उदुःतो कताकून 6 - Korwa Bible

सातगोटोंग मोहरकून

¹ हनते हाँयग भेड़ा होन सातगोटोंग मोहर अते मीटोंग मोहरे उउघाड़ाःआ हनायिंग ञेलतेरा। हनते मीटोंग अरोयिंग अयूमतेरा। चइरगोटोंग जिनियत जीव-जंतूकू अते मीटोंग जीव-जंतू ठेड़ररे इयाःआ अरोते मुरुक सटीतेय कतातेरा, “दूमे।”

² दो ईंग मीटोंग उजड़ घोड़ायिंग ञेलतेरा। अरू हाँयग घोड़ा सेरमोरे मी होड़ होड़ दुड़ुःकुःआ। हाँयराः तिःईरे मीटोंग अः दोहोना अरू हाँय एचेरे राजाकू तुसिंगगेता हना मीटोंग पगरी भगवान एमेवातेरिया। हनते हाँय लड़ाइ लगा अरू जितावबाः जुवाः लगाय उडुंगनेना।

³ बार नमारराः मोहर भेड़ा होन उघाड़तेड दो, मीटोंग एटाःयीग जीव-जंतू कतातिंग अयूमतेरा, “दूमे।”

⁴ हनते मीटोंग लाल घोड़ा हननतेय उडुंगनेना। हाँयग घोड़ा चोटरे मी होड़ होड़ दुड़ुःकुःआ। हाँय एचेरे मीटोंग तलवइर दोहोना। अरू चउंदीस अते होड़कूराः सलसत चलाः एंडागे लगा हाँय हातपाते पवावनेना, जेमहा होड़कू अँननकू अँकू ञेड गोएग होड़ेंग।

⁵ हनते भेड़ा होन पेय नमारराः मोहरे उघाड़तेरा दो, अरू एटाः जीव-जंतू कतातेड, “दूमे।” हनते ईंग मीटोंग कड़िया घोड़ा वेगतोयिंग ञेलतेरा। हाँयग घोड़ा सेरमो, मी होड़ होड़ दुड़ुःकुःआ अरू हाँय तिःईरे किलो-पलहरा दोहोना।

⁶ अरू हँकुःआ चइरो जीव-जंतूकू अते मीटोंग जीव-जंतूराः अरो ईंग अयूमतेरा, “मी दिनराः बनीते मी सेर गोहोम अरू मी दिनराः बनीते पेय सेर सरताल, मनदो जेतून अरू अंगूरराः बगइचाकून अलोपे आडगेःआ।”

⁷ हनते भेड़ा होन चइर नमारराः मोहरे उघाड़तेरा दो, अरू एटाः जीव-जंतूराः अरो ईंग अयूमतेरा, “दूमे।”

⁸ दो ईंग मीटोंग पिःपियाड़ रंग घोड़ायिंग ञेलतेरा। अरू हाँयग घोड़ा सेरमो मी होड़ होड़ दुड़ुःकुःआ। हाँयराः ञाव दोहोना गुजुः, अरू पतालपूर हाँय तयोम तयोम दोहोना। हँकिन चउंदीसरिकुःआ होड़कू चइर बंटारे मी बंटा होड़कू ञेड एंडाकू लगा हातपातकिन पवावकिया। हँकिन होड़कू तलवइरते, अरू कतकालते अरू हइजाते अरू पहाड़ जानरकूते गोएग एंडाकू लगा हातपातकिन पवावकिया।

⁹ हनते भेड़ा होन पाँच नमारराः मोहरे उघाड़तेरा दो, भगवानराः सरवन लगा अरू हना सरवन होड़कू एचेरे कता उदुः अतेकू ञेड गोएगतेडकुःआ, हँकुःआ होड़कूराः हनसा ईंग धाम पेंदारेयिंग ञेलतेरा।

¹⁰ हँकू खिररी घड़ीनकू कताया, “ने अगम मरंगीग परबू, आम सुद अरू सताय इदानमेःआ। अलेकू ञेड एंडाकेरा चउंदीसरिकुःआ हँकुःआ होड़कू, फड़ियावकेडखन अलेराः बलंगीराः बदला कुदाय लगा चिला लगाम कुबेरगेतना?”

¹¹ हनते हँकू जमाकू तुसिंगे लगा मेमेडटोंग मेमेडटोंग काट वरीःआ झोलोंग उजड़ सोनहे भगवान एमेवातेडकुःआ। अरू हँकूय कतावाड, “ईंगरिकुःआ सेवकियाकू अरू अपेरिकुःआ बिसवासी वपक बोपोहकूतापे अँननपे इयाकू ञेड एंडाकूता। हँकू जमाकू अरीनकू ञेड एंडाकू वरी अपे मी घड़ी अरूपे लोड़ोन।”

¹² ईंग ञेलतेरा, भेड़ा होन छो नमारराः मोहरे उघाड़तेरा। हनमेला ओत मुरुक डोलावनेना, अरू बेर कमड़ा इया भिंजीट कड़ियायान, अरू बांगो बलंगी इया अदग लालयान,

¹³ अरू घटाते लुवा जोःओ ओतरे लुजरुःता, हनन इया सेरमो अते ओतरे इपीलकू लोजोरयान।

¹⁴ हनते सेरमो कोंडोड़तो कागद इया कोंडोड़यान अरू जमा पहाड़कून अरू डुगुकून हों हनानाः ततेर अते चलाःयान।

¹⁵ हनते चउंदीसरिकुःआ राजाकू, अरू हातपातदारकू, अरू मरंग सइना होड़कू, अरू गिरहत होड़कू अरू जंगरदारकू अरू सेवकियाकू अरू मलिकूतुकू, हँकू जमाकू लात पेंदारे अरू पहाड़राः चटइन तलारे सेनेडखनकू ओकोयान।

¹⁶ हँकू पहाड़ अरू चटइनकू कतावाःआ, “अले चोटरे रूब जुवाः, जेमहा गदीरेय दुड़ुःकिया हाँय, अले अलोय ञेल अवेले अरू भेड़ा होनराः रीस अतेले बनसाव जुवाः।

¹⁷ हँकिन रीसगुःराः मरंग दिन सोदोरयना, अरू तोनोंगीग हँकिन मड़ंगरेय चड़ाँ अवेनता जा?”