उदुःतो कताकून 18 - Korwa Bible

बाबील सहर लाययना

¹ हनते अरू मीटोंग बराहील सेरमो देस अते वेगतो ईंग ञेलतिरिया। हाँयग बराहील एचेरे मरंग हातपात दोहोना अरू हाँय मुरुके विड़चेड़ा, अरू हाँयराः मरसलते जमा चउंदीस मरसलयान।

² हाँय मुरुक सटी खिररीनेनखने कतातेरा, “लाययना, लाययना, मरंग सहर बाबील लाययना, हना भूतकूराः ओड़ाः बड़ाँवयना, जमा बरानाः बेलूर दरहाकूराः थान, बेलूर अरू एरंगवाकूताकू हँकुःआ जमा बरानाः तितीगकूराः बथान बड़ाँवयना।

³ जमा जइत होड़कू गोड़ावयान, हँकू नाःआ सहररिकुःआ होड़कूराः सनहा बुतातेकू गोड़ावयान। चउंदीसरिकुःआ राजाकू हँकू सुदाकू सनहानेना, अरू चउंदीसरिकुःआ फेरवइत होड़कू हँकूराः बेलूर बुताराः ओंगोलतेकू गिरहतनेना।”

⁴ हनते सेरमो देस अते अरू मीटोंग अरोयिंग अयूमतेरा, “ने ईंगरिकुःआ होड़कू, हना सहर अते उडुंग वेगपे, जेमहा अपे हँकूराः कसूररे अलोपे मेसान, अरू हँकूराः तोनोंगाः हइजा, अपे एचेरे अलो पराः।

⁵ हँकूराः कसूर सेरमो देसरे हों बगरायान, अरू भगवान हँकूराः गारबारे उहियार अगूकेरा।

⁶ हँकू एटाःकू सुदाकू एचेकेरा हनन इया हँकू सुदापे एचेय, अरू बार गुना बदलापे कुदागोड।

⁷ हँकू अँननकू मरंग बड़ाँवनेनखनकू अहाल-बहालनेना हिनिनमिन हँकू लगा कटसिया अरू पीरापे एमेवाकू। हँकू अँननकूराः जीवरेकू ओंगलुःता, अले रानी इयाले दुड़ुःकिया; अले रंडियाहीन कोवालेःआ, अरू कहियो ओरोले फिकरावनेना।

⁸ हनालगा हँकू एचेरे मिनी दिनरे जमा बरानाः हइजा, गुजुः, फिकीर अरू कतकाल सुदरुःता। हँकूय फड़ियावता, हाँयग परबू भगवान अगम मरंग इदानिया, हनालगा हाँय सेंगेलतेय लाय एंडागोडकूता।”

⁹ हँकू सुदाकू सनहानेना अरू अहाल-बहालतेकू दोहोना, हँकुःआ चउंदीसरिकुःआ राजाकू फिकिराःता। हँकू लोःता हना सेंगेलराः सोकोलकू ञेल मेला कुड़ोम चपाड़ घड़ीनकू इयामता।

¹⁰ हाँयराः पीराराः बोरते, हँकुःआ राजाकू हँकू अते मुरुक लंकारे चड़ाँकियानखनकू इयामता, “ओहरे! मरंग सहर, ने पकड़ बांद सहर बाबील, मिनी जूदा डंडपे पवावयान।”

¹¹ तोनोंगीग हँकूराः जिनिसकून मेरकू किजायता, हनालगा चउंदीसरिकुःआ फेरवइत होड़कू हँकू बदीरे इयाम घड़ीनकू फिकिराःता।

¹² हना जिनिसकून नाःआ हवे; सोना, चाँदी, मुरुक किमइतराः दिरि, मुती, सान, तिरिकाट सोनहे, लाल सोनहे, धुः-धुमइल सोनहे, नपाय महकराः कठवा, हथी खिसाते तुलात जिनिसकून, मुरुक किमइतराः कठवाते तुलात जिनिसकून, पितड़, लोहा, संगमरमर दिरि,

¹³ सेबेल बकला, मसाला, सकला, इतर, लसा, दारू, सुनुम, मइदा, गोहोम, उरिगकू अरू भेड़ाकू, घोड़ाकू अरू रंतकून, बेगारी होड़कू अरू मनुवाकूराः जीव।

¹⁴ हँकू कतायता, “ने बाबीलरिकुःआ होड़कू, अपे चहाःआ, हना जमाकून अपे अते चलाः एंडायान, अरू नाय नपाय अरू मुरुक किमइतराः जिनिसकून अपे अते तोरेयना, अरू हान कहियो ओरोपे पवावनेना।”

¹⁵ नाःआ जिनिसकूनरिकुःआ फेरवइत होड़कू, नँकू अते मुरुककू गिरहतनेना। अरू हँकुःआ होड़कू हँकूराः पीराराः बोरते, हँकू अते मुरुक लंकारे चड़ाँकियानखन फिकिराः घड़ीनकू इयामता,

¹⁶ “ठीकयना, ठीकयना, ने मरंग सहर, अपे सान सोनहेपे तुसिंगतेरा, अरू धुः-धुमइल अरू लाल सोनहे अपे एचेरे दोहोना सोना अरू मुरुक किमइतराः दिरि, अरू मुतीकूनतेपे सिंगारनेना।

¹⁷ मनदो मिनी जूदा अपेराः जमा आन-धान लाय एंडायना।” जमा दाः जहाजरिकुःआ मालिककू, अरू दाः जहाजरेकू सेनता हँकुःआ होड़कू अरू दाः जहाज सलावदारकू, अरू समुंदर अते एटाः एटाः इयाकू बुता अदेर जोमता हँकुःआ होड़कू, हँकू जमाकू मुरुक लंकारेकू चड़ाँनता,

¹⁸ अरू सहर लोःता हना सोकोल ञेलकेडखनकू खिररीता, “जमा सहरकून अते मनारंग सहर ननानाः सहर दोहोना, माःआन।”

¹⁹ हँकू अँनकूराः बोःरे धुंदराकूनकू गिरहाता अरू इयाम घड़ीनकू फिकिराःता अरूकू खिररीता, “ठीकयना, ठीकयना, ने मरंग सहर, दाः जहाजकून अँननकू एचेरे दोहोना हँकुःआ होड़कू जमाकू गिरहतयानकू। मनदो मिनी जूदारे, हना मरंग सहर लाय एंडायना।

²⁰ ने सेरमो देसरिकुःआ, अरू भगवानरिकुःआ सुद होड़कू, ईसूरिकुःआ मूक चेलाकू अरू भगवानराः बड़रा कता होड़कू, हाँय अपे सुदाय एचेतेरा, हनन इया भगवान हँकूय एमे बदलावारा। हनालगा अपे बनाहालतेपे दोहोन।”

²¹ हनते मीटोंग मुरुक जंगरदार बराहील मीटोंग मरंग दिरिय रेमतेरा अरू समुंदरेय तेके बोलोगोतेड। अरू हाँय कतातेड, “ननन इयाःआ जंगरते मरंग सहर बाबील रेमगे एंडानता, अरू हना सहर कहियो ओरो दोहोनेना।

²² तंबुररा बबजाकू अरू सेरेंगदारकू अरू बसुरी बबजाकू अरू मरंग सोहनाई बबजाकूराः अरो कहियो ओरोकू अयूमतेरा। आम सहररे कड़िगारकू ओरोकू दोहोनेना अरू जंता दड़ी वीरीत कहियो ओरोकू अयूमतेरा।

²³ अरू ढिबरीराः मरसल आम एचेरे कहियो ओरो विड़चेड़नेना। अरू कनिया अरू बारराः ओरो कहियो ओरोकू अयूमतेरा। आमरिकुःआ फेरवइत होड़कू चउंदीसरिकुःआ मरंग होड़कू दोहोना अरू आमराः पंगनाहा अते चउंदीसरिकुःआ जमा होड़कू बहकावयान।

²⁴ भगवानराः बड़रा कता होड़कू अरू सुद होड़कूराः बलंगी अरू चउंदीसरेकू ञेड एंडातेडकुःआ, हँकुःआ होड़कूराः बलंगी अँननपे एचेरे इदा।”