पिलेमोन 1 - Korwa Bible

मसी सलाम

¹ ईसू मसीराः परसार बदीरे जेहेलरे इदानिंगा ईंग पउलूस नाःआ चिठीयिंग ओजाःगेतना। ने अलिंगरीग दुलार सउंगता अरू सेवा देंगवा होड़ पिलेमोन, अलंगरीग बिसवासी बोहोयिंग इदानिया हाँयग तिमुतियूस अरू ईंग अगीते आमके मसी सलाम।

² अबूरीग मेसेबू इया इदानिया हाँयग अपियालिंग सलामगेयतना। अलिंग सुदाय पपरसारतना हाँय अरकिपूस होंलिंग सलामतना। ने पिलेमोन, आम ओड़ाःरे संगइतीरेकू दुड़ुःता, हँकुःआ जमा बिसवासी होड़कू होंलिंग सलामतना।

³ अबूरीग अपांग भगवान अरू परबू ईसू मसी, अपेकिन मयावा, अरू सलसतरेकिन दोहो ओवापे।

पिलेमोनराः दुलार अरू बिसवास

⁴ ने पिलेमोन, ईंग अरजीतान मेला आमिंग उहियार घड़ीन आम लगा जमा बेला ईंगरीग भगवानिंग धनियाबादता।

⁵ ईंग अयूमकेरा, पिलेमोन ईसू मसीरेय बिसवासगोड ञवनतना अरू परबू ईसूय दुलारतना अरू बिसवासी होड़कू सुदा अलार-दुलारतेय दोहोनतना, माःआन।

⁶ ईंग अरजीतना आम जमा बिसवासी होड़कू सुदा संगइतीरे अरूम बगरा जुवाः, जेमहा भगवान अबू लगा ईसू मसीते अबू जीवे भलावातेडा हना बदीरे अरू नपायतेम बुझाव अवेन।

⁷ ने ईंगरीग मसी बोहोयिंग, आम भगवानरिकुःआ सुद होड़कूम दुलारता अरू हँकुःआ होड़कूराः जीव मुरुकमे एचे हड़ियड़गोतेडकुःआ। हनाते आम ईंगराः जीवमे बहालगोतेडा अरू ईंगराः जीवमे सलसतगोतेडा।

उनेसिमूस लगा पउलूसराः अरजी

⁸ आम ईंग लगा मीटोंग बुता एचे लगायिंग असेमेतना। ईंग ईसू मसीरीग मूक चेला हवे। हनाते आम एचेरेयिंग हुकुम अवेयतिंग,

⁹ मनदो ईंग, सनायाड़ डोकरा पउलूस, नुँहू परसार बदीरे जेहेलरे इदानिंगा, आम एचेरे दुलार घड़ीन असे लगायिंग चाहाःतना।

¹⁰ ईंग बेटा इया इदानिया अरू ईंग अगीते जेनेहेलरे ईसू मसी एचेरेय बिसवासकेरा हाँयग उनेसिमूस संघरावाय लगा ईंग आम एचेरेयिंग असेयतना।

¹¹ मड़ंग हाँय आम लगा तोनोंगाः बुता जुकूर मेरेय दोहोगन। मनदो नुँहू हाँय अलंग बना होड़ लगा बुता जुकूर इदानिया।

¹² ईंग मुरुकिंग दुलारगेयता हाँयग उनेसिमूस आम एचेरेयिंग वारेयतना।

¹³ मनदो हाँय आम बदलारे, नपाय सरवन बदीरे ईंगे संघरा अवेवायिंगता। हनालगा हाँय जेहेलरे ईंग सुदा दोहोन लगायिंग चहाःतना।

¹⁴ मनदो आम अरीन कताय वरी, तोनोंगाः एचे लगा मेरिंग चहाःतना, जेमहा आम ईंग लगा संघरा रेनहाते कोवान, मनदो अनमराः नपाय चाहाःते एचेय लगा इदा।

¹⁵ होयाः हमा करे, हाँय आम सुदा सगर दिने दोहोन लगा, आम अते तोनोंग दिन वरी हिगारतोय दोहोना।

¹⁶ नुँहू वरीते, हाँय आम लगा, बेगारी होड़ एकला ना लवे। हाँय आमराः बिसवासी बोहोम हों इदानिया। हाँय ईंग मुरुकिंग दुलारगेयतना अरू ईंग अते आम लगा हाँय मुरुक नपाय इदानिया। हाँय एकला आमरीग बेगारी होड़ ना लवे, मनदो आम परबू ईसू एचेरेम बिसवासगेतना, हान इया हाँय होंय बिसवासगेतना।

¹⁷ हनालगा आम ईसू मसीराः सेवारे आमरीग सेवा देंगवा होड़ इया ईंगमे ओंगलिंगता दो, ईंगमे नेत-नेवारता हान इया उनेसिमूस होंम नेत-नेवारगेय।

¹⁸ हाँय आम एचेरे तोनोंगाः बेलूरे एचेकेरा, अरू आमके हाँय एचेरे गोगोः इदान होले, ईंग जमनींग दोहोनता।

¹⁹ ईंग पउलूस इनिंग तिःईते नाःआ चिठीयिंग ओजाःगेतना। उनेसिमूस आम लगा एएमे इदा, हना इनिंग जमनींगता। मनदो अहम लिड़िंगे आम हों ईंगते बिसवासी होड़मे बड़ाँवयना। हनालगा आमराः जीवराः करजा कड़हाव होड़ इनिंग हवे।

²⁰ ने ईंगरीग मसी बोहोयिंग पिलेमोन, ईंग असेयतना हनाम एचेगोड। ईंगराः जीव परबू ईसूरेम हड़ियाड़गोड।

²¹ ईंग असेकेरा हनाम एनेमेयता माःआनिंग भरसागेतना। हना लगायिंग ओजाःगेतना। हा, ईंग सुनुदीयतना, ईंग ओंगलेतना हनाते हों आम बगराम एचेयता।

²² अरू मीटोंग बड़रा आम एचेरे ककाता इदा। आमराः ओड़ाःरे मी छिना ईंग लगाम जोः अमिंगका। ईंग असरातना, भगवान अपेराः अरजी अयूमवाडखन जेहेल अते एचे उडुंगकिडिंगखन आम एचेरेय सेने ओवायिंगता।

टुटीग सलाम अरू अरजी

²³ ईसू मसी बदीरे नुँहू जेहेलरे ईंग सुदा इदानिया हाँयग इपापरास अगीते आम लगा मसी सलाम।

²⁴ ईंगरिकुःआ सेवा देंगवा होड़कू मरकूस, अरिसतरकूस, देमास अरू लूका आमकू सलामतना।

²⁵ परबू ईसू मसी आमराः जीवे मयावा।