उदुःतो कताकून 5 - Korwa Bible

कोंडोड़ कागद अरू भेड़ा होन

¹ हनते गदीरे दुड़ुःतोय दोहोना हाँयग भगवानराः खउना तिःईरे मीटोंग कोंडोड़तो कागदिंग ञेलतेरा। हना कागदराः बनर परोमरे ओजाःतो दोहोना। अरू हना कागदरे सात ततररे मोहर लगावतेडखन तोलतो दोहोना।

² हनते ईंग सेरमो देसरीग मी होड़ जंगरदार बराहीलिंग ञेलतेरा। हाँय मुरुक सटी खिररी घड़ीने कतातेरा, “नाःआ कागद अरू मोहर लड़ा जुकूर तोनोंगीग इदानिया जा?”

³ मनदो सेरमो देसरे सहे ओतरे सहे पतालपूररे हना कागद लड़ा लगा सहे भितरी ञेल जुकूर तोनोंगीग मेरेय दोहोगान।

⁴ हना कागद लड़ा जुकूर सहे भितरी ञेल जुकूर तोनोंगीग मेरकू दोहोगान अते, ईंग मुरुकिंग इयाम ञवना।

⁵ हनते मूक होड़कू अते मी होड़ ईंग एचेरेय कतातेरा, “अलोम इयाम। ञेलमे! एहूदा गोतोर अतेय जनमावकिया हाँयग कूल अरू दाऊद राजारीग डइड़-पखुड़ा, हाँय जितावकिया। हनालगा हाँय हना तोलतो कागद अरू मोहर लड़ा जुकूर इदानिया।”

⁶ हनते हना गदी अरू चइरो जीव-जंतूकू अरू मूक होड़कू तलारे गेड ञेडतो इया मीटोंग भेड़ा होनिंग ञेलतेरा। हाँयराः सातगोटोंग देरेंग अरू सातगोटोंग मेड दोहोना। नाःआ सातगोटोंग मेड चउंदीसरे भगवान वारकेरा हना सातगोटोंग बिरुवा हवे।

⁷ हनते हाँयग भेड़ा होन सेनेडखन गदीरेय दुड़ुःकुःआ हाँयराः खउना तिःई अते हना कागदे गोःयाड।

⁸ हाँय हना कागदे गोःयाड दो, हँकुःआ चइरो जीव-जंतूकू अरू चूबीसगोटोंग मूक होड़कू हाँयग भेड़ा होन मड़ंगरेकू तबेरयान। हँकू जमाकू एचेरे मेमेडटोंग तंबुररा अरू सकला पेरेगतो सोनाराः डुबहा दोहोना। (हना सकला भगवानरिकुःआ सुद होड़कूराः अरजी हवे।)

⁹ हनते हँकुःआ चूबीसगोटोंग जीव-जंतूकू अरू मी कुड़ी चइरगोटोंग मूक होड़कू, नाःआ नँवा सेरेंगकू सेरेंगा; “ने परबू, आमकू ञेड गोएगतेरा, अरू आमराः बलंगीते जमा देसरिकुःआ होड़कू, अरू एटाः एटाः भासीरिकुःआ होड़कू, अरू जमा जइत होड़कू अरू जमा खमदानरिकुःआ होड़कू, हँकुःआ जमा होड़कू भगवान लगाम सडावगोतेडकुःआ। हनालगा आम नाःआ कोंडोड़तो कागद अरू मोहर लड़ा जुकूर इदानमेःआ।

¹⁰ आम हँकू राजाकू अरू पुजउरीकूम बड़ाँवकेडकुःआ, जेमहा हँकू अबूरीग भगवानकू सेवा, अरू जमा चउंदीसरेकू राइजगे।”

¹¹ अरू ईंग ञेलतेरा दो हना गदीराः अरू हँकुःआ जानरकूराः अरू मूक होड़कूराः चइरो गतर सेरमो देसरिकुःआ मुरुक बराहीलकूराः अरोयिंग अयूमतेरा। हँकू लाक लाक अरू करोड़ करोड़कू दोहोना।

¹² अरू हँकू मुरुक सटीतेकू सेरेंगा, “ने ञेड गोएगतो भेड़ा होन आम जंगर अरू आन-धान, कनहून अरू सवांग, मान मरजइत अरू जाग, अरू धनियाबाद पवाः जुकूर इदानमेःआ।”

¹³ हनते ईंग सेरमो देसरिकुःआ, अरू ओतरिकुःआ, अरू पतालपूररिकुःआ, अरू समुंदररिकुःआ जमाकू नाःआ इया कतातिंग अयूमतेडकुःआ, “ने भगवान आम गदीरेम दुड़ुःकिया दो आम लगा अरू भेड़ा होन लगा, होड़कू सगर सइट वरी मान मरजइत, जाग, अरू धनियाबादकू एमे अरू अबाराः राइज सगर सइट दोहोन।”

¹⁴ हनते चइरो जीव-जंतूकू कतातेरा, “आमीन”, अरू हँकुःआ मूक होड़कू तबेरनेनखन हँकिनकू जागतेरा।