मरकूस 9 - Korwa Bible

¹ दो ईसू हँकुःआ चेलाकू एचेरे अरूय कतातेरा, “अपे ईंगपे अयूम, नंडा चड़ाँत इदानकुःआ, नँकुःआ होड़कू अते अदोम होड़कू भगवानराः राइज जंगरते बुँहड़ीनता हना अरीनकू ञेल वरी ओरोकू गोएगनेना।”

ईसू विड़चेड़नेना

² छो दिन तयोमरे ईसू पतरस, एहुना अरू एकूब आँयग सुदा मीटोंग उसूल पहाड़ सेरमो एकलाय गोःयाडकू। दो हाँय हंडा हँकू मड़ंगरेय बदलावयान।

³ चउंदीसरे नाःआ इया तोनोंगीग धुबिया सोनहे ओरोय बुहाल अवेतेरा हना इया हाँयराः सोनहे फक-फक उजड़यान।

⁴ दो हनमेला असाका भगवानराः बड़रा कता होड़किन, मोसेस अरू इलियाह हंडाकिन एचे ञेलयान। अरू ईसू सुदाकिन बड़राःआ।

⁵ दो पतरस ईसू एचेरेय कताया, “ने गुरुजी, अबू नंडा इदानबुःआ दो नपाय इदा। दो अले पेयटोंग कुंबाले तुलाता, मीटोंग आम लगा, मीटोंग मोसेस लगा अरू मीटोंग इलियाह लगा।”

⁶ हँकू मुरुककू बोरोयान, हनालगा पतरस मेरेय सुदीया हाँय चिलाय कताःआ, हना।

⁷ पतरस कताय मेला बदरी हँकू जमाकू दाब रेडगोतेडकू। हना बदरी अते भगवानराः बड़राकू अयूमतेरा, नाँय ईंगरीग दुलार बेटा हवे। दो अपे नाँयराः कतापे मनाः, माःआन।

⁸ ञेनेल ञेल हँकू चइरो गतरकू ञेलतेरा अरू ईसू एनेकला हंडाय दोहोना।

⁹ पहाड़ अते उतराः मेला हाँय हँकू एचेरेय हुकुमतेरा, “मनुवारीग बेटात गोएगतो होड़कू अते अरीने जियाव रिमुः वरी, अपे नाःआ कता तोनोंगीग एचेरे अहापे कताय।”

¹⁰ दो हँकुःआ पेनेय चेलाकू नाःआ कताकू अयूम सोलोंग दोहोतेरा अरू अँननकू अँकू कता होड़ेंगा, “गोएगतो अते जियाव रिमुःराः मतलोब चिला हवे?”

¹¹ अरू हँकू हाँयकू होंबोरतेरा, “ने गुरुजी, नियम चेडदार होड़कू चिला लगाकू कतायता, इलियाह मड़ंगरे वेग लगा इदा, माःआन?”

¹² दो ईसू हँकू एचेरेय कतातेरा, “सतायरे इलियाह मड़ंग वेगकेडखन जमाकूने मंदरावगोडता। मनदो मनुवारीग बेटात बदीरे चिला लगा नाःआ इया ओजाःतो इदा, हाँय मुरुक कटसियाय सहावता अरू आड-बेकारवायताकू?

¹³ ईंग अपे एचेरेयिंग कतायतना, इलियाह वेगनेना अरू हाँय बदीरे ओजाःतो इदा, हनन इया होड़कू चहावनेना हनन इया जमाकून हाँय सुदाकू एचेतेरा।”

ईसू मी होड़ लँइग अते भूते उडुंगतेरा

¹⁴ ईसू आँयगरिकुःआ चेलाकू एचेरेय सेनेड दो हँकूराः चइरो गतर मुरुक बगरा होड़कू दोहोना। अरू नियम चेडदार होड़कू चेलाकू सुदाकू अड़ा-चउकीःआ।

¹⁵ जमा होड़कू ईसू ञेलतेडखनकू बयावयान। हँकू हाँय अगी बतकाव सेनेवाडखनकू सलामतिरिया।

¹⁶ दो ईसू हँकू एचेरेय होंबोरतेड, “अपे नँकू सुदा चिलापे अड़ा-चउकीतना?”

¹⁷ दो होड़कू अते मी होड़ ईसू एचेरेय कतातेड, “ने गुरुजी, ईंग बेटा एचेरे मीटोंग कोंदा भूत इदानिया। हनालगा ईंग बेटा आम एचेरेयिंग अगूकिरिया।

¹⁸ हाँयग भूत सबेयता हनमेला एचे लेबदागोडेयताय अरू आहतोरे पोतो पेरेग उडुंगगुःता अरू तिरिंगे कड़रावता। हनते हाँय टड़-टड़ाव जुवाःताय। ईंग आमरिकुःआ चेलाकू एचेरेयिंग असेतेरा, नाँयग भूतपे उडुंगगोड, माःआन। मनदो हँकू मेरकू उडुंग अवेगडीग।”

¹⁹ नाःआ अयूमवाडखन ईसू आँयग चेलाकू एचेरेय कतातेरा, “ने गुनमिन बिसवासगे होड़कू, अपे सुदा तुमिस वरीयिंग दोहोन? तुमिन वरी अपेयिंग सहाव?” हनते ईसू कतातेड, “माँय ईंग एचेरेपे अगूगेय।”

²⁰ दो होड़कू हाँयग लँइग ईसू मड़ंगरेकू अगूतिरिया। भूत ईसूय ञेलतेड दो हाँयग लँइगे एचे डोलावगेया। हनते हाँय ओतरेय लेबदायान अरू घोलंडावनेनखन आहत अते पोतो उडुंगगुःआ।

²¹ दो ईसू हाँयग लँइगरीग अपात एचेरेय होंबोरतेडा, “नाँयराः नाःआ इया तुमिस वरीते होयाःतना?” अपात कताया, “लनँइग वरीते होयाःतना।

²² हाँय गोजेय लगा तोनोंग मेला सेंगेलरे अरू तोनोंग मेला दाःरेय एचे लेबदाया। मनदो आम कहीम एचे अवे दो अले सोगावाडखन संघराम ओवाले।”

²³ ईसू हाँय एचेरेय कताया, “चिला लगाम होंबरेतना, आम एचे अवेयताम जा कोवान? ईंग एचेरेय बिसवासगेता हाँय लगा जमाकून होनोया जुवाःता।”

²⁴ दो हाँयग लँइगरीग अपात मुरुक सटीतेय कतातेरा, “ने परबू, ईंग बिसवासगेतानिंग। अरू बड़ियाड़िंग बिसवासगे लगा संघराम ओवायिंग।”

²⁵ ईसू ञेलतेडकुःआ होड़कू मुरुक बतकाव वेग घड़ीन मिनीरेकू जुमाःआ। दो हाँय भूत डंटावतेडखने कताया, “ने कोंदा अरू भइरा भूत, ईंग आमिंग कतावातना, नाँय अतेम उडुंग जुवाः अरू कहियो नाँय एचेरे अलोम जवाःगुः।”

²⁶ हनते मुरुक खिररीवाडखन अरू हाँय मुरुक एचे घोलंडावाडिगखन भूत उडुंगयाने। अरू हाँयग लँइग गोएगतो इयाय होयायान। मुरुक बगरा होड़कू कताया, “नाँयग लँइग गोएगयनाय।”

²⁷ ईसू हाँयग लँइग तिःईरे साबतिरिगखने रेमगोतेडीग। हनते हाँय चड़ाँयान।

²⁸ ईसू ओड़ाःरेय वेजेड दो आँयगरिकुःआ चेलाकू एकलाकू होंबोरतिरिया, “ने गुरुजी, अले चिला लगा हाँयग भूत मेरले उडुंग अवेगडीग?”

²⁹ ईसू हँकू एचेरेय कताया, “ने वपक बोपोहकूतिंग, बेगर अरजी अरू उपासते नाःआ इयायीग भूत ओरोय उडुंगनेना।”

अनँयग गुजुः बदीरे ईसू अरूय कताया

³⁰ ईसू अरू आँयगरिकुःआ चेलाकूतेन गलील छतर होर तोराकू। मनदो हाँय नाःआ इयाय चहाःआ, अबू तोनोंगीग अलोकू सुदीबू, माःआन।

³¹ अरू ईसू आँयगरिकुःआ चेलाकू चेडतेडखने कताया, “मनुवारीग बेटात होड़कूराः तिःईरेकू एचे सबेयता अरू हाँयकू ञेड गोजेयता अरू पेय दिनरेय जियाव रिमुःता।”

³² मनदो हँकुःआ चेलाकूतेन हना बड़रा मेरकू बुझाव अवेगन अरू हनारे हों हाँय एचेरे होंबरे लगाकू बोरा।

मरंग इये हवे?

³³ हना तयोमरे ईसू अरू आँयगरिकुःआ चेलाकू कपरनहूम सहररेकू सेनेडा। अरू ओड़ाःरे सेनेकियानखन ईसू चेलाकूतेन एचेरेय होंबोरतेरा, “दूररे अपे चिला बड़रारेपे अड़ा-चउकीःआ?”

³⁴ हँकू दूररे अँननकू अँकू नाःआ इयाकू अड़ा-चउकीःआ, अबू अते इये मरंग इदानिया? हनालगा हँकू कलेकालकू दोहोना।

³⁵ दो ईसू दुड़ुःनेनखन आँयगरिकुःआ बारहगोटोंग मूक चेलाकूय राःतेड अरू हँकू एचेरेय कताया, “तोनोंगीग होड़ मरंग बड़ाँः लगाय ओंगले दो हाँय जमाकूते हुडिंग अरू जमाकूरीग सेवादारे बड़ाँः।”

³⁶ हनते मी होड़ लँइग अगूकेडखन हँकू तलारेय एचे चड़ाँतिरिया अरू आँयग एचेरे सहेरतिरिगखने कतातेरा,

³⁷ “तोनोंगीग होड़ नाँयग लँइग इया तोनोंगीगे नेत-नेवारगेय दो, हाँय ईंगे नेत-नेवारता। ईंगे नेत-नेवारता, हाँय ईंग एकला कोवान मनदो ईंगे वारकेरा हाँयग भगवान होंय नेत-नेवारता।”

इये ईसू सुदा इदानिया

³⁸ दो एहुना ईसू एचेरेय कतातेरा, “ने गुरुजी, मी होड़ आम ञावते भूतकू होड़कू अतेय उडुंगा, हाँयले ञेलतेरा। मनदो हाँय अबूरीग होड़ ना लवे। हनालगा अले हाँय रोंकावगेय लगाले कुरनिसतेरा।”

³⁹ दो ईसू कतातेरा, “हाँय अहापे रोंकावगेय। तोनोंगीग होड़ ईंगराः ञावते बयाव जुवाः इयाःआ बुता एचेकेडखन ओहेन ईंग बदीरे बेलूर बड़रा ओरोय कता अवेतेरा।

⁴⁰ अबूरिकुःआ मुदइकू ना लवे, हँकू अँननबूरिकुःआ होड़कू हवे।

⁴¹ अपे ईंगपे अयूम, तोनोंगीग होड़ अपे मसी होड़कू इदानपेःआ अते गुनमिन हों दाः ञूय लगाय एमेवापेता दो हाँय लगा भगवान इमाने एनेमेवायता।

एचे कसूरगेराः अंदजाव

⁴² ईंग एचेरेकू बिसवासगेता हँकुःआ होड़कू अते हुडिंगीग होड़ होंय एचे कसूरगेयता, हाँयग होड़राः होटोःरे जंता इया मरंग दिरि तोलकिरिगखन समुंदररे तेनेके बोलोगोडेय, हना ननपाय इदा।

⁴³ आमराः तिःई आम एचे कसूरगोडमेता दो, हना तिःई बोंगोर एंडागोडमे। दो बनर तिःई दोहोन हों नरगराः ओरो टुटीगनेना हना सेंगेलरे एचे सोलोंगुः अते लुलहाकियानखन सेरमो देसरेम बोल दो ननपाय इदा।

⁴⁴ [नरगरिकुःआ पिलवाकू मेरकू गुजुःता अरू हना सेंगेल मेर इड़ीगगुःता।]

⁴⁵ आमराः काट आम एचे कसूरगोडमेता, दो हना काट बोंगोर एंडागोडमे। बनर काट दोहोन हों नरगराः ओरो टुटीगनेना हना सेंगेलरे एचे सोलोंगुः अते लंगड़ाकियानखन सेरमो देसरेम बोल दो ननपाय इदा।

⁴⁶ [नरगरिकुःआ पिलवाकू मेरकू गुजुःता अरू हना सेंगेल मेर इड़ीगगुःता।]

⁴⁷ आमराः मेड आम एचे कसूरगोडमेता, दो हना मेड गुड़तीग उडुंगगोडमे। बनर मेडे दोहोन हों नरगराः ओरो टुटीगनेना हना सेंगेलरे एचे सोलोंगुः अते कनाँकियानखन सेरमो देसरेम बोल दो ननपाय इदा।

⁴⁸ [नरगरिकुःआ पिलवाकू मेरकू गुजुःता अरू हना सेंगेल मेर इड़ीगगुःता।]

⁴⁹ जमा होड़कू सेंगेलते एचे बुलुंगकूता।

⁵⁰ बुलुंग नपाय जिनिस हवे। मनदो बुलुंगराः सेबेल मेर दोहोन दो हना बुलुंग अते करा इयाबू बुलुंग सेबेलगे? अपे जीव अरू ओंगोल बुलुंग इया नपाय दोहोन इदा अरू अँननपे अपे सलसतरेपे दोहोन।”