रूमी 3 - Korwa Bible

¹ दो अपे अते तोनोंगीग एहूदा होड़ होंबरेता, “ईंग एहूदा होड़ हवे दो हनारे तोनोंगाः नफा इदा जा कोवान अरू खतनाकियायिंग अते तोनोंग मतलोब कोवानेःआ जा?”

² मनदो ईंग कतायतना, सतायरे एहूदा होड़ बड़ाँः अते मुरुक नफा इदा। मइद कता नाःआ हवे, भगवानराः सरवन मनाड़ंगरे अपे अयूमतेरा।

³ मनदो अदोम एहूदाकू भगवानराः कता मेरकू बिसवासगाड, दो आम ईंगमे कतावातना, “भगवान आँयगराः जबान इया मेरेय एचेगरा जा?”

⁴ नाःआ इया कहियो ओरो होयानेना। जमा होड़कू लबराकू बड़ाँव जुवाःता हों, भगवानराः कागदरे ओजाःतो इदा हनन इया, हाँय सनाताये दोहोनता। “ने परबू, आमराः जमा कताकून सनाताय इदा, अरू होड़कू आमकू फड़ियाव हों आम जितावबाः जुवाःताम।”

⁵ मनदो अदोम होड़कू कतायता, अलेराः कसूरते होड़कू सुदीगोडता भगवान तुमिन नपाय इदानिया, माःआन। दो नाःआ कता बदीरे चेले माःआनबू कताय? होड़कू अँनकूराः ओंगोल इयाकू कता अवेयता, हाँय अलेराः कसूर बदलारेय डंडियावले दो हाँयराः फड़ियाव सताय कोवानेःआ, माःआन। (ईंग होड़कूराः ओंगोल इयायिंग कतायतना।)

⁶ नाःआ इया तोनोंगीग कहियो ओरोय कता अवेतेरा। एहूदाकू बदीरे भगवानराः फड़ियाव सताय कोवानेःआ दो हाँय करा इया चउंदीसरिकुःआ एटाः होड़कूय फड़ियाव अवेता?

⁷ दो एटाः होड़कू कतायता, अलेराः लबरा लूर-नेवनते होड़कू सुदीगोडता भगवान तुमिन सताय इदानिया अरू नाःआते भगवानके अरू मान मरजइत होयाःता दो, चिला लगा भगवान अलेराः कसूर लगा अलेय डंडियावता, माःआन।

⁸ नाःआ इयाकुःआ होड़कू कतायता, अबूराः कसूर अते नपाय होयाःतना दो, अबू कनासूरगोड ञवनताबू, माःआन। अरू अले बदीरे हों होड़कू कतायता, नँकू हों नाःआ इया होड़कूकू चेडता, माःआन। मनदो नाःआ इयाकू कतायता, हँकुःआ होड़कू डंडकू पनावाःता।

जमा होड़कू कसूर होड़कू हवे

⁹ दो नाःआ बदीरे चेले माःआनबू कता अवेयता? अले एहूदाकू एटाः होड़कू अते ननपाय इदानलेःआ जा? बुरी, कोनोवालेःआ। ईंग मड़ंगरेयिंग कता उदुःकेरा, एहूदाकू अरू बेगर एहूदाकू जमाकू कसूररे इदानबुःआ।

¹⁰ भगवानराः कागदरे ओजाःतो इदा, “तोनोंगीग नपाय कोवाया, मी होड़ीग हों कोवाया।

¹¹ तोनोंगीग बुझाः होड़ कोवाया, भगवान ञामीग होड़ तोनोंगीग कोवाया।

¹² जमाकू भगवानकू अड़ाः एंडागोतेडिया, अरू जनामाकू बेनेलूरकू होयायना। तोनोंगीग नपाय बुता बुता होड़ कोवाया, मी होड़ीग हों कोनोवाया।”

¹³ “गलेग अमिंगतो मड़गटराः सोःओ सिड़ीग इया हँकूराः बड़रा इदा, अरू हँकूराः आह लबराते पेरेगतो इदा। महुरा बींग बीके हतायता हनन इया हँकूराः बड़रा दोहोनता,

¹⁴ हटी अरू सती-सरापतो बड़राते हँकूराः आह पेरेगतो इदा।”

¹⁵ “हँकू तोनोंगीग ञेड एंडा लगा सनपड़ावतोकू दोहोनता,

¹⁶ अरू हँकूराः दूररे गुजुः अरू गराह-गिराह दोहोनता,

¹⁷ अरू हँकू सलसतिया जीव मेरकू सुदीयतना।”

¹⁸ “हँकूराः जीवरे भगवान बदीरे गुनमिन हों तोनोंगाः बोर कोवानेःआ।”

¹⁹ मनदो अबू सुसुदीतना, नियमराः आड़रे इदानकुःआ हँकुःआ होड़कू हनानाः नियम इया सनालाः पराःता। दो चउंदीसरिकुःआ होड़कूय फड़ियावकूता हाँयग भगवानराः ओंगोलरे जमा होड़कू गारबारकेरा। हनालगा तोनोंगीग भगवान एचेरे ओरोकू कता अवेतेरा, ईंग तोनोंगाः कसूर मेरिंग कसूरगरा, माःआन।

²⁰ दो तोनोंगीग होड़ नियम मनाः लगा कुरनिसगे अते भगवानराः ओंगोलरे बेगर गारबारीग होड़ ओरोय बड़ाँवनेना मनदो नियमते अबू सुदीगोडता, अबू कसूर होड़कू इदानबुःआ, माःआन।

बिसवासते बेगर गारबार होड़कूबू बड़ाँःता

²¹ मनदो नुँहू भगवान आँयगराः ओंगोल इया बेगर गारबार होड़कूय बड़ाँवबू लगा, अनँयगराः दूर अबूय एचे उदुःवाता। अरू ननानाः कताकून भगवानराः बड़रा कता होड़कूराः कगदकूनरे अरू मोसेसराः नियमकूनरे हों उदुःवाबूता। मनदो अबू हना नियमकून मनाः लगाबू कुरनिसगे अते, बेगर गारबार होड़कू ओरोबू बड़ाँवनेना।

²² अरू ईसू मसी एचेरेकू बिसवासगेता हँकुःआ जमा होड़कू भगवान बेगर पाचपटीते आँयगराः ओंगोल इया बेगर गारबार होड़कूय बड़ाँवकूता।

²³ जनामा होड़कू कसूरकेरा, अरू भगवानराः ओंगोल इयाःआ मान मरजइत जीव, मेरकू जियाव अवेनता।

²⁴ मनदो भगवान ईसू मसीते अबूय सडावकेडबुःआ अरू आँयगराः ओंगोलरे फड़ियावतो होड़कूय बड़ाँवकेडबुःआ। नाःआ इयाबू बड़ाँः लगा अबू तोनोंगाः एएचे लगा मेर दोहोगान, मनदो हाँय मयावाडबूखन नाःआ इयाय एचेकेरा।

²⁵ भगवान अबूराः कसूर बदलारे ईसूय डंडियावतेरा, अरू ईसू कुरूसरे गोएगनेनखन अबू लगा अनँयग बलंगीय तूतेरा। अरू ईसू एचेरेकू बिसवासगेता, हँकुःआ होड़कू भगवान बेगर गारबार होड़कू हवे माःआने कतावाकूता। होड़कू मड़ंगरेकू एचेतेरा हना कसूरकून सहाव घड़ीन भगवान मेरेय डंडियावगडकू।

²⁶ अरू मनाड़ंग वरीते भगवान अनँयगराः फड़ियाव सताय हवे माःआने एचे उदुःवाडबुःआ। अरू नुँहू हों ईसू एचेरेकू बिसवासगेता हँकुःआ होड़कू फड़ियावतो होड़कू हवे माःआने मनेवाबूता।

²⁷ दो भगवान अबूय मनेवा लगा तोनोंगाःबू एचेकेरा, माःआन अबू बड़वार अवेनता जा? तोनोंग इया कोवान। ईसू मसी एचेरेबू बिसवासकेरा, हनालगा हाँय अबूय मनेवाता।

²⁸ अबू नियम मनाः अते कोवान, मनदो ईसू मसी एचेरे बिसवासकेडखन भगवानराः ओंगोल इया फड़ियावतो होड़कूबू बड़ाँःता।

²⁹ भगवान एकला एहूदाकूरीग भगवान हवे जा? अरू बेगर एहूदाकूरीग भगवान ना लवे जा? हाव, हाँय जनामा होड़कूरीग भगवान हवे।

³⁰ मिनीटोंग भगवान इदानिया। अरू ईसू एचेरेकू बिसवासगेयता हँकुःआ जमा होड़कू, एहूदाकू सहे बेगर एहूदाकू अनँयग ओंगोलरे फड़ियावतो होड़कूय बड़ाँवकूता।

³¹ दो अबूराः बिसवास अते नियम सदाःआ होया जुवाःता जा? कोनोवानेःआ। बिनिसवासते अबू जमालेःआ नियमकूनबू एचे पुराव अवेता।