उदुःतो कताकून 11 - Korwa Bible

भगवानरिकिनाः बार होड़ हिदइतदारकिन

¹ हनते एटाःयीग बराहील ईंग एचेरे नपा लगा मीटोंग सरपी इया डांग एमेतेडखने कतातेरा, “दूमे अरू भगवानराः ओड़ाः अरू धाममे नपा अरू हंडाकू जागता हँकुःआ जमा होड़कूम गँड़ाव।

² मनदो भगवानराः ओड़ाःराः राचमे अड़ाः। हना राच बेगर एहूदाकू लगा जिमात इदा। हँकू भगवानराः सुद सहर, साड़हे पेय बरिस वरीकू चोड पारता।

³ अरू ईंगरिकिनाः बार होड़ हिदइतदारकिन हातपातिंग ओवाकिनता। हँकिन बोराराः सोनहे तुसिंगकेडखन 1,260 दिन वरी भगवानराः बड़राकिन कतागोड ञवनता।”

⁴ चउंदीसरीग परबू मड़ंगरे इदा हना बारटोंग जइतून दूब अरू बारटोंग ढिबरी हँकिनाः होड़किन हवे।

⁵ तोनोंगीग हँकिन हनीकिन लगाकू चहाःता, दो हँकिनराः आहते सेंगेल उडुंगगुःता अरू अँकिनरिकुःआ मुदइकू लाय एंडागोडकूता। ननन इया तोनोंगीग हँकिन हनी लगाकू चहाःता, हँकुःआ होड़कू लाय एंडा जुवाःता।

⁶ दाः उयुः अते रोंकावगे लगा हातपात हँकिनके इदा, जेमहा हँकिन भगवानराः बड़रा कता मेला दाः अलो उयुः। जमा ततेरराः दाः बलंगी बड़ाँव लगा अरू हँकिन चहाः हन हनमेला चउंदीसरिकुःआ होड़कू जमा बरानाः हइजारे परावकू लगा हँकिनके हातपात इदा।

⁷ हँकिनाः हिदइतदारकिन भगवानराः सरवनकिन परसार उरियाव जुवाः दो, पतालपूरते उडुंगगुःता हाँयग जानर हँकिन सुदा लड़ाइकियानखन हाँय जिताःता अरू हँकिने ञेड एंडाता।

⁸ हँकिनराः मुरदा हना मरंग सहरराः संडकरे तेके एंडात दोहोनता। हना सहररे मड़ंग अँकिनरीग परबू कुरूसरेकू ठोंकावतिरिया। अउल-तउल इया हना बेलूर सहरराः ञाव सदोम सहर अरू मिसिरी देस माःआनकू कतावाता।

⁹ साड़हे पेय दिन वरी जमा जइतरिकुःआ होड़कू अरू जमा भासीरिकुःआ होड़कू, अरू जमा राइजरिकुःआ होड़कू, हँकू जमाकू हँकिनराः मुरदाकू ञेलगोड ञवनता। अरू तोनोंगीग हँकिनराः मुरदा तील लगा ओरोकू एमेतेरा।

¹⁰ चउंदीसरिकुःआ जमा होड़कू हँकिन गुजुः अते मुरुककू बहाल जुवाःता अरूकू सून सेरेंगता। नँकिना भगवानराः बड़रा कता होड़किन चउंदीसरिकुःआ होड़कू मुरुककिन सिकिसतातेडकुःआ। हनालगा हँकू नपाय नपाय जिनिसकून बहालतेकू एमे होड़ेंगता।

¹¹ मनदो साड़हे पेय दिन तयोमरे भगवान अगीते जीवराः साँस हँकिन एचेरे कुदानता। हनते हँकिन अँननकिन रेम चड़ाँ जुवाःता। अरू हँकिनकू ञेलता हँकुःआ होड़कू मुरुककू बोरो जुवाःता।

¹² हनते हँकिन सेरमो अते मीटोंग मुरुक सटी अरोकिन अयूमतेरा, “दबूबा, सेरमो अगीबा रकब वेग।” अरू हँकिनरिकुःआ मुदइ होड़कू ञेने ञेल मेला बदरीरे सेरमो होरकिन देग जुवाःता।

¹³ हननमेला ओत मुरुक डोलावनेना अरू हना मरंग सहरराः दस बंटा अते मी बंटा वाः बोलोयान। अरू हना बिपइतरे सात हजार होड़कू गोएगयान। बनसावनेना हँकुःआ होड़कू बोरोयान अरू सेरमो देसरीग भगवानकू जागतेरा।

¹⁴ बार नमारराः बिपइत पारयना। रहा, अरू मीटोंग बिपइत दरवाःआ।

सात नमारराः मरंग सोहनाई

¹⁵ हनते सात नमाररीग सेरमो देसरीग बराहील मरंग सोहनाईए ओंगतेड दो, सेरमो देसरे मुरुक सटी अरो अयमुःआ। हँकू कतातेरा, “चउंदीसराः राइजकून अबूरीग परबू भगवानराः अरू आँयगरीग मसीराः होयाकिया। अरू हाँय सगर जूग वरीय राइजगोड ञवनता।”

¹⁶ हनते चूबीसगोटोंग मूक होड़कू भगवानराः मड़ंगरे अँननकू गदीरेकू दुड़ुःकुःआ, हँकू होरोनेनखन भगवानकू जागा।

¹⁷ हँकू कतातेरा, “ने अगम जंगरदार परबू भगवान, आम दोहोना अरू नुँहू इदानमेःआ। आम आमराः अगामाः जंगरते राइजगे लगाम बुँहड़ीकेरा, हनालगा अले आमले धनियाबादतना।

¹⁸ जमा जइत होड़कू रीसयना अरू आम रीस भीकयानमे। दो गोएगतो होड़कू फड़ियाव लगा नुँहू बेला सोदोरयना, आमरिकुःआ सेवकियाकू अरू आमराः बड़रा कता होड़कू, अरू आमरिकुःआ सुद होड़कू, अरू आम सुदा अकूसकू मनाःता हँकुःआ मरंग अरू हुडिंग होड़कू, हँकू इमानमे एमेवा लगा हों बेला सोदोरयना, अरू चउंदीसकू लायतना, हँकुःआ होड़कूम लाय एंडाकूता।”

¹⁹ हनते सेरमो देसरे इदा हना भगवानराः ओड़ाःकू गीगतेरा। अरू हना ओड़ाः पेंदारे भगवानराः कता-जमकावतोराः बकसा ञिलुःआ। हनमेला ठेड़ररे विड़चेड़ा अरू बदरी हदूड़ा अरू ओत डोलाःआ अरू मरंग मरंग अरील लोजोरनेना।