रूमी 15 - Korwa Bible

एटाःकू ननायकू लगा ओंगोल दोहोगेपे

¹ ईंगरिकुःआ अजी बोपोहकूतिंग, अबू बिसवासरे बड़ियाड़ इदानबुःआ। हनालगा अबू अँननबू अबू अलोबू ननायगुः। मनदो बिसवासरे अबड़कू दोहोनता हँकुःआ होड़कू, सहाव घड़ीन संघरावाकू लगा इदा।

² अबू जमा बिसवासी होड़कूराः जीवरे नफा होयाः लगा अबू एटाः होड़कूबू ननाय लगा इदा, जेमहा अबू जमाकू बिसवासरेबू बड़ियाड़ जुवाः।

³ ईसू मसी हों अनँयग ननायगुः लगा तोनोंगाः मेरेय एचेगाड, अरू नाःआ बदीरे भगवानराः कागदरे ओजाःतो इदा, “ने भगवान, होड़कू आमकू एरांगवाता दो ईंग होंकू एरंगवायिंगता।”

⁴ भगवानराः कागदरे मनाड़ंगते ओजाःतो इदा हना कताकून अँननबू चिडुः लगाकू ओजाःकेरा। हना सरवनते अबू सहाव घड़ीन बहालतेबू दोहो अवेनता। अरू हनालगा अबू भगवान एचेरेबू असरा अवेयता।

⁵ अबूय कता-बहालगोड ञवनता अरू सहाव घड़ीने दोहोवाबूता हाँयग भगवान एचेरेयिंग अरजीतना, जेमहा अबू ईसू मसीराः ओंगोल इया हेल-मेलरेबू दोहो ञवन।

⁶ नाःआते अबू जमाकू मिनी जीवकियानखन अबूरीग परबू ईसू मसीरीग अपांग भगवानबू जाग अवेयता।

जमा जइत होड़कू लगा भगवानराः नपाय सरवन

⁷ हनालगा ईसू मसी अबूय मनेवारा, हनन इया अबू अँननबू अबू मनेवा होड़ेंग। अरू नाःआते भगवानराः मान मरजइत होयाःता।

⁸ अपे ईंगपे अयूम! भगवान इसराएल होड़कूरिकुःआ खुटिपरिया होड़कू एचेरेय जबानतेरा, हना पुरावगे लगा ईसू मसी एहूदाकूरीग सेवादारे बड़ाँवनेना,

⁹ अरू भगवान बेगर एहूदाकू होंय मयावाकू अते हँकू हाँयकू जाग अवेय। नाःआ कता बदीरे भगवानराः कागदरे ओजाःतो इदा, “हनालगा ईंग जमा जइत होड़कू तलारे आमराः ञाविंग जगावता, अरू आम लगायिंग सेरेंगता।”

¹⁰ अरू एटाःरे ओजाःतो इदा, “ने बेगर एहूदाकू, अपे भगवानरिकुःआ होड़कू सुदापे बहालगुः!”

¹¹ अरू मी तुरहाय ओजाःकेरा, “ने बेगर एहूदाकू, अपे परबूपे जाग, अरू जमा जइत होड़कू, हाँयपे जाग।”

¹² अरू एटाःरे एसयाह ओजाःकेरा, “एसेरीग नइड़-बाँस अते मी होड़ जनमावगुःता, हाँय बेगर एहूदाकूरीग राजाय बड़ाँःता, अरू हँकू हाँय एचेरेकू असराता।”

¹³ दो ईंगरिकुःआ अजी बोपोहकूतिंग, अपे ईसू मसी एचेरेपे बिसवासकेरा। हना अते अबू नाःआ असराय ओवाडबुःआ हाँयग भगवान, अपेराः जीव सलसतते अरू बहालतेय पेरेगगोड लगायिंग अरजीतना, जेमहा अपे सुद बिरुवाराः जंगरते हना असरारेपे बडे जुवाः।

पउलूस बेगर एहूदाकूरीग सेवादार

¹⁴ ने अजी बोपोहकूतिंग, ईंग इनिंग अपे बदीरेयिंग सुसुदीतना, अपे सतायरे नपाय होड़कू इदानपेःआ अरू भगवानराः कताकून नपायतेपे सुसुदीतना अरू अँननपे अपे चेड होड़ेंग अवेनता।

¹⁵ मनदो ईंग डीड़कियानखन तोनोंगाः कताकून एचे उहियाहपे लगायिंग ओजाःगेतना। भगवान मयावाडिंगखन,

¹⁶ बेगर एहूदाकू लगा ईसू मसीरीग मूक चेलाय बड़ाँवकिडिंगा अरू ईंग मी होड़ पुजउरी होड़ इया भगवानराः नपाय सरवनिंग परसार उदुःगेतना, जेमहा हँकू भगवान ननायगुः लगा सुद बिरुवाते सुदकेडकूखन बलिदान इयायिंग जिमा अवेकू।

¹⁷ अरू ईंग ईसू मसी अते भगवानराः बुतायिंग बुताता। हनालगा ईंग हना बदीरेयिंग भल-भलाय अवेनता।

¹⁸ ईंगराः परसार अरू बुताते ईसू मसी एचेकेरा हनानाः बदीरे एकलायिंग कतायता, जेमहा बेगर एहूदाकू भगवानकू मनाः।

¹⁹ ईंग बयाव जुवाः इयाःआ बुता अरू चिनहाकूनिंग एचेय लगा, हाँय सुद बिरुवाराः जंगरे एमेवारिंगा। नाःआ इया एरुसलेम सहर अते इलुरिकूम छतर वरी ईंग ईसू मसीराः नपाय सरवन मुरुक बगरा होड़कू एचेरेयिंग परसार उदुःकेरा।

²⁰ ईसू मसी बदीरे मेरकू सुदी अवेगरा, हँकुःआ होड़कू नपाय सरवनिंग परसार उदुःवाकू लगा ईंग जीव ओंगोल तरसाःतना, जेमहा ईंग एटाः होड़ रेमकेरा हना रेमतो भीटरे ओड़ाः अलोयिंग तुलाय।

²¹ मनदो भगवानराः कागदरे नाःआ इया ओजाःतो इदा, “तोनोंगीग हाँय बदीरे कहियो मेरकू कता उदुःवागाडकू, हँकुःआ होड़कू हाँयकू ञेलेयता, अरू हाँय बदीरे कहियो मेरकू अयूमगरा, हँकुःआ होड़कू हाँय बदीरेकू बुझाःता।”

²² ईंग नपाय सरवनिंग परसार उदुःगेःआ। हनालगा ईंग अपे एचेरे रूमी सहररे सेन अते घड़ी घड़ी ईंग रोंकावयान।

रूमी सहर सेन लगा पउलूसराः ओंगोल

²³ मनदो नुँहू ईंग नंडाःआ देसरेयिंग परसार पुरावगोतेरा अरू मुरुक बरिस अते अपे सुदा जुमाः लगायिंग चहाःतना।

²⁴ हनालगा ईंग इसपान देस अगींग सेन मेला, होया अवेन दो अपे सुदायिंग जुमाःता। तोनोंगमिन दिन अपे सुदा नपायते दोहोकियानखन मड़ंग अगी ईंग सेन मेला अपे ईंगपे संघरा अवेवायिंगता।

²⁵ मनदो नुँहू ईंग एरुसलेम सहररिकुःआ बिसवासी होड़कू सेवाकू लगा हंडायिंग सलाःतना।

²⁶ मकिदुनिया राइजरिकुःआ अरू अकाया राइजरिकुःआ बिसवासी होड़कू अँनकूराः आन-धानते एरुसलेमरिकुःआ गरीब बिसवासी होड़कू संघरावाकू लगा बहालते बिहिरीकू उतराववाडकुःआ।

²⁷ मड़ंगरे भगवानराः नपाय सरवन मकिदुनिया राइजरिकुःआ अरू अकाया राइजरिकुःआ होड़कू एहूदाकू अतेकू अयूमतेरा। हनालगा हँकुःआ होड़कू एहूदा बिसवासी होड़कू संघरावाकू लगा हों हँकूराः जिमेवारी इदा।

²⁸ दो नुँहू ईंग एरुसलेम सहरिंग सेनता अरू नाःआ बिहिरी हँकू एचेरेयिंग एमे अटूता। हनते ईंग अपे सुदा जुमावकियानखन इसपान देसिंग सेनता।

²⁹ अरू ईंग सुसुदीतना, ईंग अपे एचेरेयिंग सेन दो ईसू मसी अबूराः जीव-जहन जमालेःआय नाय नपायगोडता।

³⁰ ने ईंगरिकुःआ अजी बोपोहकूतिंग, अपे परबू ईसू मसी एचेरेपे बिसवासगेतना अरू सुद बिरुवा अपे अलार-दुलार होड़ेंग लगा संघरावापेतना। हनालगा ईंग अपे एचेरे गोड़न पइयन घड़ीनिंग असेयतना, अपे ईंग लगा भगवान एचेरे मिनी जीवकियानखन ईंग सुदापे अरजी ञवन।

³¹ ईंग एहूदिया छतरिंग सेन मेला हंडाकुःआ बेगर बिसवासी होड़कू अते भगवान ईंगराः जीवे बनसावगे लगापे अरजीगे। अरू एरुसलेम सहररिकुःआ बिसवासी होड़कू ईंग इदीयता हना बिहिरीतेकू ननाय जुवाः लगा होँपे अरजीगोड ञवन।

³² नाःआते ईंग भगवानराः ओंगोल इया अपे सुदा बहालतेयिंग जुमाव अवेन अरू अबू जमाकूराः जीव हड़ियड़ जुवाः।

³³ अबू लगा सलसते एमेयता हाँयग भगवान अपे जमाकू सुदाय दोहोन। आमीन!