रूमी 11 - Korwa Bible

भगवान इसराएल होड़कूय मयावारा

¹ दो ईंग होंबरेतना, अनँयगरिकुःआ इसराएल होड़कू भगवान अड़ाः एंडागोतेडकुःआ जा? मेरेय अड़ाः एंडागाडकुःआ। ईंग हों इबराहीमरीग नइड़-बाँस होड़ हवे अरू बिनियामीन गोतोर अते मी होड़ इसराएल होड़ इदानिंगा।

² भगवान मनाड़ंगतेय ओंगोल दोहोकेडकुःआ हँकुःआ होड़कू मेरेय अड़ाःगाडकुःआ। भगवानराः कागदरे इलियाह बदीरे चेले माःआन कतायता? हाँय इसराएल होड़कू बदीरे भगवान एचेरेय लालिसगेतना,

³ “ने परबू, हँकुःआ होड़कू आमराः बड़रा कता होड़कूकू ञेड एंडातेरा अरू आमराः बेदीकू रूब एंडागोतेडा। नुँहू इनिंग एकला बनसावकिया अरू हँकू ईंग ञेड एंडा लगाकू तक-तकावकिया।”

⁴ मनदो भगवान हाँय एचेरे चेले माःआने कता कुदातेरा, “ईंग इनिंग लगा सात हजार होड़कूयिंग बनसावकेडकुःआ। हँकू बाःअल देवताराः मुरती मेरकू सेवायतना।”

⁵ हनन इया नाःआ जूगरे हों इदा। भगवान इसराएल होड़कूय मयावाडकुःआ, अरू अदोम होड़कू सुनाव दोहोकेडकूखने बनसावकेडकुःआ।

⁶ भगवान अबू नपाय बुताकूनबू बुताःआ हना अते मेरेय सुनावगडबुःआ, मनदो भगवान अनँयग मयावाडबूखने सुनावकेडबुःआ। हाँय अबूराः नपाय बुता अतेय सुनावकेडबुः दो हाँयराः मया सदाःआ होया जुवाःकुःआ।

⁷ दो नाःआते चिला होयानेना? इसराएल होड़कू अते मुरुक होड़कू भगवान हँकूय सडावकू लगा तिंगीड घड़ीनकू ञामा, मनदो हँकू मेरकू ञाम अवेगाड। भगवान सुनाव दोहोकेडकुःआ हँकुःआ होड़कू ञाम अवेतेरा। मनदो एटाः होड़कूराः जीव कटकट केटेगयान।

⁸ भगवानराः कागदरे नाःआ इया ओजाःतो इदा, “भगवान हँकूराः जीवे सुखवारगोतेडा, दो हँकू नाःआ जूग वरी, मेड इदान हों अनाहाकू ञेल अवेय अरू लुतूर इदान हों अनाहाकू अयूम अवेय।”

⁹ ननन इया दाऊद राजा हों भगवानराः कागदरेय ओजाःतेरा, “हँकू जोम ञूयकेडखनकू बहालगुःता, हनानाःरे हँकू दाः जुवाः। हँकू तोहोडकेडखन, अँननकूराः बुता इया डंडकू पवाः।

¹⁰ हँकूराः मेड अंदरा जुवाः, अरू हँकू जमा बेला कुबड़ाकू दोहोन।”

बेगर इसराएल होड़कूराः सडाव

¹¹ दो ईंग अरूयिंग होंबरेतना, हँकुःआ इसराएल होड़कू मेरकू बिसवासगाड हना अते हँकू सगर दिन लगाकू एनेटाःयना जा? कोनोवान! हँकू गारबारतेरा हना अते भगवान बेगर इसराएल होड़कूय सडावकेडकुःआ, जेमहा हँकू बदीरे इसराएल होड़कू इरा जुवाः।

¹² भगवान इसराएल होड़कू सडावकू लगाय ओंगोलतेरा। मनदो हना अते हँकू अइठावयान अरू बेगर इसराएल होड़कू लगा नफा होयाकिया। दो इसराएल होड़कू भगवानराः सडावकू मनेवा दो हँकू अते चउंदीसरिकुःआ जमा होड़कूराः जीव अरू नपाय चिला लगा मेर होयाकुःआ?

¹³ दो नुँहू, अपे बेगर इसराएल होड़कू, ईंगपे अयूम। अपे बेगर इसराएल होड़कू लगा भगवान ईंग मूक चेलाय बड़ाँवकिडिंगा। हनालगा ईंग नाःआ सेवा मरंगिंग ओंगलेतना,

¹⁴ जेमहा अपेकू ञेल घड़ीन हँकुःआ होड़कू इराकियानखन हँकू अते अदोमकू भगवान एचेरेकू बिसवास अवेय।

¹⁵ दो भगवान इसराएल होड़कूय अड़ाःतेड अते चउंदीसरिकुःआ होड़कू आँयग सुदा अरूय हेल-मेलगोतेड दो भगवान हँकूय मनेवातेड अते गोएगतो होड़कूराः जिनियाव जुवाः इया इदा।

¹⁶ अपे ईंगपे अयूम! अपे सुवेडतो गुंडा अते मी बंटा भगवान लगापे एमेय दो हना जमा गुंडा सुद जुवाःता। अरू जेर नपाय इदान दो हनाराः डइड़कून हों नपाय दोहोनता।

¹⁷ नपाय जइतून सींगराः तोनोंग तोनोंग डइड़कून भगवान तपेग एंडागोतेडा अरू पहाड़राः जइतून सींगराः डइड़कून हना नपाय जइतून सींगरेय तोल जोड़ावगोतेडा अरू नुँहू जियाः लगा हना सींगराः जेरते दाःकून पवाःतना।

¹⁸ दो अपे अहापे बड़वार, भगवान हँकू तपेग एंडाकेडकूखन अलेय तोल जोड़ोवकेरा, माःआन। मनदो अपे नाःआ कतापे उहियारगोड ञवन, जेर जियाः लगा अपे दाःकून मेरपे एमेयतना मनदो अपे जियाः लगा जेनेर दाःकून एमेवापेतना।

¹⁹ दो अपे कतायता, “अले तोल जोड़ाव लगा भगवान हना डइड़ इया हँकूय तपेग एंडागोतेडकुःआ।”

²⁰ अपे सतपे कताकेरा। मनदो नाःआ कता होँपे उहियार ञवन, हँकुःआ होड़कू मेरकू बिसवासगाड। हनाते भगवान हना डइड़कून इयाय तपेग एंडागोतेडकू अरू अपे बिसवासकेरा अतेय तोल जोड़ावकेडपेःआ।

²¹ मनाड़ंग हनानाः सींगते उडुंगनेना हना डइड़कून भगवान मेरेय मयावागाड। दो अपेय बनसावगोडपेता जा? हनालगा अपे अँननपे मरंग अहापे ओंगलुः, मनदो भगवान एचेरे बोर घड़ीनपे दोहोन।

²² अपे नाःआ कता बदीरेपे उहियारगोड ञवन। भगवान मया ञवनताय अरू डंडियावकू लगा होंय सुदीयता। हाँय एचेरे मेरकू बिसवासगाड, हँकुःआ होड़कूय डंडियावतेडकुःआ अरू हाँय एचेरेकू बिसवासकेरा अपेय मयावागोड ञवनतना। अपे मेरपे बिसवासगे दो अपे हों हना डइड़ इयाय तपेग एंडागोडपेताय।

²³ भगवान एचेरे अगम जंगर इदा। हनालगा इसराएल होड़कू भगवान एचेरेकू बिसवासगे दो हाँय हँकू हना डइड़ इया अरूय तोल जोड़ाव अवेकूता।

²⁴ अपे पहाड़राः जइतून सींगराः डइड़ इयापे दोहोना। मनदो भगवान अपे हना सींग अते नपाय जइतून सींगरेय तोल जोड़ावगोतेडपेःआ। दो हना नपाय जइतून सींगरे मड़ंगरे दोहोना हना डइड़कून भगवान अरू ओरोय जोड़ाव अवेतेरा जा?

बेगर इसराएल होड़कू अरू इसराएल होड़कू सडाव जुवाःता

²⁵ ईंगरिकुःआ अजी बोपोहकूतिंग, मड़ंगरे होड़कू मेरकू सुदीया नाःआ कता बदीरे अपे अनसिनहार अहापे दोहोन। अरू अपे अँननपे कनहूनदारकू अहापे ओंगलुः। इसराएल होड़कू अते अदोम होड़कू अँनकूराः जीवकू कटकटावगोतेडा। मनदो भगवान ओंगोल दोहोकेडकुःआ हँकुःआ बेगर एहूदाकू हाँय एचेरे अरीनकू बिसवासगे वरी हँकुःआ एहूदाकू अँनकूराः जीव केटेग कटकटावतोकू दोहोनता।

²⁶ अरू हनन इया इसराएल होड़कू सडाव जुवाःता। भगवानराः कागदरे ओजाःतो इदा हनन इया, “सडावदार सीयोन अतेय वेगता अरू एकूबरिकुःआ नइड़-बाँस होड़कूराः गारबारिंग चलाः एंडागोडता

²⁷ अरू ईंग हँकूराः जमा कसूर बराव एंडाकेडखन हँकू सुदायिंग कता-जमकावगेता।”

²⁸ इसराएल होड़कू नपाय सरवन बिसवासगे लगा मेरकू चहाःता। हनालगा हँकू भगवानरिकुःआ मुदइ होड़कू हवे। अरू हनाते अपे लगा नफा होयाकिया। मनदो भगवान इसराएल होड़कूरिकुःआ खुटिपरिया होड़कू एचेरे मड़ंगरेय जबानकेड अते, हाँय हँकू सुनाव दोहोकेडकूखने दुलारकेडकुःआ।

²⁹ भगवान होड़कू एमेवाकूता हना दहिन हाँय मेरेय गोः कुदागेता अरू भगवान सुनावकेडकुःआ हँकुःआ होड़कू हाँय मेरेय लिड़िंगकूता।

³⁰ अपे बेगर एहूदाकू, मड़ंगरे भगवानराः कता मेरपे मनाःआ। मनदो एहूदाकू भगवानराः कता मेरकू मनाःतान अते भगवान अपेय मयावारा।

³¹ नुँहू एहूदाकू भगवानराः कता मेरकू मनाःतान अते भगवान अपेय मयावारा, जेमहा हँकू हों भगवान मयावाकू।

³² जमा होड़कू भगवानराः कताकून टड़ाव एंडातेड अते तोलतो होड़कू इयाकू बड़ाँवयना, जेमहा भगवान हँकू जमाकूय मया अवेवा।

³³ अजंग, भगवानराः कनहून अरू मया तुमिन अगम इदा! हाँयराः ओंगोल अरू बुइद तोनोंगीग मेरबू सुदी अवेयता।

³⁴ परबूराः ओंगोल इये सुदी अवेकेरा, अरू हाँय एचे सुदीयीग इये हवे?

³⁵ इये परबू मड़ंगे दहिनवातेडिया अरू हना परबू एमे कुदावाडिया?

³⁶ हनाँय जमाकूने तुलाकेरा, हनाँयते जमाकून सलाःतना, अरू हनाँयराः हवे जमाकून। दो हनाँयग भगवान लगा सगर सइट वरी मान मरजइत होयाः। आमीन!