उदुःतो कताकून 16 - Korwa Bible

भगवानराः रीसराः सातगोटोंग डुभाकून

¹ हनते ईंग भगवानराः ओड़ाः अते सातगोटोंग सेरमो देसरिकुःआ बराहीलकू एचेरे तोनोंगीग कतातिंग अयूमतेरा, “दूपे, अरू भगवानराः रीसराः सातगोटोंग डुभाकून ओतरेपे दूलगोड।”

² दो मी होड़ सेरमो देसरीग बराहील सेनेकियानखन अनँयगराः डुभा ओतरेय दूलगोतेड। अरू जानरराः मुरतीकू सेवाःआ हँकुःआ होड़कू एचेरे अरू हाँयराः चिनहाकू गोःतेरा हँकुःआ होड़कू एचेरे, सेयात अरू हसूत इया पुड़सूड़ रेमनेना।

³ हनते बार नमारीग सेरमो देसरीग बराहील अनँयगराः डुभा समुंदररेय दूलगोतेड। दो समुंदरराः दाः गोएगतो होड़राः बलंगी इया एड़ेगयान। अरू समुंदररिकुःआ जमा जीव-जंतूकू गोएगयान।

⁴ हनते पेय नमारीग सेरमो देसरीग बराहील अनँयगराः डुभा नईकून अरू दाः सूतीकूनरेय दूलगोतेड, अरू हना दाः बलंगीयान।

⁵ हनते दाःराः हातपाते पवावनेना हाँयग बराहील कतातिंग अयूमतिरिया, “ने सुद भगवान, आम इदानमेःआ अरूम दोहोना, आम नाःआ फड़ियावरे सताय इदानमेःआ।

⁶ मुदइ होड़कू आमराः बड़रा कता होड़कू अरू आमरिकुःआ सुद होड़कूराः बलंगीकू एचे तूतेरा, हनालगा आम, हँकूके पवाः लगा दोहोना हनन इया हँकू बलंगीम एचे ञूतेडकुःआ।”

⁷ हनते ईंग धाम अगीते मीटोंग अरोयिंग अयूमतेरा, “हाव, ने अगम जंगरदार परबू भाबी भगवान, आमराः फनड़ियाव जनामा सताय अरू नपाय इदा।”

⁸ हनते चाइर नमारीग सेरमो देसरीग बराहील अनँयगराः डुभा बेररेय दूलगोतेड अरू हनाते होड़कू सेंगेलते भुरटावकू लगा बेर हातपाते पवावनेना।

⁹ हँकू हना सेंगेलरे मुरुककू भुरटावयान दो हँकू, हइजाकून एचेरे हातपात दोहोना हाँयग भगवानकू सती-सरापा। अरू तोनोंगीग अँनकूराः कसूर अते भगवान अगी जीव मेरकू कुदागाड अरू हाँय मेरकू मान मरजइतगडीग।

¹⁰ हनते पाँच नमारीग सेरमो देसरीग बराहील अनँयगराः डुभा, हाँयग जानरराः गदीरेय दूलगोतेड। दो हाँयराः राइजरे भीट भीट अंदरायान अरू होड़कू मुरुक पीराते अँनकूराः अलंगकू हवाः लेंडेगा।

¹¹ हँकू अँनकूराः पीरा अरू पुड़सूड़ते सेरमो देसरीग भगवानकू सती-सरापा। हनते हों हँकू अँनकूराः कसूर अते भगवान अगी जीव मेरकू कुदागाड।

¹² हनते छो नमारीग सेरमो देसरीग बराहील अनँयगराः डुभा, मरंग फरात नईरेय दूलगोतेड। दो हना नईराः दाः अंजेडयान, जेमहा पुरुब देसरिकुःआ राजाकू लगा दूर बड़ाँव जुवाः।

¹³ हनते ईंग हाँयग लाल मरंग बींगराः आहते, अरू जानरराः आहते अरू भगवानराः बड़रा लबराते कतायीग होड़राः आहते मेमेडटोंग मेमेडटोंग भूतकू रोकेगकू इयाकू उडुंगुःतो ईंग ञेलतेडकुःआ।

¹⁴ नँकुःआ पेनेय भूतकू एचेरे बयाव जुवाः इयाःआ चिनहाकून उदुः लगा जंगर दोहोना। हँकू चउंदीसरिकुःआ जमा राजाकू एचेरे सेनेकियानखन अगम जंगरदार भगवानराः मरंग दिनरे हाँय सुदा लड़ाइ लगाकू एचे जुमावकुःआ।

¹⁵ “अयुमेपे, ईंग इनिग होड़ इया अपे एचेरे असाकायिंग सेनता। जगियातकू दोहोनता अरू अँनकूराः सोनहेकू सपड़ाव दोहोकाता, हँकुःआ होड़कूराः जीव भगवान नपायगेता। हँकुःआ होड़कू एकेते मेरकू दोहोनता अरू हँकू ओरोकू गियूनेना।”

¹⁶ हनते हँकू हँकुःआ राजाकू मी ततेररेकू एचे जुमावतेडकुःआ। हना ततेरराः ञाव इबरानी भासीरे हर-मगीदोन माःआनकू कतावाता।

¹⁷ सात नमारीग सेरमो देसरीग बराहील अनँयगराः डुभा होयरेय दूलगोतेड। दो भगवानराः ओड़ाःराः गदी अते मीटोंग मुरुक सटी अरोयिंग अयूमतेरा, “होनोयायना!”

¹⁸ अरू हनमेला ठेड़ररे विड़चेड़ा अरू बदरी हदूड़ा अरू ओत डोलाःआ। भगवान मनुवाकूय तुलातेरा हना वरीते नाःआ इयाःआ मरंग ओत डोलाः कहियो मेर होयागान।

¹⁹ हना ओत डोलाःते मरंग सहर बाबील पेय फड़ायान, अरू एटाः एटाः राइजकूनराः सहरकून वाः बोलोयान। हनन इया भगवान मरंग सहर बाबीलरिकुःआ होड़कू आँयगराः रीसराः डुभाय एचे ञूतेडकुःआ।

²⁰ जमा डुगुकून टगावयान अरू जमा पहाड़कून केड़ेयान।

²¹ अरू मरंग मरंग अरील होड़कू सेरमो लोजोरनेना। हना अरील मेमेडटोंग पचास पचास किलो दोहोना। हना अरील मुरुक घान लुजरुःआ, हनालगा होड़कू भगवान मुरुककू सती-सरापगेया।