उदुःतो कताकून 20 - Korwa Bible

मी हजार बरिस

¹ हनते ईंग सेरमो देस अते मीटोंग बराहील उतराःतोयिंग ञेलतिरिया। हाँयराः तिःईरे पतालपूरराः चाभी अरू मीटोंग मरंग सिकिड़ी दोहोना।

² हनते हाँय लाल मरंग बींग साबतेडखन हजार बरिस लगाय तोल दोहोतिडिया। हाँयग लाल मरंग बींग, मड़ंगीग बींग हवे। अरू हनाँय हमा कलउ अरू दरहा।

³ हनते हाँयग बराहील लाल मरंग बींग पतालपूरेय सोलोंगतेडीग अरू हंडा हाँये सींगगोतेड अरू सेरमो अगीते मोहरे लगावगोतेड, जेमहा हजार बरिस अरीन पुराः वरी जमा जइत होड़कू हाँय अलोय अडिग अवेकू। हनते तोनोंग बेला वरी अरूय अड़ाःगेयता।

⁴ हनते ईंग गदीकूनिंग ञेलतेरा। अदोम होड़कू हना गदीकूनरेकू दुड़ुःकिया अरू हँकू फड़ियावगे लगा हातपातकू पवावकिया। ईसूराः सताय कता अरू भगवानराः सरवन उदुः अते पुजा ञेड एंडाकुःआ हँकुःआ होड़कूराः बिरुवा ईंग ञेलतेरा। हँकुःआ होड़कू जानर अरू हाँयराः मुरती मेरकू सेवागाड, अरू हाँयग जानरराः चिनहा अँकूराः समांगरे सहे तिःईरे मेरकू गोःगाड। हँकू जियाव रेमनेनखन मसी सुदा हजार बरिस वरीकू राइजगोड ञवना।

⁵ नँकुःआ होड़कू मड़ंगरेकू जियाव रेमनेना। एटाः होड़कू हजार बरिस अरीन पुराः वरी ओरोकू जियाव रेमनेना।

⁶ मड़ंगरेकू जियाव रेमनेना हँकुःआ होड़कूराः जीव भगवान भल-भलायवातेडा अरू हँकू सुद इदानकुःआ। बार नमार गुजुःके हँकू जीवरे तोनोंगाः हातपात कोवानेःआ। हँकू भगवान अरू मसी लगा पुजउरीकू दोहोनता अरू मसी सुदा हजार बरिस वरीकू राइजगोड ञवनता।

कलउराः लाय एंडान

⁷ दो मी हजार बरिस पुराव जुवाः दो, सींगतो अते कलउ गीगगोडेयता,

⁸ अरू हाँय चउंदीसरिकुःआ चइरो गतर इदानकुःआ हँकुःआ गोग अरू मागोगरिकुःआ होड़कूय अडिगता। अरू हँकू हाँय सुदा लड़ाइ लगाकू उडुंगगुःता। हँकू समुंदरराः बितील बरोबइर मुरुक इदानकुःआ।

⁹ हँकू चउंदीसराः कोना कोना गुतू गुतूकू सेनता। अरू भगवानरिकुःआ सुद होड़कूराः डेरा अरू भगवान पसिंदवाता हना सहर हँकू बेड़ाव रेडता। मनदो भगवान सेरमो अते सेंगेले एचे लोजोरता अरू हँकू लाय एंडाता।

¹⁰ हनते हँकुःआ होड़कू अडिगता हाँयग कलउ, सेंगेल अरू हितकाःतो लेटे दिरिराः हुडिंग समुंदररेय तेके बोलोगोडेयता। हंडा हाँयग जानर अरू भगवानराः बड़रा लबराते कतायीग होड़ हों दोहोनता। हँकू सगर सइट दिन रइत पीरारेकू पिड़ियाः पिड़ियाः ञवनता।

टुटीग फड़ियाव

¹¹ हनते ईंग मीटोंग मरंग उजड़ गदीयिंग ञेलतेरा। अरू हना गदीरे मी होड़ दुड़ुःतोय दोहोना। ओत अरू सेरमो हाँय मड़ंग अते ञीरयान अरू हना ओको लगा ततेर मेर दोहोगान।

¹² जमा गोएगतो होड़कू हना गदी मड़ंगरे चड़ाँतिंग ञेलतेडकुःआ। हुडिंगीग अरू मरंगीग, जमाकू हंडाकू दोहोना। बराहीलकू मुरुक बगरा कागदकूनकू पितोरतेरा। हनते जीवराः कागद होंकू पितोरतेरा। हना कागदकूनरे गोएगतो होड़कूराः बुताकून ओजाःतो दोहोना। अरू हनानाः बुता इया भगवान हँकूय फड़ियावतेरा।

¹³ हनते समुंदररेकू गोएगनेना हँकुःआ होड़कू अरू पतालपूररिकुःआ गोएगतो होड़कू अँनकू एचे फड़ियावगुः लगा गदी मड़ंगरेकू सेनेडा। अरू हँकुःआ जमा होड़कू अँनकूराः बुता इया हँकूय फड़ियावतेरा।

¹⁴ हनते हाँय गुजुः अरू पतालपूर सेंगेलराः हुडिंग समुंदररेय सोलोंगगोतेड। नाःआ सेंगेलराः हुडिंग समुंदर बार नमार गुजुः हवे।

¹⁵ अरू तोनोंगीग होड़राः ञाव जीवराः कागदरे ओजाःतो मेर दोहोगान, हँकुःआ होड़कू सेंगेलराः हुडिंग समुंदररेकू रेमगे बोलोगोतेडकू।