उदुःतो कताकून 15 - Korwa Bible

सातगोटोंग हइजाते सातगोटोंग बराहीलकू

¹ हनते सेरमो देसरे मीटोंग मरंग अरू बयाव जुवाः इया चिनहायिंग ञेलतेरा। हंडा सातगोटोंग बराहीलकू दोहोना अरू हँकू एचेरे सातगोटोंग हइजा दोहोना। नाःआ टुटीग हइजाते भगवानराः रीस चबायान।

² हनते सेंगेल मेसातो काँचराः समुंदर इया तोनोंगाः ईंग ञेलतेरा। अरू हना समुंदर धरीरे मुरुक होड़कू चड़ाँयान। हँकू जानर एचेरेकू जितावनेना। हँकू हाँयग जानर अरू हाँयराः मुरती मेरकू जागगाड, अरू हँकू हाँयग जानरराः नमार हों मेरकू गोःगाड। अरू भगवान एमेवातेडकुःआ हना तंबुरराकूनकू साबकातेरा,

³ अरू भगवानरीग सेवकिया मोसेसराः सेरेंग अरू भेड़ा होनराः सेरेंगकू सेरेंगा, “ने अगम जंगरदार परबू भगवान, आमराः बुता मरंग अरू बयाव जुवाः इया इदा। ने जूग परिया वरीयीग राजा, आमराः दूर नपाय अरू सताय हवे।

⁴ ने परबू, इये आम सुदा ओरोय बोरोनेना, अरू आमराः ञाव इये ओरोय जागतेरा? अनम एकला सुद इदानमेःआ। आमराः जमा नपाय बुता होड़कू सुदीगोतेरा, हनालगा जमा जइत होड़कू वेगकियानखन आमकू जागता।”

⁵ हनते ईंग भगवानराः ओड़ाः, मतलोब भगवान सुदा जुमाःराः टपइर ओड़ाःराः दुवार, सेरमो देसरे गीगतोयिंग ञेलतेरा।

⁶ अरू हना ओड़ाः अते सातगोटोंग बराहीलकू उडुंगयना। हँकू एचेरे सातगोटोंग हइजा दोहोना। हँकू सफा फिटीक उजड़ सोनहेकू तुसिंगकातेरा। अरू हँकूराः कुड़ोमरे सोनाराः पंछा तगात दोहोना।

⁷ हनते चइरो जीव-जंतूकू अते मीटोंग जीव-जंतू हँकुःआ सातो बराहीलकू एचेरे मेमेडटोंग मेमेडटोंग सोनाराः डुभाय एमेवातेडकुःआ। सगर सइट वरी दोहोनता हाँयग भगवानराः रीस हना डुभाकूनरे पेरेगतो दोहोना।

⁸ भगवानराः मान मरजइत अरू जंगर अते भगवानराः ओड़ाः सोकोलते कुहा कटड़ायान। हँकुःआ सातो बराहीलकू हना हइजाकून अरीनकू दूल चबाय वरी, तोनोंगीग भगवानराः ओड़ाःरे मेरकू बोलो अवेगान।