उदुःतो कताकून 7 - Korwa Bible

मोहर लगावतो इसराएलरिकुःआ 144,000 होड़कू

¹ हनते ईंग चउंदीसराः चइरो कोनारे सेरमो देसरिकुःआ चइरगोटोंग बराहीलकू चड़ाँतिंग ञेलतेडकुःआ। हँकू चउंदीसराः चइरो गतरराः होयकू साब टेकावकातेरा, जेमहा ओत सहे समुंदर सहे तोनोंगाः सींगरे होय अलो पराः।

² हँकुःआ बराहीलकू ओत अरू समुंदर लायगे लगा हातपातकू पवावनेना। हनते अरू मीटोंग बराहील पुरुब अगीते सेरमो अगी सेनतो ईंग ञेलतिरिया। हाँय जीयत भगवानराः मोहरे साबकातेरा। हाँय ओत अरू समुंदर लायगे लगा हातपातकू पवावकिया हँकुःआ चइरगोटोंग बराहीलकू एचेरे मुरुक सटी खिररीनेनखने कतातेरा,

³ “अबूरीग भगवानरिकुःआ सेवकियाकूराः समांगरे मोहर अरीनबू लगावगे वरी, ओत अरू समुंदर अरू सींगकून अहापे लायगे।”

⁴ समांगरे मोहर लगावतो इदानकुःआ हँकुःआ होड़कूय गँड़ावकेरा, हनायिंग अयूमकेरा। हँकू इसराएलरिकुःआ बारहगोटोंग गोतोर अते मी लाक चवालीस हजार होड़कू दोहोना।

⁵ एहूदा गोतोर अते बारह हजार, रुबेन गोतोर अते बारह हजार, गाद गोतोर अते बारह हजार,

⁶ असेर गोतोर अते बारह हजार, नपताली गोतोर अते बारह हजार, मनेसी गोतोर अते बारह हजार,

⁷ सिमोन गोतोर अते बारह हजार, लेवी गोतोर अते बारह हजार, इसाकर गोतोर अते बारह हजार,

⁸ जबुलून गोतोर अते बारह हजार, उसूप गोतोर अते बारह हजार, अरू बिनियामीन गोतोर अते बारह हजार होड़कू।

झोलोंग सोनहे तुसिंगतो होड़कू

⁹ हनते ईंग मुरुक बगरा होड़कूयिंग ञेलतेरा। हँकू तोनोंगीग ओरोय गँड़ाव अवेकेकुःआ। हँकू जमा जइतरिकुःआ, अरू जमा गोतोररिकुःआ, अरू जमा राइजरिकुःआ, अरू जमा भासीरिकुःआ होड़कू दोहोना। हँकू उजड़ सोनहेकू तुसिंगतेरा अरू किताराः डइड़ साबतेडखन गदी अरू भेड़ा होन मड़ंगरेकू चड़ाँकुःआ।

¹⁰ हँकू मुरुक सटी खिररी घड़ीनकू कताया, “गदीरेय दुड़ुःता अबूरीग भगवान, अरू भेड़ा होन हों होड़कूकिन सडावकूता!”

¹¹ अरू सेरमो देसरिकुःआ जमा बराहीलकू गदीराः अरू मूक होड़कूराः अरू चइरगोटोंग जीव-जंतूकूराः चइरो गतरकू चड़ाँकिया। हनते हँकू गदी मड़ंगरे तबेरकियानखन भगवान जाग घड़ीनकू

¹² कताया, “आमीन! अबूरीग भगवान मुरुक मरंग इदानिया। हाँय लगा मान मरजइत अरू जाग, कनहून अरू धनियाबाद, अकूस अरू जंगर, सगर सइट दोनोहोगोड ञवन। आमीन!”

¹³ हनते मूक होड़कू अते मी होड़ ईंग एचेरेय कतातेरा, “उजड़ सोनहे तुसिंगतो नँकुःआ होड़कू इयेकू हवे? नँकू करा अगीतेकू वेगकिया?”

¹⁴ दो ईंग कता कुदातेरा, “ने साहेब, अनम सुदीयता।” हनते हाँय ईंगे कतावाड, “नँकू मुरुक कटसिया सहावकेडखनकू पार वेगकिया हँकुःआ होड़कू हवे। नँकू अँननकूराः सोनहे भेड़ा होनराः बलंगीतेकू बुहाल उजड़केरा।”

¹⁵ हनालगा, “नँकू भगवानराः गदी मड़ंगरे इदानकुःआ, अरू हाँयराः ओड़ाःरे दिन रइत हाँयकू सेवाता, अरू गदीरे दुड़ुःतो इदानिया हाँय, हँकूय संभाड़ता

¹⁶ अरू हँकू कहियो ओरो रंगेगतेडकुःआ, अरू कहियो ओरो ततंगतेडकुःआ। बेर सहे कड़-कड़ सितोंगते ओरोकू लर-लूरावनेना

¹⁷ गदीराः तलारे इदानिया हाँयग भेड़ा होन, हँकूरीग सरवाहाय दोहोनता। अरू जीव एमेता हना दाःराः सूती अगीय गोःयाकूता, अरू भगवान हँकूराः जमा मेड दाःए जोड अमिंगगेता।”