उदुःतो कताकून 10 - Korwa Bible

बराहील एचेरे हुडिंगाः कोंडोड़तो कागद

¹ हनते अरू एटाःयीग जंगरदार सेरमो देसरीग बराहील बदरी ओयोनेनखन सेरमो देस अते उतराःतो ईंग ञेलतिरिया। हाँयराः बोःरे टुंडी बींग दोहोना। हाँयराः सुरइत बेर इया अरू हाँयराः काट सेंगेलराः खुंटा इया दोहोना।

² हाँयराः तिःईरे मीटोंग हुडिंगाः कोंडोड़तो कागद लड़ात दोहोना। हाँय आँयगराः खउना काट समुंदररे अरू डिरहिया काट ओतरेय चोड रोपावतेरा।

³ हनते हाँय कूल नरराःता इया मुरुक सटी खिररीनेना। हाँय खिररीनेना, हनमेला बदरी सात तुरहा होड़कूराः बड़रा इया हदूड़नेना।

⁴ सात तुरहा बदरी हदूड़ उरियावनेन दो, ईंग ओजाःगे लगा दोहोना। मनदो सेरमो अते मीटोंग अरोयिंग अयूमतेरा, “सात तुरहा हदूड़तो कताकेरा, हना अहम ओजाःगे, मनदो अनम जीवरेम दोहोय।”

⁵ ईंग समुंदररे अरू ओतरे चड़ाँ रोपावतोयिंग ञेलतिरिया हाँयग बराहील, आँयगराः खउना तिःई सेरमो होरे रेमतेरा।

⁶ सगर सइट लगा जीयत इदानिया हाँयग भगवान, सेरमो, अरू ओत अरू समुंदर अरू जमा जिया-जउतकूने तुलाकेरा। हाँयग भगवानराः ञावते किरिया कसट जोमकेडखने कतातेरा, “नुँहू अरू ओरो कुबेरनेना।

⁷ सात नमारीग सेरमो देसरीग बराहील मरंग सोहनाई ओंगता दो, भगवान अनँयगराः बड़रा कता होड़कू एचेरे मड़ंगरेय कता उदुःतेरा, हना ओकोत कताकून जमाकून हननमेला पुराव जुवाःता।”

⁸ सेरमो अते अरू मी तुरहा अरोयिंग अयूमतेरा, “दूमे अरू समुंदररे अरू ओतरे चड़ाँ रोपावतो इदानिया, हाँयग बराहीलराः तिःई अते हना लड़ात कागदमे गोःया।”

⁹ हनते ईंग हाँयग बराहील एचेरे सेनेडखनिंग कतातेरा, नाःआ कागद ईंगमे ओवा, माःआन। दो हाँयग बराहील ईंगे कतावाड, “ना, नाःआ कगदमे जोम। नाःआ कागद, आमराः आहरे रस इया मुरुक सेबेलता, मनदो आम दोंगे हटीगोडता।”

¹⁰ हनते ईंग हना हुडिंगाः कागद हाँयग बराहीलराः तिःई अते गोःकेडखनिंग जोमगोतेड। हान, रस इया ईंगराः आहरे सेबेलनेना, हनदो ईंग ऊडगोतेड दो ईंगराः दोंगे हटीयान।

¹¹ हनते अदोम होड़कूराः अरो ईंग एचेरे कतातिंग अयूमतेरा, “आमके मुरुक जइत होड़कू अरू एटाः एटाः राइजरिकुःआ होड़कू बदीरे, अरू एटाः एटाः भासीरिकुःआ होड़कू अरू राजाकू बदीरे हों भगवानराः बड़रा ककता इदा।”