उदुःतो कताकून 22 - Korwa Bible

जीवराः नई

¹ हनते सेरमो देसरीग बराहील मीटोंग नईए उदुःवातेरिंगा। हना नईरे जीव एमेता हना दाः दोहोना। हना दाः मुरुक सफा अरू सिसा इया दोहोना। हना नई भगवानराः अरू भेड़ा होनराः गदी अते तुःआ,

² अरू हना नई, सहरराः मइद सनंडक तलाते तुःआ। अरू हना नईराः बनर परोम जीवराः सींग दोहोना। हना सींगरे बारह बरानाः जोःओ जोनेना। अरू हना सींग बारहो महिना मेमेडटोंग जोःओ जोःता। हना सींगराः सकमकून जमा जइत होड़कू अँकूराः हसूकूनते नपाय जुवाः लगा इदा।

³ हंडा सती-सरापतो तोनोंगाः ओरो दोहोनेना। मनदो भगवानराः अरू भेड़ा होनराः गदी हना सहररे दोहोनता, अरू हाँयरिकुःआ सेवकियाकू हाँयकू सेवाता।

⁴ हँकू भगवानराः मुरइतकू ञेलता अरू हाँयराः ञाव हँकूराः समांगरे ओजाःतो दोहोनता।

⁵ हंडा कहियो ओरो अयूबनेना। परबू भगवान हँकू मरसले एमेवाकूता। हनालगा हँकूके ढिबरी अरू बेर, मरसल एमे लगा ओरो दोहोनेना। अरू हँकुःआ सेवकियाकू सगर सइट लगा राजाकू इयाकू राइजगेता।

⁶ हनते हाँयग बराहील ईंगे कतावातेरा, “नाःआ कता बिसवासगेयीग अरू सनाताय इदा। परबू दरवाःआ हना कताकून अनँयगरिकुःआ सेवकियाकू एचेरेय एचे उदुःवाकू लगा अनँयगरीग बराहीले वारतेरा। ननाँय भगवान अनँयगराः बड़रा कता होड़कू एचेरे मड़ंगरेय कता उदुःतेरा।”

ईसू कुदा वेगता

⁷ दो ईसू कतातेरा, “अपे ईंगपे अयूम! ईंग हनालियिंग कुदा वेगता। नाःआ कागदरे ओजाःतो इदा हना जमा कतत सरवनकू मनाःता हँकुःआ होड़कू भगवान नपायकूता।”

⁸ ईंग एहुना, नाःआ जमा कताकूनिंग अयूमकेरा अरूयिंग ञेलकेरा। ईंग नाःआयिंग अयूमतेड अरूयिंग ञेलतेड दो, ईंगे उदुःवातेरा हाँयग सेरमो देसरीग बराहीलराः काट कुटीरे हाँय जागगे लगायिंग तबेरयान।

⁹ मनदो हाँय ईंग एचेरेय कतातेरा, “अलो अलो, नाःआ इया अलोम एचेय। ईंग हों आम इया भगवानरीग सेवकिया होड़ इदानिंगा। आमरिकुःआ बिसवासी वपक बोपोहकूताम इया, भगवानराः बड़रा कता होड़कू इया, अरू नाःआ कागदराः कताकूनकू मनाःता हँकुःआ होड़कू इया ईंग हों भगवानरीग सेवकिया होड़ इदानिंगा। हनालगा आम भनगवानमे जाग।”

¹⁰ हनते हाँय ईंग एचेरेय कताया, “नाःआ कताकून होयाःराः बेला लेनेसान इदा। हनालगा नाःआ कागद कोंडोड़ रेडकेडखन मोहर अलोम लगावगे।

¹¹ बेलूरकू एचेयता हँकुःआ होड़कू, बेनेलूरकू एचे ञवन, अरू मइलाल जीव होड़कू मनइलावकू दोहो ञवन, मनदो नपाय होड़कू ननपायकू एचे ञवन, अरू सुद होड़कू सुनुदकू दोहो ञवन।”

¹² हनते ईसू अरूय कतातेरा, “अपे ईंगपे अयूम! ईंग हनालियिंग कुदा वेगता। अरू जमाकू अँनकूराः बुता इया बदला एमेवाकू लगा ईंग एचेरे इमान इदा।

¹³ ईंग अलपा अरू ओमेगा, ईंग अते जमाकून रेःएनता अरू इनिंग अते जमाकून लुलिग जुवाःता, ईंग मड़ंगीग अरू टुटीगीग हवे।

¹⁴ अँनकूराः सोनहेकू बुहाल अमिंगेता हँकुःआ होड़कूराः जीव भगवान नपायगेता। हँकू हना सहरराः हता दुवारतेकू बोलो अवेनता अरू हँकू जीव एमेता हना सींगराः जोःओ जोम लगाकू पवाःता।

¹⁵ कुतू इया होड़कू, अरू पपंगाड़ होड़कू, अरू सनहा-सनही होड़कू, अरू ञेड एएंडा होड़कू, अरू मुरती सेवा होड़कू, जमा बरानाः लबरा चहाः होड़कू अरू अडिग होड़कू, हँकू जमाकू हना सहरराः बहरीकू दोहोनता।

¹⁶ ईंग ईसू, आम नाःआ कताकून जमा कलसियारिकुःआ होड़कू एचेरेम कता उदुः लगा, ईंगरीग बराहील आम एचेरेयिंग वारकिरिया। ईंग दाऊद राजारीग डइड़-पखुड़ा अरू नइड़-बाँस होड़ हवे, अरू ईंग टेडेगता हाँयग अंगुः इपील हवे।”

¹⁷ सुद बिरुवा अरू कनिया कतायता, “वेगमे।” अरू अयुमेता हाँय कताय, “वेगमे।” अरू ततंगतो होड़कू वेग लगा इदा अरू चाहाःताय हाँयग होड़ बेगर दामते जीवराः दाःए ञूय।

टुटीग कताकून

¹⁸ ईंग एहुना, नाःआ कागदरे ओजाःतो इदा हना जमा कतत सरवनकू बछाःता हँकुःआ होड़कू सेताव घड़ीनिंग कतायतना, तोनोंगीग होड़ नाःआ कागदराः कतत सरवनरे अरूय मेसागे दो, नाःआ कागदरे ओजाःतो इदा हना जमा हइजाकून भगवान हनाँयग होड़े एचे सहावता।

¹⁹ अरू तोनोंगीग नाःआ कागद अते भगवानराः कतत सरवने चलाःगोड दो, नाःआ कागदरे ओजाःतो इदा हना सुद सहर अरू जीवराः सींगराः इताड भगवान ओरोय ओवातिरिया।

²⁰ नाःआ कताकूनराः हिदइते एमेता हाँय कतायतना, “हाव, ईंग हनालियिंग कुदा वेगता।” “आमीन! हाव, परबू ईसू वेगमे।”

²¹ परबू ईसू भगवानरिकुःआ जमा सुद होड़कूय मयावागोड ञवन। आमीन!