रूमी 4 - Korwa Bible

इबराहीमराः बिसवास

¹ ननन इया हवे दो अबूरीग खुटिपरिया होड़ इबराहीमराः बिसवास बदीरे अबू चेले माःआनबू कताय?

² इबराहीमराः नपाय बुताते भगवान हाँय फड़ियावतो होड़े बड़ाँवकेः दो हाँय बड़वार अवेकुःआय। मनदो भगवान मड़ंगरे हाँय तोनोंग इया मेरेय बड़वार अवेगान।

³ भगवानराः कागदरे नाःआ इया ओजाःतो इदा; “इबराहीम भगवान एचेरेय बिसवासतेरा, हनालगा भगवान अनँयग ओंगोलरे हाँय बेगर गारबार होड़े ओंगोलबाःकातेरिया।”

⁴ तोनोंगीग होड़राः बुता बनी, इमान इया मेरकू एमेवायता। मनदो बुतातेराय हनाते हाँय हना बनीय पवाःता।

⁵ मनदो अपे तोनोंगाः एचेकेडखन भगवान ओरोपे एचे मने अवेतेडिया। भगवान एचेरे कसूर होड़कू बिसवासगेता, अरू हनानाः एकलाते हाँय हँकूय मनेवाता।

⁶ दाऊद राजा हों ननन इयाय कतातेरा, तोनोंगीग होड़ भगवान मनेवा लगा तोनोंगाः नपाय बुता मेरेय एचेता हों भगवान हाँय बेगर गारबारीग होड़े कतावायता, दो हनाँयग होड़राः जीव-जहन ननपाय दोहोनता। हाँय भगवानराः कागदरेय ओजाःतेरा,

⁷ “परबू गारबारे बराव एंडाकेरा अरू कसूरे चलाः एंडागोतेडा, हनाँयग होड़राः जीव-जहन नपाय दोहोनता।

⁸ परबू तोनोंगीग होड़राः कसूर अनँयग जीवरे मेरेय दोहोगेता, हनाँयग होड़राः जीव-जहन नपाय दोहोनता।”

⁹ अपे ईंगपे अयूम। इयेराः जीव-जहन नपाय दोहोनता? खतनात इदानकुःआ हँकुःआ एहूदाकूराः जीव-जहन एकला जा बेगर एहूदाकूराः हों नपाय दोहोनता? ईंग मड़ंगरेयिंग कतातेरा, इबराहीम भगवान एचेरेय बिसवासतेरा, हनालगा हाँय बेगर गारबार होड़े बड़ाँवनेना।

¹⁰ दो नाँय बेगर गारबारीग होड़ तुमिसे बड़ाँवनेना, खतनानेनाय हनाते मड़ंग जा तयोमरे? हाँय खतनानेना हनाते मनाड़ंग बेगर गारबारीग होड़े बड़ाँवनेना।

¹¹ इबराहीम खतनानते मनाड़ंग भगवान एचेरेय बिसवासतेरा। हनालगा हाँय भगवानराः ओंगोलरे बेगर गारबार होड़े बड़ाँवनेना अरू अनँयगराः देहरे मीटोंग चिनहा इयाय खतनानेना। बेगर खतनाते हों भगवान एचेरेकू बिसवासकेडखन भगवानराः ओंगोलरे बेगर गारबार होड़कूकू बड़ाँःता हँकुःआ होड़कूरीग खुटिपरिया होड़ इबराहीम बड़ाँवकिया।

¹² अरू खतनानेन अते मड़ंग इबराहीम भगवान एचेरेय बिसवासतेरा। हनन इया खतनात होड़कू होंकू भगवान एचेरेकू बिसवासगेता दो हँकू हों हाँयरिकुःआ नइड़-बाँस होड़कूकू बड़ाँव जुवाःता।

भगवानराः जबानकून बिसवासतेबू पवाःता

¹³ भगवान इबराहीम अरू हाँयरिकुःआ नइड़-बाँस होड़कू एचेरेय जबानतेरा, अपे नाःआ चउंदीसरिकुःआ इताडदारकूपे बड़ाँःता, माःआन। दो इबराहीम भगवानराः नियमकूने मनाः अते कोवान, मनदो हाँय भगवान एचेरे बिसवासतेडखन बेगर गारबाररीग होड़े बड़ाँवनेना, अरू हनानाः अते भगवानराः जबाने पवावकिया।

¹⁴ दो होड़कू नियमकून मनावकेडखन इताडदारकू बड़ाँःता दो, भगवान एचेरे बिसवासगेय लगा कोवानेःआ, अरू भगवानराः जबान हों सदाःआ होयाःता।

¹⁵ होड़कू भगवानराः नियमकून जमालेःआ मेरकू मनाव अवेनतान अते भगवान डंडियावकूताय। मनदो नियमकून मेर दोहोन दो नियमकून टड़ावराः कता करा इया दोहोकुःआ?

¹⁶ दो नियम इया सलाः लगाकू कुरनिसगेता हँकुःआ होड़कू कोवान, मनदो इबराहीम इया भगवान एचेरेकू बिसवासगेता हँकुःआ होड़कू भगवानराः जबानकू पवाःता। नाःआ जबान भगवान एचेरे बिसवासगे अते इमान इया इबराहीमरिकुःआ जमा नइड़-बाँस होड़कू होंकू पवाःता।

¹⁷ भगवानराः कागदरे इबराहीम बदीरे ओजाःतो इदा, “ईंग आम मुरुक बगरा जइत होड़कूरीग अपांगिंग बड़ाँवकेडमेःआ।” हनन इया हाँय अबू जमा बिसवासी होड़कूरीग अपांग हवे। अरू हाँय, गोएगतो होड़कूय जियाव रेमकूता अरू बनाड़रा बड़राते तोनोंग मेर दोहोगान अते जमाकूने होनोयागोडता हाँयग भगवान एचेरेय बिसवासकेरा।

¹⁸ भगवान इबराहीम एचेरेय कतातेरा, “आमरिकुःआ नइड़-बाँस होड़कू तोनोंगीग ओरोकू गँड़ाव अवेतेडकुःआ, हनामिनकू बगरा जुवाःता।” हनमेला हाँय एचेरे असरागे लगा कहिसाः मेर दोहोगान। हनते हों इबराहीम भगवान एचेरे असरानेनखने बिसवासतेरा।

¹⁹ हनमेला इबराहीमराः उमइर सव बरिस दोहोना। अरू हाँय सुसुदीःआ, ईंग दो लँइग होयाः जुकूर हों कोनोवायिंगा अरू ईंगरीग अइमी सराह हों बहिली इदानिया, माःआन। मनदो हनारे हों हाँय भगवान एचेरे असरा घड़ीने बिनिसवासगोड ञवना।

²⁰ भगवानराः जबान बदीरे हाँयराः बिसवास गुनमिन हों मेर हुडिंग बगरागान। मनदो हाँय भगवान जाग घड़ीन बिसवासरेय बड़ियाड़यान।

²¹ हाँय सुनुदीबाःकातेरा, ईंग एचेरेय जबानकेरा हाँयग भगवान, हना जबान एचे पुरावगे लगा जंगरदार इदानिया, माःआन।

²² दो हाँयराः नाःआ बिसवासते भगवान हाँय बेगर गारबार होड़े ओंगोलबाःकातेरिया।

²³ भगवान इबराहीम बेगर गारबारीग होड़े ओंगोल दोहोबाःकातेडिया। हना, भगवानराः कागदरे ओजाःतो इदा अरू हना हाँयग इबराहीम एकला लगा कोवान, मनदो अबू लगा हों ओजाःतो इदा।

²⁴ परबू ईसू गोएगतो होड़कू अते भगवान जियाव रेमकिडिया माःआनबू बिसवासगेता दो, भगवान अबू बेगर गारबार होड़कूय ओंगोल दोहोबाःकाबूता।

²⁵ ईसू मसी अबूराः कसूर बदलारे गुजुः लगा अनँयग आँयग जिमायान अरू भगवान अबू एचे मनावबू लगा ईसू मसी गोएगतो होड़कू अतेय जियाव रेमकिडिया।