मरकूस 16 - Korwa Bible

ईसू जियाव रेमनेना

¹ लोड़ोनराः दिन पारयान दो मगदलियायिन मरियम अरू एकूबरीग एंगात मरियम अरू सलोमी ईसूराः मुरदारे तिलाःगे लगा नपाय महका हना जिनिसकूनकू किजातेरा।

² हपताराः मड़ंग एतवार दिन अंगुः निंदावा मड़गटरेकू सेनेडा।

³ हँकू अँननकू अँकू कता होड़ेंगा, “अबू लगा मड़गट दुवारराः दिरि इये चलाःगोडता?”

⁴ हनते हँकू हंडा सेनेडखनकू ञेलतेरा दो मुरुक मरंग दोहोना हना दिरि चलाः एंडात दोहोना।

⁵ मड़गट लात पेंदारेकू बोलोनेन दो हंडा मी होड़ डिंघा उजड़ सोनहे तुसिंगतो खउना गतर दुड़ुःतोकू ञेलतिरिया अरू मुरुककू बयावयान।

⁶ दो हाँय कतावातेडकू, “अहापे बयाःआ। कुरूसरेकू ठोंकाव ञेडतिरिया हाँयग नसरतरीग ईसूपे ञामतना जा? हाँय नंडा कोवाया। हाँय जियाव रेमयनाय। हाँय दोहोना हना मनेनपे ञेल।

⁷ मनदो अपे सेनेवाडखन पतरस अरू हाँयगरिकुःआ एटाः चेलाकू एचेरेपे कताय, ईसू जियाव रेमकिया अरू हाँय अपे अते मड़ंग गलील छतररेय सेनता। अपे एचेरेय कतातेरा हनन इया हाँय हननंडापे ञेलेयता, माःआन।”

⁸ हँकू बोरतेकू एकलाःआ अरूकू बयावयान। हनालगा हँकू लात मड़गट अते उडुंगनेनखनकू ञीरयान। हँकू मुरुककू बोराः। हनाते तोनोंगीग एचेरे कही माःआन मेरकू साला।

ईसूराः एचे ञिलुः

⁹ [तोनोंग बेला तयोमरे हनानाः दिन अनंगुः निंदावा बेला ईसू जियाव रेमनेनखन मगदलियायिन मरियम एचेरे अनँयग एचे ञेलयान। ननाँयग मरियम अते ईसू मड़ंगरे सातगोटोंग भूतकूय एचे उडुंगतेरा।

¹⁰ फिकीरतेकू इयामाः हँकुःआ ईसूरिकुःआ सउंगताकू एचेरे हाँयग मरियम सेनेडखन नाःआ सरवने उदुःतेरा,

¹¹ “ईंग ईसू जियाव रेमतोयिंग ञेलतिरिया।” मरियम नाःआ कताय कता उदुःआ, मनदो हँकू मेरकू बिसवासगाड।

ईसू चेलाकिन एचेरेय एचे ञेलयान

¹² हना तयोमते चेलाकू अते बार होड़ गाँव गतरकिन सेन मेला, ईसू एटाः इया हँकिन एचेरे अनँयग एचे ञेलयान।

¹³ हँकिन हों ईसू ञेलतेडखन ईसूरिकुःआ अदोम चेलाकू एचेरे एरुसलेम सहर अगी कुदा सेनेडखनकिन कता उदुःवाकुःआ। मनदो हँकिनराः बड़रा हों हँकू मेरकू बिसवासगाड।

पपरसार लगा गारह मूक चेलाकूराः सुनाव

¹⁴ हना तयोमते हँकू गारहगोटोंग मूक चेलाकू जोजोम लगाकू दुड़ुःकुःआ दो, ईसू हँकू एचेरे अनँयग एचे ञेलेयान। ईसू जियाव रेमयनाय, हना होड़कू उदुःवाकुःआ, दो हँकू मेरकू बिसवासगाड अते ईसू हँकूराः बेगर बिसवास अरू केटेग जीव अतेय डंटावतेडकुःआ।

¹⁵ हनते ईसू हँकू एचेरेय कतातेरा, “अपे नाःआ जमा चउंदीसरिकुःआ होड़कू एचेरे सेनेकियानखन नपाय सरवनपे परसारगोड।

¹⁶ नाःआ सरवनकू बिसवासकेडखन बतिसमाकू गोःता, हँननकुःआ होड़कू भगवान सडावकूता। मनदो मेरकू बिससवासगेता, हँकुःआ होड़कू भगवान डंडियाकूताय।

¹⁷ बिसवासगेता, हँकुःआ होड़कू नाःआ जमाकूनकू चिनहा इयाकू एचे अवेता। हँकू ईंग ञावते भूतकूकू एचे उडुंगगोडता अरू हँकू एटाः एटाः नँवा नँवा भासीकू बड़राता।

¹⁸ बींगकूकू रेमगोडता अरू तोनोंगाः महुराकू ञूगोड हों हँकू ओरोकू गोएगनेना। हँकू हसूतेकू दोहोन, हँकुःआ होड़कू बोःरे तिःईकू खेपा दो हँकुःआ होड़कू नपाय जुवाःताकू।”

ईसू सेरमो देस अगी भगवान रेम गोःयाडीग

¹⁹ दो परबू ईसू हँकू सुदा बड़रानेन तयोमरे सेरमो देस अगी भगवान रेम गोःयाडीग अरू आँयग खउना तिःई गतररेय दुड़ुःयना।

²⁰ हनते चेलाकू जमा देसरे सेनेवाडखन नपाय सरवन होड़कूकू परसार उदुःवातेरा। परबू ईसू हँकू जमा एचेगे लगा डीड़े एमेवाकुःआ। अरू हँकू बयाव जुवाः इयाःआ बुताकूनकू एचेःआ अते परबूराः सरवन सताय हवे माःआने उदुःगेःआ। आमीन!]