उदुःतो कताकून 13 - Korwa Bible

समुंदर अते उडुंगतो बारटोंग जानरकिन

¹ हनते ईंग मीटोंग जानर समुंदर अते उडुंगतोयिंग ञेलतिरिया। हाँयराः दसगोटोंग देरेंग अरू सातगोटोंग बोः दोहोना। हाँयराः मेमेडटोंग देरेंगरे मेमेडटोंग राजाराः पगरी दोहोना। हाँयराः मेमेडटोंग बोःरे भगवान ओपतागेराः ञावकून ओजाःतो दोहोना।

² ईंग ञेलतिरिया हाँयग जानरराः धउर हुंडर इया दोहोना, अरू हाँयराः काट हदरा काट इया दोहोना, अरू हाँयराः आह कूल आह इया दोहोना। हनते हाँयग लाल मरंग बींग आँयगराः जंगर अरू गदी अरू मरंग हातपात हाँयग जानरे जिमावातेरा।

³ हाँयग जानरराः मीटोंग बोःरे गोएग जुवाः इयाःआ मीटोंग घाव दोहोना। मनदो हना गोएग जुवाः इयाःआ घाव ओरेगयान। अरू चउंदीसरिकुःआ जमा होड़कू हाँयग जानर तयोम तयोम बयावगुः घड़ीनकू सेना।

⁴ हाँयग लाल मरंग बींग हाँयग जानर लगा आँयगराः हातपाते जिमागोतेड अते, जमा होड़कू हाँयकू जागतेरा। हँकू हाँयग जानर हों जाग घड़ीनकू कताया, “नाँयग जानर इया तोनोंगीग इदानिया जा? नाँय सुदा इये लड़ाइ अवेनता?”

⁵ बड़वार बड़रा अरू भगवान बदीरे ओपता बड़रा कता लगा हाँयग जानर हातपाते पवावनेना, अरू हाँय बयालीस महिना वरी राइजगे लगा हों हातपाते पवावनेना।

⁶ हाँय भगवान बदीरे ओपता बड़रा कता लगाय बुँहड़ीतेरा। हाँय भगवान बदीरे अरू हाँयराः ओड़ाः बदीरे अरू सेरमो देसरिकुःआ जमाकू बदीरेय ओपता घड़ीने कताया।

⁷ भगवानरिकुःआ सुद होड़कू एचेरे लड़ाइ लगा अरू हँकू सुदा जीताः लगा हातपाते पवावनेना। जमा जइत होड़कू, अरू जमा गोतोररिकुःआ होड़कू, अरू जमा राइजरिकुःआ होड़कू अरू जमा भासीरिकुःआ होड़कू एचेरे हातपाते पवावनेना।

⁸ चउंदीसराः बुँहड़ीन अते मड़ंग भगवान मुरुक होड़कूराः ञाव ञेड एंडात भेड़ा होनराः जीवराः कागदरेय ओजाः दोहोकेरा। अरू हना कागदरे ञाव ओजाःतो कोवानेःआ, हँकुःआ जमा होड़कू हाँयग जानरकू जागता।

⁹ “अयूम अवेयता हाँय अयूमया,

¹⁰ बिसवास बदीरे सींगगेय लगा इदानिया, हाँयग होड़ सिनिंगगुःता। अरू बिसवास बदीरे तलवइरते ञेड एंडागेय लगा इदानिया हाँयग होड़ तनलवइरतेय ञेड एंडनता। हनालगा नाःआ जमाकून होयाः हों भगवानरिकुःआ सुद होड़कू सहाव घड़ीन बिसवासगोड ञवन लगा इदा।”

ओत अते उडुंगतेरा हाँयग जानर

¹¹ हनते अरू मीटोंग जानर ओत अते उडुंगतोयिंग ञेलतिरिया। हाँय एचेरे भेड़ा होनराः देरेंग इया बारटोंग देरेंग दोहोना, अरू हाँय लाल मरंग बींग इयाय बुतुड़ुःआ।

¹² गुजुः इया घाव दोहोना अरू हना घाव ओरेगयान, हनाँय मड़ंगीग जानरराः हातपातते जमा बरानाः बुताय बुताःआ। नाँयग नँवा जानर, चउंदीसरिकुःआ जमा होड़कू, रेनहाकेडखन हाँयग मड़ंगीग जानरे एचे जागकुःआ।

¹³ हाँय मुरुक मरंग मरंग बयाव जुवाः इयाःआ चिनहाय उदुःवाकुःआ अरू होड़कू ञेने ञेल मेला हाँय सेरमो अते ओतरे सेंगेले एचे उयुःआ।

¹⁴ हाँयग जानरके मड़ंगीग जानर अते जंगरे पवावनेना। हनालगा हाँय बयाव जुवाः इयाःआ बुता एचे घड़ीन चउंदीसरिकुःआ होड़कूय बहकावा। हाँय हँकुःआ होड़कू एचेरेय कताया, “हाँयग जानर तलवइरतेकू ञेडतिरिया, मनदो मेरेय गोएगगान। दो हाँयराः मुरतीपे तुला।”

¹⁵ हाँय जानरराः मुरतीरे साँस ओंग लगा जंगरे पवावकिया, जेमहा हना मुरती बुतुड़ु अवेन अरू हना मुरती मेरकू जागगेयता, हँकुःआ होड़कू ञेड एंडाकू लगा हना मुरती हातपाते पवावकिया।

¹⁶ हाँय जमा होड़कूराः खउना तिःईरे सहे समांगरे मेमेडटोंग चिनहा लगावगे लगाय रेनहातेडकुःआ। मरंग होड़कू अरू हुडिंग होड़कू, गिरहत होड़कू अरू गरीब होड़कू, सेवकियाकू अरू मालिकूतुकू, हँकू जमाकू हना चिनहा गोःगो पराःता।

¹⁷ निही दो तोनोंगीग तोनोंगाः जिनिस ओरोकू किजा अवेतेरा सहे ओरोकू अकिरिंग अवेतेरा। हना चिनहा हाँयग जानरराः ञाव अरू हाँयराः ञावराः नमार उदुःता।

¹⁸ नाःआ सुदीगे लगा अपेके कनहूनदारकू बड़ाँः लगा इदा। अपे हना नमार चिला हवे माःआनपे ओंगोलगे। हना नमार मी होड़ होड़राः नमार हवे। अरू हाँयराः नमार 666 हवे।