उदुःतो कताकून 14 - Korwa Bible

भेड़ा होन अरू मुरुक बगरा होड़कू

¹ हनते ईंग भेड़ा होन सीयोन पहाड़रे चड़ाँतिंग ञेलतिरिया। अरू हाँय सुदा मी लाक चउवालीस हजार होड़कू दोहोना। हँकुःआ होड़कूराः समांगरे हाँयराः ञाव अरू आँयगरीग अपातराः ञाव ओजाःतो दोहोना।

² हनते ईंग सेरमो देस अते मीटोंग अरोयिंग अयूमतेरा। हना अरो दाः तूःता हना अरो इया होदो होदो विरीना अरू बदरीराः मुरुक सटी हदूड़ इया दोहोना। ईंग अयूमतेरा हना अरो तंबुरराराः अरो इया गुंगूर गुंगूर विरीना।

³ हँकुःआ होड़कू गदीराः मड़ंगरे अरू चइरगोटोंग जानरकू अरू चूबीसगोटोंग मूक होड़कू मड़ंगरे मीटोंग नँवा सेरेंगकू सेरेंगा। भगवान चउंदीस अतेय सडावतेडकुःआ, हँकुःआ मी लाक चउवालीस हजार होड़कू एनेकला हना सेरेंगकू चेड अवेनेना।

⁴ हँकू जमाकू कुवाँर इदानकुःआ, अरू कहियो तोनोंगीग अइमी सुदा मेरकू गेतेग मइलावगना। अरू भेड़ा होन हँकूय अगुवाइवाकूता, हनन अगी हाँय तयोम तयोमकू सेनता। हँकुःआ होड़कू मनुवाकू अते बुताराः मड़ंग बंटा इया भगवान अनँयग लगा अरू भेड़ा होन लगाय सडावतेडकुःआ।

⁵ हँकू कहियो मेरकू लबरागान अरू बेगर गारबारते इदानकुःआ।

पेयगोटोंग बराहीलकूराः सरवन

⁶ हनते अरू मीटोंग सेरमो देसरीग बराहील बदरी अते लताररे दोनतोयिंग ञेलतिरिया। हाँय एचेरे सगर सइट वरी दोहोनता हना नपाय सरवन दोहोना। हना सरवन चउंदीसरिकुःआ जमा जइत होड़कू, अरू जमा गोतोररिकुःआ होड़कू अरू जमा भासीरिकुःआ होड़कू अरू जमा राइजरिकुःआ होड़कू एचेरे हाँय पपसार लगा दोहोना।

⁷ हाँय मुरुक सटीतेय कतातेरा, “भगवान जमाकू फड़ियावकू लगा बेला सोदोरयना। हनालगा अपे बोर घड़ीन हाँयपे मान मरजइत। सेरमो अरू ओत अरू समुंदर अरू दाः सूतीकूने तुलाकेरा, हाँयग भगवानपे जाग।”

⁸ हनते बार नमारीग सेरमो देसरीग बराहील हाँय तयोमते वेजेडखने कताया, “लाययना, लाययना। मरंग सहर बाबील लाययान। नाःआ सहर मी होड़ सनही अइमी इया जमा जइत होड़कू अनँयगराः कोसोड़ाय एचे ञूतेडकुःआ अरू बेलूर बुताय एचे बुतातेडकुःआ।”

⁹ हनते पेय नमारीग सेरमो देसरीग बराहील वेजेडखन मुरुक सटीतेय कतातेड, “तोनोंगीग होड़ हाँयग जानर अरू आँयगराः मुरतीय जाग, अरू अनँयग समांगरे सहे तिःईरे जानरराः चिनहाय गोः,

¹⁰ भगवान हँकू सुदा मुरुके रीस रंजाव जुवाःता। अरू हाँय सेरमो देसरिकुःआ सुद बराहीलकू अरू भेड़ा होन मड़ंगरे हितकाःतो लेटे दिरि गुंडा अरू सेंगेलते हँकुःआ होड़कू मुरुक पीरारेय एचे परावकूता।

¹¹ हँकूराः पीरा सेंगेलते होयाःता अरू हना सेंगेलराः सोकोल सगर दिन सोकोलगोड ञवनता। हाँयग जानर अरू आँयगराः मुरतीकू जाग, अरू अनँयग समांगरे सहे तिःईरे जानरराः चिनहाकू गोः, हँकुःआ होड़कू दिनरे सहे रइतरे हों ओरोकू लोड़ो अवेनेना।”

¹² नाःआते भगवानराः हुकुमकू मनाःता अरू ईसू मसी एचेरेकू बिसवासगोड ञवनता, हँकुःआ भगवानरिकुःआ सुद होड़कू सहाव घड़ीन दोहोन लगा इदा।

¹³ हनते ईंग सेरमो देस अते मीटोंग अरोयिंग अयूमतेरा, “नाःआम ओजाः। नुँहू वरीते परबू एचेरे बिसवासकेडखनकू गुजुःता, हँकुःआ होड़कूराः जीव-जहन भगवान नपायगेता।” हनते भगवानराः बिरुवा कता कुदातेरा, “हाव, हँकू अँननकूराः बुता इया इमानकू पवाःता, अरू अँननकू मुरुककू मिहनइतकेरा अतेकू लोड़ोनता।”

फड़ियावगेराः दिन दरवाःआ

¹⁴ हनते मीटोंग उजड़ बदरीयिंग ञेलतेरा अरू हना बदरीरे मनुवारीग बेटात इया तोनोंगीग दुड़ुःकिया। हाँय सोनाराः पगरीय तुसिंगतेरा अरू मीटोंग लसेर दतरोम तिःईरेय साबतेरा।

¹⁵ हनते भगवानराः ओड़ाः अते मीटोंग सेरमो देसरीग बराहील उडुंगनेनखन, बदरीरेय दुड़ुःकिया हाँय एचेरे मुरुक सटीतेय कतातेरा, “चउंदीसराः सरा बेलेयना अरू इईरराः बेला सोदोरयना। हनालगा आम दतरोमते ईरमे।”

¹⁶ दो बदरीरेय दुड़ुःकुःआ हाँय, अनँयगराः दतरोम चउंदीसरेय सलावतेरा अरू चउंदीसराः सरा ईरयान।

¹⁷ हनते अरू मीटोंग सेरमो देसरीग बराहील सेरमो देसराः भगवानराः ओड़ाः अतेय उडुंगनेना। हाँय एचेरे हों मीटोंग लसेर दतरोम दोहोना।

¹⁸ हना तयोमरे अरू मीटोंग एटाःयीग सेरमो देसरीग बराहील धाम अगीतेय वेजेडा। हाँयके सेंगेल एचेरे हातपात दोहोना। हाँय दतरोमे साबतेरा हाँयग बराहील एचेरे मुरुक सटीय कतातेरा, “चउंदीसराः अंगूर जमाकून दो बेलेयना। हनालगा आमराः लसेर दतरोमतेम ईर।”

¹⁹ हनते हाँयग बराहील चउंदीसरे हना लसेर दतरोमे लेबदागोतेड अरू जमा अंगूरे बटुड़ावतेरा। हनते हना अंगूर, लेनगेताकू हना मीटोंग डोडहारेय सोलोंगगोतेड। हना डोडहा भगवानराः रीस उदुःता।

²⁰ हना डोडहा सहरराः बहरी दोहोना। अंगूरकू लेनतेरा हनमेला मुरुक बलंगी उडुंगनेना। अरू हना बलंगी घोड़ाकूराः आहराः लगाम वरी देगयान अरू मी सव कोस मिन तूयान।