उदुःतो कताकून 12 - Korwa Bible

मी होड़ अइमी अरू लाल मरंग बींग

¹ हनते सेरमो देसरे मीटोंग मरंग चिनहायिंग ञेलतेरा। मी होड़ अइमी बेरे ओयोकातेरा। बांगो हाँयराः काट पेंदा दोहोना अरू हाँयराः बोःरे बारहगोटोंग इपीलकूते सिंगारतो पगरी दोहोना।

² हाँय भरी पावरेय दोहोना अरू हाँय अमिंगगुःराः हसूरेय दोहोना। हनालगा हाँय मुरुक सटीय खिररीःआ।

³ हना तयोमरे सेरमो देसरे अरू मीटोंग चिनहायिंग ञेलतेरा। मीटोंग लाल मरंग बींग दोहोना। हाँयराः सातगोटोंग बोः अरू दसगोटोंग देरेंग दोहोना। हाँयराः सातगोटोंग बोःरे मेमेडटोंग मेमेडटोंग राजाराः पगरी दोहोना।

⁴ सेरमोरिकुःआ इपीलकू पेय बंटारे मी बंटा हाँयग लाल मरंग बींग अनँयगराः चड़रोमते ओतरेय झंटाव लोजोरगोतेडकू। हनते हाँयग लाल मरंग बींग हाँयग अइमीरीग लँइग जनमावगुः मेला ऊडगेय लगा अइमी मड़ंगरेय चड़ाँयान।

⁵ हनते हाँयग अइमी मी होड़ हेरेल होने जनमावतिरिया। हाँयग हेरेल होन लोहाराः बोंग साबतेडखन जमा जइत होड़कू एचेरे राइजगे लगाय दोहोना। हाँयग लँइग जनमावनेना हनानाः बेला सेरमो देसरीग बराहील लुड़ीकिडिगखन भगवान एचेरे अरू हाँय दुड़ुःकिया हना गदीरेय इदीगोतेडीग।

⁶ अरू हाँयग अइमी, भगवान हाँय लगाय सपड़ाव दोहोतेरा हना टयंगाब ततेर अगीय ञीरयान। हंडा हाँय 1,260 दिन वरीकू पला दरीगेया।

मरंग बराहील मिकाईल अरू लाल मरंग बींग

⁷ हनते सेरमो देसरे लड़ाइ होयानेना। भगवानरीग मरंग बराहील, मिकाईल अरू आँयगरिकुःआ बराहीलकू लाल मरंग बींग सुदा लड़ाइ लगाकू उडुंगनेना। अरू लाल मरंग बींग अरू आँयगरिकुःआ बेलूर बराहीलकू हँकू सुदाकू लड़ाइया।

⁸ मनदो लाल मरंग बींग अरू आँयगरिकुःआ बेलूर बराहीलकू मेरकू जीताव अवेगान। हनलगा हँकू सेरमो देसरे ओरोकू दोहो अवेनेना।

⁹ हनते हाँयग लाल मरंग बींग चउंदीसरेकू तेके लोजोरगोतेडीग। हाँय अरू आँयगरिकुःआ बराहीलकू सेरमो देस अतेकू तेके लोजोरगोतेडकू। हाँयग बींग दरहा अरू कलउ माःआनकू कतावायता। हनाँय जमा चउंदीसरिकुःआ होड़कू मनाड़ंग वरीतेय बहकावकूता।

¹⁰ हनते ईंग सेरमो देस अते मीटोंग मुरुक सटी अरोयिंग अयूमतेरा, “दिन रइत अबूरीग भगवान मड़ंगरे बिसवासी होड़कूय ओपताःआ हाँयग ओपता होड़, चउंदीसरेकू तेके लोजोरगोतेडिया। दो हना अते नुँहू अबूरीग भगवान होड़कू सडावगेराः बेला सोदोरयान, अरू हाँयराः जंगरते राइजगे लगाय बुँहड़ीकेरा, अरू भगवानरीग मसी हों हाँयराः हातपाते उदुःकेरा।

¹¹ हँकुःआ बिसवासी होड़कू भेड़ा होनराः बलंगीते, अरू हाँयरिकुःआ हिदइतदारकू दोहोन अतेकू जितावयान। अरू हँकू गुजुः ततेररे हों, अँननकूराः जीव बनसावगे लगा मेरकू ओंगोल दोहोगाड।

¹² हनालगा सेरमो देसरे इदानपेःआ, अपे जमाकू बनाहाल जुवाःपे। मनदो ने चउंदीसरिकुःआ अरू समुंदररिकुःआ जिया-जउतकून, दरहा अपे एचेरेय उतरावकिया। हाँय एचेरे गुनिनमिन बेला इदा माःआन सुदीकेडखन, हाँय रीस रंजावतो इदानिया। हनालगा अपे दोपे ठीकयना।”

¹³ हाँयग लाल मरंग बींग सुदीगोतेडे, हँकू चउंदेसरेकू तेके लोजोरगोतेडिंगा, माःआन। दो हाँय, हेरेल होने जनमावतिरिया हाँयग अइमीय झुटियावतेरा।

¹⁴ मनदो हाँयग अइमी मीटोंग मरंग कुड़ीडराः बारटोंग पंकीय पवावनेना, जेमहा हाँय टयंगाब ततेर अगीय दोन अवेन। हंडा हाँय मी बरिस, अरू बार बरिस अरू आधा बरिस वरी लाल मरंग बींग अते बनसावकियानखनकू पला दरीगेय।

¹⁵ हनते लाल मरंग बींग हाँयग अइमी झुटियावतेडखन अनँयग आहते दाः नई इयाय पुरकावगोतेड, जेमहा हाँयग अइमी हना दाःतेय तूः जुवाः।

¹⁶ मनदो लाल मरंग बींग दाः नई इयाय पुरकावतेरा दो, ओत पड़ाःनेना अरू हना दाः ओर अंजेडगोतेड। नाःआ इया ओत हाँयग अइमी संघरावातेरा।

¹⁷ हना अते लाल मरंग बींग हाँयग अइमी सुदा मुरुके रीस भीकयान, अरू हाँयग बींग भगवानराः हुकुमकू मनाःता हाँयग अइमीरिकुःआ एटाः लइंकू एचेरे, अरू ईसूराः सताय कताकू मनावगोड ञवनतना, हँकू एचेरे लड़ाइ लगा तोराया।

¹⁸ हनते हाँयग लाल मरंग बींग समुंदर धरीराः बितीलरेय चड़ाँयान।