उदुःतो कताकून 17 - Korwa Bible

मरंगीग सनही अइमी अरू जानर

¹ डुभाकू साबतेरा हँकुःआ सातगोटोंग सेरमो देसरिकुःआ बराहीलकू अते मी होड़ बराहील ईंग एचेरे वेजेडखने कताया, “दूमे, मुरुक ततेरराः दाःरेय दुड़ुःकिया हाँयग मरंग सनही अइमी, करा इया भगवान फड़ियावगेयता, हना आमिंग उदुःवाता।

² हाँय सुदा चउंदीसरिकुःआ राजाकू सनहानेना अरू चउंदीसरिकुःआ होड़कू हाँयराः सनहा-सनही बुतातेकू गोड़ावयान।”

³ हनते ईंग सुद बिरुवातेयिंग पेरेगयान अरू हाँयग बराहील ईंग टयंगाब ततेर अगीय गोःयाडिंग। हंडा मीटोंग लाल रंगीग जानरिंग ञेलतेरा। हाँयग जानर चोटरे मी होड़ अइमी दुड़ुःकुःआ। हाँयग जानर चोटरे भगवान ओपतागेराः मुरुक ञावकून ओजाःतो दोहोना। हाँयग जानरराः सातगोटोंग बोः अरू दसगोटोंग देरेंग दोहोना।

⁴ हाँयग अइमी मी होड़ रानी इया धुः-धुमइल अरू लाल सोनहेय सोहेंकातेरा। हाँय सोना अरू मुती अरू मुरुक किमइतराः दिरिकूनराः तुलात सिंगारकूने तुसिंगकातेरा। हाँयराः तिःईरे सोनाराः मीटोंग डुभा दोहोना। हना डुभारे एरंगवाताकू हना जिनिसकून अरू हाँयग अइमीराः बेलूर बुताराः गरदाते पेरेगतो दोहोना।

⁵ अरू हाँयराः समांगरे नाःआ ओकोत इयाःआ ञाव ओजाःतो दोहोना, मरंग सहर बाबील, जमा चउंदीसरिकुःआ सनही अइमीकूरीग एंगात अरू जमा बरानाः एरंगवाताकू हना जिनिसकूनराः सूती।

⁶ हाँयग अइमी, ईसूराः सताय कताकू कताया, हँकुःआ भगवानरिकुःआ सुद होड़कूय ञेड एंडातेरा अरू हँकूराः बलंगी ञूतेडखन बुनूलतोयिंग ञेलतिरिया। ईंग हाँयिंग ञेलतेड दो मुरुकिंग बयावयान।

⁷ हनते हाँयग बराहील ईंग एचेरेय होंबोरतेरा, “आम चिला लगाम बयावयना? सातगोटोंग बोः अरू दसगोटोंग देरेंग इदा हाँयग जानर बदीराः अरू, हाँय चोटरे दुड़ुःतो इदानिया हाँयग अइमी बदीराः ओकोत कता, ईंग एचे बुझावगोडमेता।

⁸ आम ञेलतिरिया हाँयग जानर, मड़ंगे दोहोना, अरू नुँहू गोएगतो इदानिया, अरू अनँयग एचे लाय एंडन लगा, पतालपूर अतेय उडुंग वेगता। चउंदीसराः बुँहड़ी अते, जीवराः कागदरे ञाव ओजाःतो कोवानेःआ, हँकुःआ होड़कू हाँयग जानर ञेलकेडखनकू बयाव जुवाःता। हाँयग जानर मड़ंगे दोहोना, अरू नुँहू गोएगतो इदानिया, अरू कुदा तयोमगुःताय। हनालगा हँकू हाँय ञेलकेडखनकू बयाव जुवाःता।

⁹ नाःआ सुदीगे लगा अपेके कनहूनदारकू बड़ाँः लगा इदा। सातगोटोंग बोःरे हाँयग अइमी दुड़ुःकिया हान सातगोटोंग पहाड़कून हवे।

¹⁰ हना सातगोटोंग बोः सातगोटोंग राजाकू हवे। पाँचगोटोंग राजाकू गोएगयना, अरू मी होड़ नुँहू इदानिया, अरू मी होड़ अरीने वेगा। मनदो हाँय वेग दो, हाँय हुडिंग बेला वरीय राइजगेता।

¹¹ मड़ंगे दोहोना हाँयग जानर, अरू नुँहू गोएगतो इदानिया, हाँय जियाव रेमकियानखन आठ नमारीग राजाय बड़ाँःता। हनते हों हाँय सातगोटोंग राजाकू अते मी होड़े दोहोना अरू हाँय लाय एंडन लगा इदानिया।

¹² दसगोटोंग देरेंगमे ञेलतेरा, हान दसगोटोंग राजाकू हवे। हँकू नुँहू वरी राइजगेराः हातपात मेरकू पवावगान। हँकू हाँयग जानर सुदा राइजगेराः हातपात मी घंटा लगाकू पवाःता।

¹³ हँकू जमाकू मी ओंगोलतेकू दोहोनता अरू हँकू अँननकूराः जंगर अरू हातपात हाँयग जानर लगाकू जिमायता।

¹⁴ हँकू भेड़ा होन सुदाकू लड़ाइता। मनदो हाँयग भेड़ा होन राजाकूरीग राजा अरू परबूकूरीग परबू हवे। हनालगा हाँय हँकूय हरुवावगोडकूता। हाँय सुदा इदानकुःआ हँकुःआ होड़कू हों हाँय सुदाकू जीताव जुवाःता। हँकू राःतो, अरू सुनावतो, अरू बिसवासगे इयाकुःआ हवे।”

¹⁵ हनते हाँयग बराहील ईंग एचेरेय कतातेरा, “हाँयग अइमी दाःरे दुड़ुःतोम ञेलतिरिया, हना दाः मुरुक बगरा होड़कू हवे। हँकुःआ होड़कू एटाः एटाः जइतरिकुःआ, अरू एटाः एटाः भासीरिकुःआ अरू एटाः एटाः राइजरिकुःआ होड़कू हवे।

¹⁶ अरू दसगोटोंग देरेंगमे ञेलतेरा, हँकू अरू हाँयग जानर, हाँयग सनही अइमीकू हिनइस-बिनइसवाता। हँकू हाँयकू नरी नठीगोडेयता अरू एकेतेकू अड़गेयता। हँकू हाँयराः मासकू जोम एंडागोडता अरू हाँय सेंगेलरेकू बाल लोगोडेयता।

¹⁷ हँकुःआ राजाकू मिनी ओंगोलते दोहोन लगा अरू अँनकूराः हातपात जानर एचेरेकू जिमाय लगा भनगवान हमा हँकू जीवरे हना ओंगोले सोलोंगगोतेड। अरू भगवानराः जमा कतत बड़रा अरीन होयाः वरी नाःआ इयाकू एचेगोड ञवनता।

¹⁸ आम ञेलतिरिया हाँयग अइमी, चउंदीसरिकुःआ राजाकू एचेरेय राइजगेता हना मीटोंग मरंग सहर हवे।”