मरकूस 6 - Korwa Bible

नसरतरे ईसू मेरकू मान मरजइतगाड

¹ हनते ईसू हना ततेर अते सलावयाने अरू अनँयगराः छतररेय सोदोरनेना अरू आँयगरिकुःआ चेलाकू हों हाँय सुदाकू सेनेडा।

² लोड़ोनराः दिन हाँय अरजी ओड़ाःरे होड़कूय चेचेडा अरू मुरुक होड़कू हना कता अयूमवाडखनकू बयावयान। हँकू कताया, “नाँय करतेय चेडकिया अरू नाःआ इया कनहून इये चेडकिरिया? नाँय तोनोंग मेला होड़कू मेरकू ञेलगरा हना बयाव जुवाः इयाःआ बुता करा इयाय एचेयता?

³ दो नाँय हाँयग मरियमरीग बेटात काट मिसतिरी ना लवे जा, अरू एकूब, ओसेस, एहूदा अरू सिमोन नाँयरिकुःआ बोपोहकूतेन ना लवे जा? नाँयरिकुःआ मेमेसकू हों अबू गाँवरेकू दोहोनता।” नानाः लगा हँकुःआ होड़कू हाँय मेरकू मनेवागडीग।

⁴ दो ईसू हँकू एचेरेय कताया, “भगवानराः बड़रा कता होड़कू अँकूराः देसरिकुःआ होड़कू अरू आँयग ओड़ाःरिकुःआ होड़कू एकला मेरकू मान मरजइतगेयता।”

⁵ हाँय तोनोंग तोनोंग होड़कू चोटरे तिःई खेपाकेडखन हँकूय नपायतेरा। नाःआ अते हाँय तोनोंगाः बयाव जुवाः इयाःआ बुता मेरेय एचे अवेगाड।

⁶ हँकुःआ होड़कू ईसू एचेरे मेरकू बिसवासगाड, हनालगा हाँय बयावयाने। हनते हाँय एटाः एटाः गाँव सेनेवाडखन होड़कूय चेड उदुःआ।

ईसू बारहगोटोंग मूक चेलाकूय वारगोतेड

⁷ हनते ईसू आँयगरिकुःआ बारहो मूक चेलाकूतेन आँयग एचेरेय राःतेडकुःआ अरू भूतकू होड़कू अते एचे उडुंगकू लगा हातपाते ओवातेडकुःआ अरू बबर होड़ बबर होड़े वारगोतेडकू।

⁸ दो ईसू हँकूय कतावातेड, “दूर सेन मेला साब लगा बोंग अते एटाः तोनोंगाः अलोपे गोः। तोनोंग जोजोमराः जिनिस, झोला अरू ढिबुवाकून हों अलोपे गोः।

⁹ चाटीपे तुसिंग अरू तुसिंगतो अंगा अते एटाः सोनहे अरू अहापे गोः।”

¹⁰ अरू हाँय हँकू एचेरेय कतातेरा, “तोनोंगीग होड़राः ओड़ाःरेपे सुदुरुः दो अपे हना गाँव अते अरीनपे सेन हना वरी हनानाः ओड़ाःरेपे दोहो ञवन।

¹¹ तोनोंग सहररिकुःआ होड़कू अपे मेरकू नेत-नेवारपे अरू अपेराः कता मेरकू अयूमगे दो हना सहर अते सेनेन सेन मेला काटराः धुंदराकून कोटा एंडागोडपे। दो नाःआ हँकुःआ होड़कू भगवान डंडियावकूता हनाराः चिनहा इया दोहोनता।”

¹² दो हँकू, मूक चेलाकू सेनेवाडखनकू परसारगोतेड, अपे कसूर अते जीवपे कुदा, माःआन।

¹³ अरू हँकू मुरुक बगरा भूतकूकू एचे उडुंगतेरा अरू मुरुक हसूतेकू दोहोना हँकुःआ होड़कू एचेरे सुनुम तिलाःतेडकूखनकू एचे नपायतेडकुःआ।

बतिसमा एमे होड़ एहुनाराः गुजुः

¹⁴ ईसूराः ञाव जमा देसरे जगावतो दोहोना अरू हरदोस राजा ईसूराः जमा कताकूने अयूमतेरा। तोनोंग तोनोंग होड़कू ईसू बदीरेकू कतातेड, “बतिसमा एमेयीग होड़ एहुना गोएगतो अतेय जियाव रेमकिया। नननलगा बयाव जुवाः इयाःआ बुता नाँय एचे उदुःगेता।”

¹⁵ अरू एटाः होड़कू कतातेड, “नाँय इलियाह हवे।” अरू एटाः होड़कू कतातेड, “नाँय भगवानराः बड़रा कता होड़कू अते एटाः मी होड़ हवे।”

¹⁶ हरदोस राजा नाःआ अयूमवाडखने कतातेरा, “ईंग एचे पुजातिरिया, हाँयग एहुना जियाव रेमकिया।”

¹⁷ मड़ंगरे हरदोस अनँयग वगात पिलिपूसरीग अइमी हेरोदियासे सगइतेरा। दो बतिसमा एमेयीग होड़ एहुना हरदोस राजा एचेरेय कता ञवना, “आमके अनम लगा वगमरीग अइमी ससगाई नपाय कोवानेःआ।”

¹⁸ हनालगा हेरोदियास एहुना एचेरे मुरुक रीस रीसे दोहोना। अरू हाँय ओंगलेःआ, ईंग एहुनायिंग ञेड एंडागोडेयता। मनदो हना इया मेर होयाः अवेगन।

¹⁹ हनारे हों हेरोदियासराः जीव बहालगुः लगा हरदोस एहुना एचे साबवाडीगखन जेहेलरेय एचे सींगगोतेडीग।

²⁰ हरदोस सुसुदीआय, एहुना बेगर गारबार अरू सुद होड़ हवे, माःआन। हनालगा हरदोस एहुनाय बोरोवाःआ अरू हाँय एहुना मेरेय ञेड ओवागडीग। तोनोंग बेला एहुनाराः कता अयूमवाडखन हरदोस ओंगोल बयाव जुवाःआ। मनदो हाँय एहुनाराः परसार बहालतेय अयुमेःआ।

²¹ हरदोस राजा अनँयग जनम दिनरे आँयग सरकाररिकुःआ मरंग मरंग हातपात होड़कू अरू सइनाकूरीग हातपात होड़ अरू गलील छतररिकुःआ मरंग मरंग होड़कू भोज जोजोम लगाय राःतेडकुःआ अरू हनमेला हेरोदियास एहुना एचे ञेड एंडा लगा दावे पवावनेना।

²² हेरोदियासरीग मी होड़ बिटीत दोहोना। हाँय भोजकू जोजोमा हँकुःआ होड़कू तलारे वेगवाडखने सूना अरू हाँय हरदोस राजा अरू आँयग सुदाकू दुड़ुःकुःआ हँकुःआ जमा होड़कूय सून बहालगोतेडकू। हनते राजा हाँयग एराहोन एचेरेय कतातेड, “आम चहाःतना हना ईंग एचेरेम असेय, दो ईंग ओवामेतिंग।”

²³ अरू हाँयग राजा किरिया जोमतेडखने कतातेरा, “ईंग राइजराः मी बंटा राइज ईंग एचेरेम असेय दो हना हों आम लगायिंग एमेगोडता।”

²⁴ दो हाँयग एराहोन हना अते उडुंगकियानखन एंगात एचेरेय होंबरेःआ, “ने अया, ईंग चिलायिंग असे?” दो एंगात कताया, “बतिसमा एमेयीग होड़ एहुनाराः बोःमे असे।”

²⁵ हनते हाँयग एराहोन ओहेन राजा एचेरे तोराय अरू हाँय एचेरेय कताया, “ईंग चहाःतना, आम नुँहू बतिसमा एमेयीग होड़ एहुनाराः बोः मीटोंग छिपीरेम एचे अगूगोड।”

²⁶ हना कता अयूमतेडखन राजाराः जीव मुरुक हुडिंगयान। मनदो हाँय आँयग सुदाकू दुड़ुःकुःआ हँकुःआ होड़कू अते हाँय अनँयग जबान चचलाः मेरेय चहाःआ।

²⁷ दो राजा मी होड़ सिपाही कतावाडीगखन ओहेने वारगोतेडीग, “दूमे एहुनाराः बोःमे बोंगोर अगू।”

²⁸ हनते हाँयग होड़ सेनेवाडखन जेहेल ओड़ाःरे एहुनाराः बोःए बोंगोरगोतेड अरू मीटोंग छिपीरेय अगूतेरा अरू हाँयग एराहोने ओवागोतेडीग। हनते हाँयग एराहोन एंगाते एमेवाड।

²⁹ हना अयूमवाडखन एहुनारिकुःआ चेलाकू वेजेडा अरू हना मुरदा गोःतेडखन मड़गटरेकू तीलगोतेड।

ईसू पाँच हजार होड़कूय जोम लगाय ओवातेडकुःआ

³⁰ तयोमरे ईसूरिकुःआ मूक चेलाकू हाँय एचेरेकू जुमावनेना अरू हँकू एचेतेरा अरू होड़कूकू चेडतेरा हना जमाकू उदुःवातेरिया।

³¹ मुरुक बगरा होड़कू सेन वेगा दो ईसू अरू आँयगरिकुःआ मूक चेलाकूके जोजोम लगा हों मेरकू ओवाया। हनालगा ईसू हँकू एचेरेय कतातेड, “दोबू अबू रिंग-रोंग ततेररे गुनमिनबू लोड़ोनता।”

³² हनते हँकू डोंगारे देगकियानखन रिंग-रोंग ततेर अगी तोराकू।

³³ हँकुःआ होड़कू सेन मेला मुरुक होड़कू ञेलतेडकुःआ अरू सिनहागोतेडकूकू। अरू जमा सहररिकुःआ होड़कू जुमावनेनखनकू बतकाव सेनेडा अरू हँकू अते मड़ंग हना रिंग-रोंग ततेररेकू सोदोरयान।

³⁴ हँकू डोंगा अते उतरावनेनखन मुरुक बगरा होड़कू जुमावतोय ञेलतेडकुःआ। अरू हँकू बेगर सरवाहातेकू दोहोनता हँकुःआ भेड़ाकू इयाकू दोहोना। हनालगा ईसू हँकूय सोगावातेडकुःआ अरू हाँय हँकू मुरुके चेडकुःआ।

³⁵ हना दिन सिंगाड़यान दो ईसूरिकुःआ मूक चेलाकू सेनेवाडखन हाँयकू कतावाःआ, “नाःआ रिंग-रोंग ततेर हवे अरू सिंगाड़यना।

³⁶ नँकुःआ होड़कू सेने ओवाकूमे अरू एटाः एटाः गाँव अरू डीहरे सेनेकियानखन अँकू लगा कही कहिसाः जोम लगाकू किजायता।”

³⁷ हनते ईसू कतातेड, “अँननपे नँकू जोम लगापे ओवाकू।” दो हँकू कतातेड, “नाःआ मिनकुःआ होड़कू जोम लगा मी होड़राः आठ महिनाराः बुता बनीराः ढिबुवा लगाःता। दो अले चिलातेले किजावाकुःआ अरू जोजोम लगाले ओवाकू?”

³⁸ हनते ईसू हँकू एचेरेय कतातेरा, “सेनेकियानखनपे ञेल, तुमिनटोंग रुटी इदा।” हनते हँकू जास अगूवाडखनकू कतातेड, “पाँचगोटोंग रुटी अरू बारटोंग हकूकिन इदा।”

³⁹ हनते ईसू हँकूय कतावाड, “अपे जमा होड़कू हड़ियड़ बीररे जुमूट जुमूट एचे दुड़ुःगोडकूपे।”

⁴⁰ दो हँकुःआ होड़कू मेमेड सव मेमेड सव अरू मेमेड ततेररे पचास पचासटोंग होड़कू दुड़ुःयान।

⁴¹ हनते ईसू पाँचटोंग रुटी अरू बारटोंग हकूकिन आँयग तिःईरेय साबतेड अरू सेरमो संगीलवाडखन भगवाने जागतेरा अरू हाँय रुटी डुंडीग घड़ीन चेलाकू एचेरे हटिंगगे लगाय एमेवातेडकुःआ। अरू हनन इया बारटोंग हकूकिन हों जमाकूकू हटिंगगे लगाय एमेतेरा।

⁴² हनते जमा होड़कू जोम बीयानकू।

⁴³ अरू हँकुःआ मूक चेलाकू डुंडीगतो रुटी अरू हकूकू बारहटोंग दउड़ारेकू रेम ठुड़ीतेरा।

⁴⁴ रुटीकू जोमतेरा हँकुःआ होड़कू पाँच हजार मनारद मरदकू एकला दोहोना।

ईसू दाः चोटरे सेनेडा

⁴⁵ हनते ईसू चेलाकूतेन ओहेने कतावाडकू, “अपे डोंगारे देगकियानखन नाःआ अते मार परोम ईंग अते मड़ंग बदसइदा गाँवरेपे सलाव जुवाः।” अरू ईसू होड़कू अँननकू अँकू ओड़ाःरेय वारगोतेडकू।

⁴⁶ हना तयोमरे ईसू पहाड़ अगी अरजीगे लगा तोराय।

⁴⁷ सिंगाड़नेन दो डोंगा हुडिंग समुंदर तलारे दोहोना अरू ईसू एकला पहाड़रेय दोहोना।

⁴⁸ ईसू हँकूय ञेलतेरा दो होय मड़ंग होरते होयो कुदागोडकुःआ अरू हँकू डोंगा सलाव सलावकू पड़ूयना। दो हुडिंग भिनसाररे ईसू हना हुडिंग समुंदररे दनाः दाः चोटरे हँकू एचेरेय सेने सोदोरनेना। हाँय हँकू अते मड़ंग सेने पार लगाय ओंगोलतेरा।

⁴⁹ हनते हँकू ईसू समुंदररेय सेना हाँय ञेलतिडिगखनकू ओंगोलतेरा, “नाँय भूत हवे।”

⁵⁰ हाँय ञेलतेडखनकू बोरोयान अरूकू खिररीःआ। हनते हँकू एचेरे ईसू कतातेड, “डीड़गुःपे! ईंग हवे। अहापे बोर।”

⁵¹ हनते हँकू देगनेना हना डोंगारे ईसू देगनेना अरू होय रोंकावयान। हना ञेलवाडखन हँकू मुरुककू बयावयान।

⁵² ईसू होड़कू जोम लगा रुटीय बगरागोतेड हना हँकुःआ चेलाकूतेन ञेलतेडा। मनदो हँकूराः जीव केटेगयान अरू हँकुःआ होड़कू ईसूराः जंगर मेरकू सुदी अवेगाड।

हसूत होड़कू ईसू नपायतेडकुःआ

⁵³ ईसू अरू आँयगरिकुःआ मूक चेलाकू हुडिंग समुंदर पारनेनखन गेनेसेरेत छतररेकू सोदोरनेना अरू हँकू डोंगा, समुंदर अतेकू उडुंग अटूड।

⁵⁴ दो हँकू डोंगा अतेकू उतरावनेन दो ओहेन होड़कू ईसूकू सिनहागोतेडीग।

⁵⁵ हंडाकुःआ होड़कू एटाः एटाः सहर अरू गाँवकून होर सेनेवाडखन ईसूराः बदीरेकू कता उदुःतेरा। ईसू दोहोना हना ततेररे हँकुःआ होड़कू अँकूरिकुःआ बेमरियाकू पटियारेकू दोहेँ अगूतेडकुःआ।

⁵⁶ ईसू सेनेडा हना सहर, गाँव अरू डीहरिकुःआ होड़कू अँकूरिकुःआ बेमरियाकू बजाररे एचे गेतेगकेडकूखन हँकू लगा ईसू एचेरेकू असेगेःआ, “ने गुरुजी, बेमरियाकू आमराः सोनहे असराम टोँवाव ओवाकू।” अरू ईसूकू टोँवावतेरा हँकुःआ जमा होड़कू नपाययान।