रूमी 2 - Korwa Bible

भगवानराः सताय फड़ियाव

¹ ने सउंगता, आम सहे तोनोंगीग दोहोन, आम एटाः होड़कू बदीकेडखनमे फड़ियावकू दो हना बदीरे आम अनम बनसाः लगा कहिसाः ओरोम कता अवेतेरा। आम एटाःकूम बदीता, हनानाः कतारे आम होंम कसूरगेतना। हनालगा आम अनमरीग फड़ियावदारमे बड़ाँःता।

² अबू सुसुदीतना नाःआ इयाकू एचेयता हँकुःआ होड़कू भगवान सतायतेय फड़ियावकूता।

³ ने सउंगता, भगवान हँकुःआ होड़कूय फनड़ियावकूता, मनदो आम ओंगलेतना, ननन इया बुता ईंग एचेय दो भगवान ईंग ओरोय डंडियावतिरिंगा, माःआन। दो आमराः ओंगोल इया भगवानराः डंडियावतेम बनसाव जुवाःता जा?

⁴ भगवान आम सहाव घड़ीने मयावामतना दो हना आम हुनुडिंगमे ओंगलेतना जा? भगवान ईंग मयावाडखन ईंगराः कसूर अते जीव कुदागे लगा दोंगे ओवायिंगतना, माःआन आम मेरेम बुझाःता जा?

⁵ आमराः जीव केटेगयना, अरू कसूर अते भगवान अगी जीव कुदागे लगा मेरेम चहाःतना। हनालगा भगवान सतायते जमा होड़कूय फड़ियावता हना दिन, हाँय आम सुदा मुरुके रीस जुवाःता अरू हाँय अते अरू बगरा डंडियावमे पवाःता।

⁶ अरू भगवान जमा होड़कू अँननकूराः बुता इया फड़ियावकेडकूखन इमान सहे डंडियाव बदलाय एमेवाकूता।

⁷ तोनोंग तोनोंग होड़कू सहाव घड़ीन नपाय बुताकू बुतागोड ञवनता। हँकुःआ होड़कू भगवान अगीते मान मरजइत अरू मेर गुजुःता हना देह पवाः लगाकू चहाःतना। हँकुःआ होड़कू लगा भगवान ओरो टुटीगनेना हना जीवे एमेवाकूता।

⁸ मनदो अदोम होड़कू अँननकूराः नफा लगाकू ञामता। हँकू सताय कता अड़ाःकेडखन बेलूर कताकू मनाःता। अरू हँकुःआ होड़कू एचेरे भगवानराः रीस रंजाव जुवाःता।

⁹ बेलूर बुताकूनकू एचेयता हँकुःआ जमा होड़कूराः जीवरे गराह-गिराह अरू कटसिया होयाःता। नाःआ कटसिया मड़ंगरे एहूदाकू लगा अरू हना तयोमरे बेगर एहूदाकू लगा हों होयाःता।

¹⁰ मनदो नपाय बुताकू बुता ञवनतना, हँकुःआ होड़कू लगा भगवान मान मरजइत, सलसत अरू ओरो टुटीगनेना हना जीवे एनेमेवाकूता। नाःआ नपाय जीव-जहन मड़ंगरे एहूदाकू लगा अरू हना तयोमरे बेगर एहूदाकू लगा भगवान एमेवाकूता।

¹¹ अरू भगवान तोनोंगीग मेरेय पाचपटीयता।

¹² हनालगा मोसेसराः नियमराः आड़रे कोवाकुःआ, हँकुःआ बेगर एहूदाकू कसूरगे दो गोनेग जुवाःताकू। मनदो भगवान हँकू हना नियम इया मेरेय फड़ियावकूता। अरू मोसेसराः नियमराः आड़रे इदानकुःआ, हँकुःआ एहूदाकू कसूरगे दो, भगवान हनानाः नियम इयाय फड़ियावकूता।

¹³ नियमकून एकलाय अयुमेता हाँयग होड़ भगवानराः ओंगोलरे बेगर गारबारीग होड़ मेरेय बड़ाँःता। मनदो हना नियम इयाय सलाःता, हनाँयग होड़ भगवान बेगर गारबार होड़ माःआने कतावायता।

¹⁴ बेगर एहूदाकू एचेरे मोसेसराः नियमकून कोवानेःआ। मनदो हँकू हना नियमकून इयाकू सलाः दो नियमकून हँकूराः इंदरीरे दोहोत इया इदा।

¹⁵ हँकू उदुःगेता, मोसेसराः नियम अलेराः जीवरे दोहोत इदा अरू अलेराः इंदरी अरू ओंगोल हिदइत उदुःगेता, अले नपाय सहे बेलूर बुताकूनले एचेयता जा, माःआन।

¹⁶ ईंग अपे एचेरे सरवनिंग कता उदुःतेरा हनन इया फड़ियावराः हना दिनरे, भगवान ईसू मसीते, जमा होड़कूराः जीवरे इदा, हना ओकोत कताकूने फड़ियावता।

एहूदाकूराः नियम बदीरे

¹⁷ अपे अते तोनोंगीग होड़ ओंगलुःता, ईंग भगवानरीग होड़ हवे, अरू नियमरेयिंग भरसाता हाँयग एहूदा होड़ हवे,

¹⁸ अरू भगवानराः ओंगोल सुदीवाडखन नियमकून चेडकियानखन ननपाय कताकूनरे मंजूरिंग दोहोनता, माःआन।

¹⁹ अरू आम अनम एचेरे भरसाकेडखनमे कतायतना, ईंग अंधा होड़कूरीग अगुवा होड़ अरू कसूरराः अंदरारे इदानकुःआ हँकुःआ होड़कू लगा मरसल दूरिंग उदुःवाकूता।

²⁰ अरू बोया होड़कूरीग अरू लइंकूरीग चेडदार इनिंग हवे। मोसेसराः नियममे पवावकिया अरूम ओंगोलबाःकता, हना नियमराः कनहून अरू सताय ईंग जमालेःआयिंग सुदीतना, माःआन।

²¹ मनदो आम एटाः होड़कूम चेडकूता दो अनम मेरेम चिडुःता जा? आम एटाः होड़कू एचेरे, अहापे इनिगगे, माःआनमे चेडकूता अरू आम अनम इनिग होड़ हवे।

²² आम एटाःकू एचेरेम कतायता, अहापे सनहा-सनही, अरू आम अनम सनहा इदानमेःआ। आम मुरतीकूनमे एरांगवाता, मनदो अनम मंदिरराः जिनिसकूनमे इनिगता।

²³ आम, नियमिंग सुदीतना, माःआनमे बड़वारता। मनदो अनम नियमकून टड़ावकेडखन होड़कू एचेरे भगवानमे एचे बेग-हतावायता।

²⁴ नाःआ अते भगवानराः कागदरे ओजाःतो इदा, “आम अते बेगर एहूदाकू भगवानकू ओपतातना,” अरू हनन इया होयाःतना।

²⁵ आम मी होड़ एहूदा होड़ मोसेसराः नियम इयाम सलाः दो, खतनाराः रिती-बिधीते आमके नफा इदा। मनदो आम नियम इया मेरेम सलाः दो, आम मेरेय खतनागना हनाँयग बेगर एहूदा होड़ अते नपाय कोनोवामेःआ।

²⁶ मनदो मी होड़ बेगर एहूदा होड़ भगवानराः नियम इयाय सलाः दो, हाँय बेगर खतनात होड़ होयाकियान अते हों, भगवान हाँयग होड़ बेगर गारबार होड़ माःआने ओंगोल दोहोबाःकायता।

²⁷ आम नियममे पवावनेना अरू खतनाकियानखन नियम इया मेरेम सलाःतना। मनदो तोनोंगीग होड़ बेगर खतनात इदानिया अरू नियम इयाय सलाः दो, हाँयग होड़ आम बदीकेडखन ओरोय फड़ियावतेडमेःआ जा?

²⁸ एहूदाकूराः नइड़-बाँसते जनमावतो होड़ सहे देहरे खतनात होड़ सतायरे एहूदा होड़ मेरेय बड़ाँःता।

²⁹ मनदो भगवानराः ओंगोल इया नपाय जीव इदा, हनाँयग होड़ सतायते एहूदा होड़े दोहोनता। ओजाःतो सरवन इया जीव-धार गेड अते सताय खतना मेर होयाःता, मनदो जीव अते बेलूर कताकून भगवानराः सुद बिरुवा चलाः एंडागोडता दो, हनानाः हवे सताय खतना। नाःआ इयायीग होड़ होड़कू अगीते कोवान, मनदो भगवान अगीते मान मरजइते पवाःता।