उदुःतो कताकून 21 - Korwa Bible

नँवा सेरमो अरू नँवा ओत

¹ हनते ईंग नँवा सेरमो अरू नँवा ओतिंग ञेलतेरा। जुनाःआ सेरमो अरू ओत टगाव एंडायान अरू समुंदर हों मेर दोहोगान।

² हनते ईंग सुद सहर, नँवा एरुसलेम भगवान अगीते सेरमो देस अते उतराःतो ईंग ञेलतेरा। हना सहर, अनँयग हेरेल लगा सिंगारकियानखन सुघरे दोहोनता हाँयग कनिया इया दोहोना।

³ अरू ईंग गदी अते तोनोंगीगराः मुरुक सटी खिररीयिंग अयूमतेरा, “भगवान नुँहू मनुवा सुदाय डेरानता, अरू हाँय हँकू सुदाय दोहोनता। हँकू हाँयरिकुःआ होड़कू होयाःता। भनगवान हमा हँकू सुदाय दोहोनता अरू हाँय हँकूरीग भगवाने दोहोनता।

⁴ हाँय हँकूराः जमा मेड दाःए जोड अमिंगकूता। अरू हना तयोमरे गुजुः अरू फिकीर, अरू इयाम, अरू हसू कहियो ओरो दोहोनेना। नाःआ जमाकून सगर सइट लगा टनाड़ाव एंडा जुवाःता।”

⁵ हनते गदीरे दुड़ुःतोय दोहोना हाँय ईंग एचेरेय कतातेरा, “ईंग जनामायिंग नँवागोडता।” हनते अरूय कतातेरा, “नाःआ सरवन जमाकून सताय अरू भरसागे इया इदा। हनालगा नाःआ ओजाःगेमे।”

⁶ हनते हाँय ईंग एचेरेय कतातेरा, “नाःआ कता पुरावयना। ईंग अलपा अरू ओमेगा हवे। जमाकून ईंग अते रेःएनता अरू लुलिग जुवाःता। ईंग जमा ततंगतो होड़कू जीवराः दाः सूती अते, ञूय लगा बेगर दामतेयिंग एमेवाकूता।

⁷ जितावबाः जुवाःता हँकुःआ होड़कू नाःआ जमाकूनराः इताडदारकू होयाःता। ईंग हँकूरीग भगवानिंग दोहोनता अरू हँकू ईंगरिकुःआ लइंकू दोहोनता।

⁸ मनदो पोंकाहा होड़कू, अरू बेगर बिसवासी होड़कू, अरू एरंग होड़कू, अरू ञेड एएंडा होड़कू, अरू सनहा-सनही होड़कू, अरू पपंगाड़ होड़कू अरू मुरती सेवा होड़कू अरू जमा लबरा होड़कू, हँकू जमाकू हना सेंगेल अरू हितकाःतो लेटे दिरिराः हुडिंग समुंदररेकू रेमगे बोलोगोडकूता। अरू ननानाः हवे बार नमार गुजुः।”

नँवा एरुसलेम सहर

⁹ हनते सातगोटोंग हइजा पेरेगतो सातगोटोंग डुबहाकून साबतो सेरमो देसरिकुःआ बराहीलकू अते मीटोंग बराहीलिंग ञेलतेरा। हाँय ईंग एचेरे वेजेडखने कतातेरा, “दोमे, ईंग भेड़ा होनरीग कनियायिंग उदुःवामता। हाँय हनाँयगरीग एराते होयाःता।”

¹⁰ हनते सुद बिरुवाराः संघराते हाँयग बराहील ईंग मीटोंग मरंग अरू उसूल पहाड़रेय गोःयाडिंग। हंडालिंग चड़ाँनेन मेला सुद सहर एरुसलेम भगवान अगीते सेरमो देस अते उतराःतोयिंग ञेलतेरा।

¹¹ हना सहर भगवानराः मरसलते विड़चेड़नेना। हन ञेल पुरुःता हना मुरुक किमइतराः एसब दिरि इया विड़चेड़नेना।

¹² हना सहर लगा मीटोंग मुरुक उसूल अरू सकड़ हता दोहोना। हना हतारे बारहगोटोंग सकड़ सकड़ दुवार दोहोना। अरू हना दुवारकूनरे मेमेडगोटोंग बराहीलकू अगुरा लगाकू दोहोना। अरू हना दुवारकूनरे इसराएल होड़कूराः बारहगोटोंग गोतोरराः ञाव ओजाःतो दोहोना।

¹³ पुरुब अगी पेयगोटोंग सकड़ सकड़ दुवारकून, अरू पछिम अगी पेयगोटोंग सकड़ सकड़ दुवारकून, अरू उतर अगी पेयगोटोंग सकड़ सकड़ दुवारकून, अरू दखिन अगी पेयगोटोंग सकड़ सकड़ दुवारकून दोहोना।

¹⁴ हना सहरराः हता बारहगोटोंग नेवरे तुलात दोहोना। अरू हना मेमेडटोंग नेवरे हाँयग भेड़ा होनरिकुःआ बारहगोटोंग मूक चेलाकूराः ञाव ओजाःतो दोहोना।

¹⁵ ईंग सुदाय बुतुड़ुःआ हाँयग बराहील एचेरे मीटोंग सोनाराः नपा डांग दोहोना। हना डांगते हाँयके हना सहर अरू हना हता अरू सकड़ सकड़ दुवारकून नपा लगा दोहोना।

¹⁶ हना सहर चइरकोनवा दोहोना अरू हना सहर लंबीरे, सकड़रे अरू उसूलरे बरोबइर दोहोना। अरू हाँयग बराहील हना डांगतेय नपातेरा दो, हना सहर 2,400 किलो मीटर लंबीरे अरू सकड़रे अरू उसूलरे बरोबइर दोहोना।

¹⁷ हनते हाँय हना हता होड़कूराः अरू सेरमो देसरिकुःआ बराहीलकूराः नपा इयाय नपातेरा। अरू हन मी सव चवालीस तिःई सकुड़ दोहोना।

¹⁸ हना हता एसब दिरिते तुलात दोहोना अरू हना सहर मुरुक नपायते गरावतो सोनाते तुलात दोहोना। अरू हना सोना ञेल पुरुःता सिसा इया दोहोना।

¹⁹ हना सहरराः नेव जमा बरानाः मुरुक किमइताः दिरिकूनते तुलात दोहोना। मड़ंगाः नेव हड़ियड़ रंगाः एसब दिरिते, अरू बार नमारराः नेव नीला रंगाः नीलमड़ी दिरिते अरू पेय नमारराः नेव सिसा इयाःआ दिरिते, अरू चइर नमारराः नेव हड़ियाड़ रंगाः पना दिरिते,

²⁰ अरू पाँच नमारराः नेव कइन रंगाः गोमेद दिरिते, अरू छो नमारराः नेव लाल रंगाः माड़िकिया दिरिते, अरू सात नमारराः नेव सोना रंगाः पीतमड़ी दिरिते, अरू आठ नमारराः नेव नीला रंगाः पोरोग दिरिते, अरू नव नमारराः नेव पियाड़ रंगाः पुखराज दिरिते, अरू दस नमारराः नेव धुमइल कड़िया रंगाः लहसनिए दिरिते, अरू गारह नमारराः नेव नीला रंगाः दुमरकांत दिरिते, अरू बारह नमारराः नेव धुः-धुमइल रंगाः अकूत दिरिते तुलात दोहोना।

²¹ बारहो दुवारकून बारहगोटोंग मनारंग मुतीकूनते तुलात दोहोना। मेमेडटोंग दुवार मेमेडटोंग मुतीते तुलात दोहोना। अरू हना सहरराः संडक ञेल पुरुःता हना सिसा इया मुरुक नपायते गरावतो सोनाते तुलात दोहोना।

²² अगम जंगरदार परबू भगवान अरू भेड़ा होन हंडा दोहोना। हनालगा हना सहररे जाग ओड़ाःराः जरूरइत मेर दोहोगान।

²³ भनगवान विड़चेड़तना हनालगा बेर अरू बांगोते हना सहर मरसलगे लगा कोवानेःआ। अरू नाःआ सहरराः ढिबरी, भेड़ा होन दोहोना।

²⁴ जइत जइत होड़कू नाःआ मरसलतेकू सेन दूरता। अरू चउंदीसरिकुःआ राजाकू अँननकूराः आन-धान हना सहररेकू गोःता।

²⁵ अरू हंडा कहियो ओरो अयूबनेना। हनालगा हना सहरराः हता दुवार कहियो ओरो सींगनेना।

²⁶ जमा जइत होड़कू अँननकूराः आन-धान हना सहररेकू गोःता।

²⁷ तोनोंगीग तोनोंगाः बेलूर जिनिस हना सहररे ओरोकू गोः बोलोतेरा। अरू बेलूर होड़कू अरू अडिग होड़कू हना सहररे कहियो ओरोकू बोलो अवेनेना। मनदो भेड़ा होनराः कागदरे ञाव ओजाःतो इदा हँननकुःआ होड़कू एकला हना सहररेकू बोलता।