मरकूस 3 - Korwa Bible

तिःई कोकोड़ावतो होड़ ईसू नपायतिरिया

¹ एटाः लोड़ोनराः दिन ईसू अरजी ओड़ाःरेय सेनेडा। हंडा तिःई कोकोड़ावतो मी होड़ होड़ दोहोना।

² दो तोनोंग तोनोंग होड़कू ईसू बदीगेय लगाकू ञामा। हँकू ईसू लोड़ोनराः दिनरे माँयग होड़े नपायगेयता जा कोवान हनाकू टोहाःआ।

³ ईसू हाँयग तिःई कोकोड़ावतो होड़ एचेरेय कताया, “जमा होड़कू तलारे चड़ाँनमे।”

⁴ हनते ईसू हँकू एचेरेय होंबोरतेरा, “लोड़ोनराः दिनरे नियम इया नपाय एचे लगा इदा जा बेलूर? जीव बनसावगे लगा इदा जा ञेड एंडा लगा इदा?” मनदो हँकू कलेकालकू दोहोना।

⁵ ईसू हँकुःआ होड़कूराः कटकट जीवतेय रीसयान। हनते ईसू चइरो गतर होड़कू ञेलवाडखन तिःई कोकोड़ावतो होड़ एचेरेय कताया, “आम तिःई लंबावगेमे।” दो हाँय अनँयग तिःईय लंबावगोतेड अरू हाँयराः तिःई नपाययान।

⁶ हनते फरीसी होड़कू बहरी उडुंगवाडखन हरदोसरिकुःआ चेलाकू सुदा जुमावनेनकूखन ईसू एचे ञेड गोजेय लगाकू राइयान।

मुरुक होड़कू ईसूकू ओतोंग वेगा

⁷ हनते ईसू अरू आँयगरिकुःआ चेलाकू हना सहर अते गलीलराः हुडिंग समुंदर अगीकू सेनेडा अरू गलील छतर अरू एहूदिया छतर अते मुरुक होड़कू हंडा हाँय तयोम तयोमकू सेनेडा।

⁸ एरुसलेम सहर अते अरू इदूमिया छतर अरू एरदन नई मार परोम अते अरू सूर अरू सइदा सहर अते हों मुरुक होड़कू ईसू एचेकेरा हना अयूमकेडखन हाँय एचेरेकू सेनेडा।

⁹ मुरुक होड़कू दोहोना हनालगा, ईसू आँयग चेलाकू एचेरेय कतातेड, “मीटोंग डोंगा ईंग लगा सपड़ावगोडपे जेमहा नँकुःआ होड़कू ईंगकू अलोकू रेहेड-तेपेडगे।”

¹⁰ ईसू मड़ंगरे मुरुक होड़कूय नपायतेरा, हनालगा होड़कू हाँय टोँवाव लगाकू रेहेड-तेपेड होड़ेंगा।

¹¹ भूतकू ईसूकू ञेला दो हाँय मड़ंगरेकू कसड़ जुवाःआ अरू खिररीवाडखनकू कताया, “आम भगवानरीग बेटा हवे, माःआन।”

¹² मनदो ईसू हँकू एचेरे सेतावतेडखने कताया, “ईंग बदीरे होड़कू एचेरे अहापे कता उदुःगे।”

ईसू बारहगोटोंग मूक चेलाकू नुमाड़तेरा

¹³ तोनोंग दिन तयोमरे ईसू मीटोंग पहाड़रे अरजी लगाय सेनेडा। आँयग चहाःआ हँकुःआ होड़कू अनँयग एचेरेय राःतेडकुःआ अरू हाँय एचेरे हँकू वेजेडा।

¹⁴ ईसू हँकू अते बारहगोटोंग होड़कूय नुमाड़तेरा अरू आँयगरिकुःआ मूक चेलाकूय बड़ाँवतेडकुःआ। हँकू ईसू सुदा दोहोन लगा अरू एटाः होड़कू एचेरे सेनेवाडखन परसारगे लगाय नुमाड़तेडकुःआ।

¹⁵ हँकूके भूतकू एचे उडुंगकू लगा हों हातपाते एमेवातेडकुःआ।

¹⁶ ईसू नुमाड़तेडकुःआ हँकुःआ बारहगोटोंग मूक चेलाकू नँकुःआ होड़कू हवे। ईसू पतरस माःआने ञावतिरिया हाँयग सिमोन,

¹⁷ ईसू बुअनरगिस माःआने कतावाया हँकिन जबदीरीग बेटा एकूब अरू आँयग बोहोत एहुना, (बुअनरगिसराः मतलोब ठेड़ररेरिकिनाः बेटाकिन हवे),

¹⁸ अंदरियास, पिलिपूस, बरतुलमाय, मती, तोमा, हलपाइरीग बेटात एकूब, तददे, सिमोन कनानी

¹⁹ अरू ईसू तयोमरेय एचे साबतिरिया हाँयग जूदा इसकरियोती।

ईसू अरू दरहा

²⁰ हनते ईसू मीटोंग ओड़ाःरेय बोलोनेना। हंडा हों मुरुक होड़कू जुमावनेना अरू ईसू अरू आँयगरिकुःआ चेलाकू जोम लगा हों मेरकू अवेया।

²¹ नाःआ कता ईसूराः ओड़ाःरिकुःआ होड़कू अयूमतेरा दो हँकू हाँय साब गोःगे लगाकू वेजेडा। हँकू कतातेड, “नाँयग ईसू दो बउड़ावयनाय।”

²² एरुसलेम सहर अते नियम चेडदार होड़कू वेजेडा, दो हँकू होंकू कतातेड, “नाँय एचेरे भूत इदानिया। नाँय भूतकूरीग राजा दरहाते भूतकूय उडुंगता।”

²³ दो ईसू हंडाकू दोहोना हँकुःआ होड़कू एचेरे अउल-तउल कहड़ीय कतातेड, “कलउ करा उड़ी कलउए उडुंग अवेता?

²⁴ मिनी देसरेरिकुःआ होड़कू अँननकू अँकू रेडेग होड़ेंग दो करा उड़ीकू दोहो अवेन?

²⁵ मिनी ओड़ाःरिकुःआ होड़कू अँननकू अँकू रेडेग होड़ेंग दो करा उड़ीकू सलसतरेकू दोहो अवेन?

²⁶ हनन उड़ी कलउ अरू आँयगरिकुःआ सइनाकू अँननकू अँकू रेडेग होड़ेंग दो हाँयराः राइज लाय जुवाःता।

²⁷ ओंगलेपे, अपे तोनोंगीग जंगरदार होड़राः ओड़ाःराः जमा जइतकून इनिग उउडुंग दोहोन दो, मड़ंगरे हना ओड़ाःरीग जंगरदार होड़ तोल रहावगेय लगा इदा। हनते हाँयराः जमा जइतकूनपे इनिग अवेता।

²⁸ अयुमेपे, होड़कूराः जमा कसूर अरू एटाःकूकू ओपताता हना हों भगवान बराव एंडागोडता।

²⁹ मनदो तोनोंगीग होड़ सुद बिरुवा बदीरेय ओपताता, दो हना भगवान कहियो ओरोय बराव एंडातेरा अरू सगर सइट वरी कसूर होड़े दोहोनता।”

³⁰ हँकू कतातेरा, नाँय एचेरे भूत इदा, माःआन। हनालगा ईसू नाःआ इया सुद बिरुवाराः ओपता बदीरे सेतावकेडखने कताकेरा।

ईसूराः सताय मइछुवा

³¹ दो ईसूरीग एंगात अरू बोपोहकूतेन हाँय एचेरेकू वेजेडा। हँकू बहरीकू चड़ाँनेनखन तोनोंगीग होड़ हाँय राः अगूगेय लगाकू वारगोतेडीग।

³² मुरुक होड़कू हाँय सुदाकू दुड़ुःकुःआ। हँकू कतातेड, “ने गुरुजी, ञेलमे, आम एंगात अरू बोपोहकूताम बहरीरे आमकू ञामतना।”

³³ दो ईसू हँकू एचेरेय होंबरेःआ, “ईंगरीग एंगायिंग अरू बोपोहकूतिंग इयेकू हवे?”

³⁴ दो ईसू हाँय सुदाकू दुड़ुःकुःआ हँकुःआ होड़कू अगी ञेलकेडखने कताया, “अयुमेपे, ईंगरीग एंगायिंग अरू ईंगरिकुःआ मेमेसकू अरू वपक बोपोहकूतिंग नंडा इदानकुःआ।

³⁵ भगवानराः हिछा इया सलाःता हँकुःआ होड़कू सतायरे ईंगरीग एंगायिंग अरू ईंगरिकुःआ मेमेसकू अरू वपक बोपोहकूतिंग हवे।”