मरकूस 5 - Korwa Bible

भूत समसावतिरिया हाँय होड़ ईसू नपायतेरा

¹ ईसू अरू आँयग चेलाकू हुडिंग समुंदर पारनेनखन गिरासेन छतररेकू सोदोरयान।

² ईसू डोंगा अतेय उतरावनेन दो, भूत समसावनेना मी होड़ मड़गट अते उडुंगकियानखन ईसू सुदाय जुमावनेना।

³ हाँयग होड़ मड़गटरेय दोहोना अरू तोनोंगीग हाँय सिकिड़ीते हों तोतोल लगा मेरकू अवेगडीग।

⁴ होड़कू हाँय सिकिड़ी अरू बिरीतेकू तोलेया। हनारे हों हाँय हना सिकिड़ीय सीडगोडा अरू बिरी गुन लकने सीड खुटी कटड़ा एंडागोडा। तोनोंगीग हाँय मेरकू कबू अवेगडीग।

⁵ हाँय सगर सइट मड़गट अरू पहाड़रेय खिररीःआ अरू दिरिते अनँयग आँयगतेय ञिडुःआ।

⁶ हाँय ईसू मुरुक लंकातेय ञेलतिरिया अरू बतकाव सेनेडखन ईसू मड़ंगरे उकुड़ोमवाडखने सलामतिरिया।

⁷ दो ईसू हाँयग भूत एचेरेय कताया, ने भूत, आम नाँयग होड़ अतेम उडुंग जुवाः, माःआन।

⁸ हनालगा हाँय मरंग बकाते ईसू एचेरेय कतातेड, “ने ईसू, भाबी भगवानरीग बेटा! आम ईंग चिला लगाम हलकइनगींगतना? भगवानराः किरिया जोमवाडखनिंग कतायता, ईंग पीरा अलोम एमेवायिंग।”

⁹ दो ईसू हाँय एचेरेय होंबोरतेरा, “आमराः ञाव चेले माःआन इदा?” दो हाँय कतातेड, “अले मुरुक इदानलेःआ। हनलगा ईंगराः ञाव सइना हवे।”

¹⁰ दो भूत ईसू एचेरे असे घड़ीने कताया, “अले नाःआ देस अते अहम वार उडुंगले।”

¹¹ दो हंडा मुरुक बटूड़ सुकरीकू बुरचूड चोटरेकू सराःआ।

¹² हँकुःआ भूतकू ईसू एचेरे असे घड़ीनकू कताया, “अले मँकूदेराः सुकरीकू एचेरे वार बोलोगोडले।”

¹³ अरू ईसू हँकूय वारगोतेडकू। हनते हँकुःआ भूतकू हाँयग होड़ अते उडुंगकियानखन बार हजार सुकरीकू एचेरेकू बोलोयान। दो सुकरीकू दरा अते बतकाव उतरावनेनखन समुंदररेकू बोलो बुडावयान।

¹⁴ सुकरी सरवाहाकू ञीरयान अरू सहर अरू गाँवकूनरे हना सरवनकू कता उदुःतेड अरू हंडा होयानेना हना ञेल लगा मुरुक होड़कू सेनेडा।

¹⁵ हँकुःआ होड़कू ईसू एचेरेकू सेनेडा दो मड़ंगरे मुरुक भूतकू समसावनेना हाँयग होड़ सुरतानेनखन सोनहे तुसिंगकेडखने दुड़ुःयान, हना ञेलवाडखनकू बयावयान।

¹⁶ दो हंडाकू दोहोना हँकुःआ होड़कू, मड़ंगरे भूतकू समसावनेना हाँयग होड़ बदीरे अरू सुकरीकू बदीरे जमाकूनकू कता उदुःतेरा।

¹⁷ हनते हँकुःआ होड़कू ईसू एचेरे असे घड़ीनकू कताया, “ने साहेब, आम अले सिमान अते सलाव जुवाःमे।”

¹⁸ ईसू डोंगारेय देगयान दो मड़ंगरे भूत समसावनेना हाँयग होड़ ईसू एचेरेय कताया, “ईंग आम सुदा सेने ओवायिंगमे।”

¹⁹ मनदो ईसू हाँय सेन लगा मेरेय एमेवागाडीग अरू हाँय एचेरेय कतातेड, “आम ओड़ाःमे कुदा जुवाः अरू भगवान सोगावाडमेखन आम जीव करा इयाय नपायकेडमेःआ, हना होड़कू एचेरेम कता उदुःगे।”

²⁰ दो हाँय तोराय अरू अनँयग देस दिकापुलीसरे ईसू एचेतेरा हना जमाकू एचेरेय कता उदुःतेड अरू जमा होड़कू बयावयानकू।

ईसू मी अइमीय नपायतेरा

²¹ हनते ईसू डोंगारे हना हुडिंग समुंदर अरू पारनेनखन मार परोमे कुदा सेनेडा अरू हना समुंदर धरीरेय दोहोना। दो मुरुक होड़कू ईसूराः चइरो गतरकू जुमावयान।

²² दो हंडा मी होड़ आईर ञावीग होड़ दोहोना। हाँय अरजी ओड़ाःरिकुःआ हातपात होड़कू अते मी होड़े दोहोना। हाँय ईसूय ञेलवाडखन ईसूराः काटतरे उकुड़ोमवाडखन मुरुके असेया,

²³ “ईंगरीग हुडिंगीग बिटी गुजुः इया इदानिया। आम ईंग ओड़ाःरे वेगकियानखन हाँय चोटरे तिःईम मंडाव। दो हाँय नपायकियानखन जीयते दोहोनता।”

²⁴ दो ईसू हाँय सुदाय सेनेडा। अरू सेनेन सेन दूररे मुरुक होड़कू हों रेहेड-तेपेडकू सेनेडा।

²⁵ दो हंडा मी होड़ अइमी दोहोना। हाँयके बारह बरिस वरीते नहावन दोहोना।

²⁶ हाँय मुरुक जिड़ीदारकू ओजाहते मुरुक पिराय सहावनेन अरू आँयगराः जमा आन-धान नाःआ बेमारी लगाय चबागोतेड। हनारे हों तोनोंग नफा मेरेय पवावगान, मनदो हाँयराः बेमारी अनउर बगरायान।

²⁷ हाँय ईसू बदीरेय अयूमतेरा अरू हना रेहेड-तेपेडरे ईसू देह दूर सेनेडखन हाँयराः सोनहेराः असराय टोँवावतेरा।

²⁸ हाँयग अइमी अनँयग जीवरेय कतातेरा, ईंग हाँयराः सोनहेराः असरायिंग टोँवाव दो ईंग ननपाय जुवाःता, माःआन।

²⁹ हननमेला हाँयग अइमी नहावन बेमारीते नपाययान अरू हना हाँय अनँयग देहरे ओहेने सुदीगोतेड।

³⁰ हाँयग अइमी ईसूय टोँवावतेड ओहेन ईसू सुदीबाःगोतेड, ईंग अते जंगर उडुंगकिया, माःआन। दो हाँय उलटावनेनखन जमा होड़कू एचेरेय होंबोरतेरा, “ईंगराः सोनहे इये टोँवावकेरा?”

³¹ दो चेलाकू हाँय एचेरेकू कतातेरा, “परबू, नाःआरे मुरुक बगरा होड़कू इदा अरू रेहेड-तेपेड इदानकुःआ अरू आम कतायतना, इये ईंगे टोँवावतेरा, माःआन।”

³² हनते ईसू इये ईंगे टोँवावकेरा हना सुदीगेय लगा आँयग अउग-बउगे ञेला।

³³ दो हाँयग अइमी सुदीगोतेडे, ईंग नपाययना, माःआन अरू बोतोरते कलपाः घड़ीन ईसूराः मड़ंगरे उकुड़ोमवाडखन अनँयग एचेरे होयानेना हना जमाकूने कताया।

³⁴ दो ईसू हाँय एचेरेय कताया, “ने दिदी, आम ईंग एचेरेम बिसवासतेरा। हनालगा आम नपाययना। सलसततेम सलाव जुवाः।”

³⁵ ईसू कनताय मेला आईरराः ओड़ाः अतेकू वेगिकिया हँकुःआ होड़कू हाँय एचेरेकू कताया, “आम बिटी गोएगयनाय। दो गुरुजी चिला लगाम हलकइनगेयतना?”

³⁶ हना बड़रा ईसू अयूमतेरा दो हाँय हना बड़रा मेरेय अयुमेःआ हना इया आईर एचेरेय कताया, “अलोम बोर, ईंग एचेरेम बिसवासगोड ञवन।”

³⁷ दो ईसू आँयग सुदा सेन लगा पतरस, एकूब अरू एकूबरीग बोहोत एहुना अड़ाःवाडखन तोनोंगीग मेरेय एमेगाड।

³⁸ हँकू, अरजी ओड़ाःरीग हातपात होड़राः ओड़ाःरेकू सोदोरनेन अरू ईसू हंडाकुःआ होड़कू मुरुक फिकीर घड़ीनकू इयामा, हनाय ञेला।

³⁹ दो हाँय ओड़ाः पेंदारे सेनेडखन हँकुःआ होड़कू एचेरेय कताया, “अपे चिला लगा फिकिराः घड़ीनपे इयामतना? नाँयग एराहोन मेरेय गोएगगान। नाँय दो अपीगतनाय।”

⁴⁰ दो हँकुःआ होड़कू ईसूकू लंदावाःआ, मनदो ईसू जमा होड़कू बहरीय उडुंगगोतेडकू अरू एकला हाँयग एरा होनरिकिनाः एंगात अपात अरू अनँयग चेलाकू सुदा हाँयग एराहोनकू एचे गेतेगा हना छिनारेकू बोलोयान।

⁴¹ हनते ईसू हाँयग एराहोनराः तिःई साबतेडखने कताया, “तलीता कूमी!” (नाःआराः मतलोब नाःआ हवे, ने एराहोन रिमुःमे।)

⁴² हननमेला हाँयग एराहोन चड़ाँनेना अरूय सेना। (हाँय बारह बरिसीग एराहोन दोहोना।) अरू हँकू जमाकू मुरुककू बयावयान।

⁴³ हनते हाँय हँकू एचेरे हुकुमवाडखने कतातेरा, “नाःआ कता तोनोंगीग एचेरे अपे अहापे उदगे”, अरूय कताय, “नाँय जोम लगा कहिसाः एमेवायपे।”