोएग जुवाःता। मनदो भगवानराः ओंगोल इया सलाः लगा अँननपेराः जीवपे जिमागोड दो, अपे बेगर गारबार होड़कूपे बड़ाँव जुवाःता।

¹⁷ अपे मड़ंगरे कनासूर कसूररेपे दोहोना। मनदो नुँहू अपेकू चेडतेरा हनन इया अपे मिनी जीवकियानखनपे मनाःतना। हनालगा ईंग भगवानिंग धनियाबादगेयतना।

¹⁸ अपे कसूर जीव जियाः लगापे अड़ाः एंडागोतेडा अरू बेगर गारबार जीव जियाः लगापे जिमायना।

¹⁹ अपे ओहेनपे बुझाव अवेन लगा ईंग मीटोंग बड़रायिंग ककतातना। मड़ंगरे अपे अँननपेराः देह दगलीकून कसूर अरू बेनेलूर बुताकून एचेय लगापे जिमातेरा। दो नुँहू अपे हनन इया अपेराः देह दगलीकून, नपाय बुता एचेय लगा अरू अपेराः जीव सुद होयाः लगा, भगवान एचेरेपे जिमा एंडागोड।

²⁰ मड़ंगरे अपे कसूरगोड ञवना। हनमेला भगवानराः ओंगोल इया सलाः लगा मेरपे चाहावगान।

²¹ मनदो हनारे अपे जीवरे चिला नफापे पवाःआ? कही कोवान। अपे मड़ंगरेपे एचेया, अरू अपेराः जीव लाय एंडागोडता, हनानाः कताकूनपे उहियारगेतान दो, अपेके गियुः लगाःता।

²² मनदो अपेराः कसूर जीव टुटीगयना अरू भगवानरिकुःआ बेगारी होड़कूपे बड़ाँवयना। नुँहू अपे सुद होड़कू बड़ाँवकियानखन ओरो टुटीगनेना हना जीवपे पवाःता।

²³ कसूरराः बनी दो गुनुजुः हवे। मनदो अबूरीग परबू ईसू मसीते अबू लगा भगवानराः दहिन ओरो टुटीगनेना हना जीव हवे।