उदुःतो कताकून 19 - Korwa Bible

सेरमो देसरे जिताःराः बहाल सेरेंग

¹ हना तयोमरे सेरमो देसरे मुरुक बगरा होड़कूराः मुरुक सटी खिररीयिंग अयूमतेरा। हँकू कतातेरा, “हालेलुयाह! ने भगवान, आम सडावकेडबुःआ, जंगर अरू मान मरजइत पवाःयीग अनम हवे।

² आमराः फनड़ियाव नपाय अरू सताय इदा। मरंग सनही अइमी अनँयग सनही बुताते चउंदीसरिकुःआ होड़कूय एचे बेलूरगोतेडा, अरू आमरिकुःआ सेवकियाकूकू ञेड एंडातेरा हनालगा हाँयग मरंग सनही अइमी बाबील सहरमे फड़ियावकेडखन हनाराः बदलाम कुदाकेरा।”

³ हनते हँकू अरू खिररीनेनखनकू कताया, “हालेलुयाह! बाबील सहर लोःता अरू हनाराः सोकोल, सगर सइट कुहड़ावगोड ञवनता।”

⁴ हना तयोमरे मी कुड़ी चइर गोटोंग मूक होड़कू अरू चइरो जीव-जंतूकू, गदीरे दुड़ुःतोय दोहोना हाँयग भगवान मड़ंगरे होरोकियानखनकू जागतिरिया। हँकू कतातेरा, “आमीन! हालेलुयाह!”

⁵ हनते गदी अते मीटोंग अरोयिंग अयूमतेरा, “ने जमा सेवकियाकू, अबूरीग भगवानपे जाग। ने हुडिंग होड़कू अरू मरंग होड़कू, अपे जमाकू हाँयराः अकूसपे मनाः।”

⁶ हनते ईंग मुरुक बगरा होड़कूराः अरोयिंग अयूमतेरा। हना अरो दाः हचकाःता इया अरू बदरीराः मुरुक सटी हदूड़ इया दोहोना। हँकू सेरेंगा, “हालेलुयाह, अबूरीग परबू भगवान अगम जंगरदार इदानिया, अरू हाँय राइजगेतना।

⁷ दोबू अबू बहालते, भबराः घड़ीन हाँयबू जाग। भेड़ा होनराः बियाह निचकाःतना। अरू हाँयरीग कनिया सपड़ावतो इदानिया। हनालगा हाँयबू जागता।

⁸ सफा अरू फिटीक सान सोनहे तुसिंग लगा कनिया पवावनेना।” अरू हना सफा अरू फिटीक सान सोनहे भगवानरिकुःआ सुद होड़कूराः नपाय बुता हवे।

⁹ हनते सेरमो देसरीग बराहील ईंग एचेरेय कतातेरा, “ओजाःगेमे। भेड़ा होनराः बियाह भोज जोम लगा टिवाकू पवावनेना हँकुःआ होड़कूराः जीव भगवान नपायगेता।” हनते हाँय अरूय कतातेरा, “नाःआ कताकून भगवानराः सताय कताकून हवे।”

¹⁰ हनते ईंग हाँय जाग लगा हाँयराः काट कुटीरेयिंग तबेरनेना। मनदो हाँय ईंग एचेरेय कतातेड, “नाःआ इया अलोम एचेय। आम अरू एटाः बिसवासी होड़कू इया, ईंग हों ईसूरीग सेवकिया हवे। आम इया ईंग हों ईसूराः हिदइतिंग उदुःता। अरू भगवानराः बड़रा कता होड़कू हों ईसूराः हिदइतकू उदुःता। हनालगा भनगवानमे जाग।”

उजड़ घोड़ा सलावदार

¹¹ हनते ईंग सेरमो देस गीगतोयिंग ञेलतेरा अरू हंडा मीटोंग उजड़ घोड़ा दोहोना। हाँयग घोड़ा चोटरे मी होड़ दुड़ुःतोय दोहोना। हाँयराः ञाव बिसवासगेयीग अरू सताय हवे माःआनकू कतावायता। हाँय सतायते फड़ियाव घड़ीने लड़ाइता।

¹² हाँयराः मेड हितकाःतो सेंगेल इया इदा अरू हाँयराः बोःरे राजाकूराः मुरुक पगरीकून इदा। हाँय चोटरे मीटोंग ञाव ओजाःतो दोहोना। हना ञाव हाँय अते एटाःयीग तोनोंगीग मेनेरकू सुसुदीता।

¹³ हाँय बलंगी इरचीत झोलोंग सोनहेय तुसिंगकेरा अरू हाँयराः एटाः ञाव, भगवानराः सरवन हवे।

¹⁴ सेरमो देसरिकुःआ सइनाकू उजड़ सफा सान सोनहेकू तुसिंगकेरा अरू उजड़ उजड़ घोड़ाकू सेरमो दुडुःकियानखन हाँय तयोम तयोमकू सलाःतना।

¹⁵ राइज राइजरिकुःआ होड़कू ञेड लगा हाँयराः आहते मीटोंग लसेर तलवइर उडुंगगुःतना। हाँय लोहाराः बोंग साबकेडखन हँकू एचेरेय राइजगेता। हाँय अंगूरराः रस उडुंग लगा डोडहारे अनँयग आँयग धड़ियावगेता। हना डोडहा अगम जंगरदार भगवानराः रंजावतो रीस उदुःता।

¹⁶ हाँयराः सोनहेरे अरू हाँयराः पिंडातेनरे मीटोंग नाःआ इया ञाव ओजाःतो इदा, राजाकूरीग राजा अरू परबूकूरीग परबू।

¹⁷ हनते मीटोंग सेरमो देसरीग बराहील बेररे चड़ाँतोयिंग ञेलतिरिया। हाँय मुरुक सटी खिररीनेनखन सेरमोरेकू उडाःआ हँकुःआ जमा तितीगकू राः घड़ीने कताया, “दबूपे, भगवानराः मरंग भोज जोम लगापे वेग जुमाः।

¹⁸ अपे राजाकूराः मास, अरू मरंग सइना होड़कूराः मास, अरू जंगरदार होड़कूराः मास, अरू घोड़ाकूराः मास, अरू घोड़ा सलावदारकूराः मास, अरू सेवकियाकूराः मास, अरू मालिकूताकूराः मास, अरू हुडिंग होड़कू अरू मरंग होड़कू, जमा होड़कूराः मास जोजोम लगापे वेग जुमाः।”

¹⁹ हनते हाँयग जानर अरू चउंदीसरिकुःआ राजाकू अरू अँकूरिकुःआ सइनाकू मिनीरे जुमावतो ईंग ञेलतेडकुःआ। हँकू उजड़ घोड़ा चोटरे दुड़ुःतो होड़ अरू हाँयरिकुःआ सइनाकू सुदा लड़ाइ लगाकू जुमावनेना।

²⁰ मनदो हँकू हाँयग जानर अरू हाँय सुदा भगवानराः बड़रा लबराते कतायीग होड़ होंकू साबतेरा। भगवानराः बड़रा लबराते कतायीग होड़ जानर मड़ंगरे बयाव जुवाः इयाःआ चिनहाकूने एचेया। मड़ंगरे हाँय हना बयाव जुवाः इयाःआ चिनहाकूनते, हाँयग जानरराः चिनहाकू गोःतेरा अरू हाँयग जानरराः मुरतीकू सेवाःआ हँकुःआ होड़कूय अडिगतेडकुःआ। हँकिनकू साबतेरा हना तयोमरे, हँकिन बनर जिनियत जीयत सेंगेलराः हुडिंग समुंदररेकू रेमगे बोलोगोतेडकिन। हना सेंगेलराः हुडिंग समुंदररे लेटे दिरि हितकाःआ।

²¹ जानररिकुःआ सइनाकू जमाकू उजड़ घोड़ा सलावदारराः आहते उडुंगनेना हना तलवइरतेकू ञेड एंडायान। अरू जमा तितीगकू हँकूराः मास मुरुक हबर-सबरकू जोम बी ञेडयान।