उदुःतो कताकून 4 - Korwa Bible

सेरमो देसरे जाग

¹ हना तयोमरे ईंग ञेलतेरा दो सेरमो देसराः मीटोंग दुवार गीगतो दोहोना। अरू मरंग सोहनाईराः अरो इया अरो मड़ंगरेयिंग अयूमतेरा, हनाराः अरो अरूयिंग अयूमकेरा। हाँय कतातेरा, “दबूमे सेरमो, अरू नाःआते तयोमते होनोयाः लगा इदा, हना कताकून जमायिंग उदुःवामता।”

² हिनिन बितिकरे ईंग सुद बिरुवातेयिंग पेरेगयान, अरू सेरमो देसरे मीटोंग गदी अरू हना गदीरे मी होड़ दुड़ुःतोयिंग ञेलतिरिया।

³ हना गदीरे दुड़ुःकिया हाँय, एसब दिरि अरू माड़िकिया दिरि इयाय विड़चेड़नेना। पना दिरि लवकाःता हना इयाःआ मीटोंग टुंडी-बींग हाँयराः गदीराः चइरो गतर ञिलुःआ।

⁴ हाँयराः गदीराः चइरो गतर चूबीसगोटोंग गदीकून दोहोना। अरू हना गदीकूनरे मी कुड़ी चइरगोटोंग मूक होड़कू उजड़ सोनहे अरू सोनाराः पगरी तुसिंगकेडखन दुड़ुःतोकू दोहोना।

⁵ हना गदी अते बदरी विड़चेड़नेना अरू ठेड़ररेनेना, अरू हना गदी मड़ंगरे सातगोटोंग ढिबरीकून सलगावनेना। हना ढिबरीकून भगवानराः सातगोटोंग बिरुवा हवे।

⁶ अरू हना गदीराः मड़ंगरे काँचराः समुंदर इया तोनोंगाः दोहोना। हना समुंदर इसपटिक दिरि इया, ञेल पुरुःता हना इया दोहोना। अरू तलारे दोहोना हना गदीराः चइरो गतर चइरगोटोंग जीव-जंतूकू दोहोना। हँकूराः मड़ंग अगी अरू तयोम अगी मेनेड मेड दोहोना।

⁷ मीटोंग कूल इयाय दोहोना, अरू मीटोंग बएल इयाय दोहोना, अरू मीटोंगराः सुरइत मनुवा इया दोहोना, अरू मीटोंग दोन ञवनताय हाँयग कुड़ीड इयाय दोहोना।

⁸ चइरो जीव-जंतूकूराः छो छोगोटोंग पंकी दोहोना, अरू हँकूराः जमा देह दगलीरे, भितरी अरू बहरी, मेनेड मेड दोहोना। हँकू बेगर लोड़ोनते दिन रइत कता ञवना, “सुद इदानिया, सुद इदानिया, परबू भगवान सुद इदानिया, अगम जंगरदार भाबी भगवान, हाँय दोहोना, अरू नुँहू इदानिया, अरू कुदा वेग लगा इदानिया।”

⁹ तलाराः गदीरेय दुड़ुःकिया हाँय सगर सइट लगा जिनियते दोहोनता। दो हँकू जीव-जंतूकू हाँयकू जागता, अरूकू मान मरजइतगेयता अरूकू धनियाबादगेयता,

¹⁰ हनमेला गदीरेकू दुड़ुःता, हँकुःआ मी कुड़ी चइरगोटोंग मूक होड़कू, हँकू, सगर सइट लगा जिनियत इदानिया हाँय मड़ंगरे, अँननकूराः पगरीकू मंडावकेरा अरू तबेरकेडखनकू जागगेयता,

¹¹ “ने अलेरीग परबू अरू भगवान, आम अनमराः ओंगोल इया जमा जिनिसकूनमे तुलाकेरा। अरू आम ओंगोल इया हना जमा नुँहू इदा, हान अनम हमा जमालेःआम तुलाकेरा। हनालगा आम जागगे इया अरू मान मरजइतगे इया अरू जंगरदार इदानमेःआ।”