मरकूस 15 - Korwa Bible

ईसू पिलातूस मड़ंगरे

¹ निंदावा ओहेन, मरंग पुजउरीकू अरू इसराएलरिकुःआ मूक होड़कू, नियम चेडदार होड़कू अरू मरंग पंचाइतरिकुःआ जमा होड़कू सलाहनेनखन ईसूकू एचे तोलतेरा अरू हातपात होड़ पिलातूस एचेरेकू इदीतिरिया।

² दो पिलातूस होंबोरतिरिया, “एहूदाकूरीग राजा अनम हवे जा?” दो ईसू हाँये कतावाड, “हाव, आम अनम कतायतना।”

³ मरंग पुजउरीकू ईसू बदीरे मुरुककू बदीगेया।

⁴ दो पिलातूस हाँय एचेरे अरूय होंबोरतेरा, “आम तोनोंग कता मेरेम उदुःगेता जा? ञेलमे, नँकुःआ होड़कू तुमिन बड़रारे आमकू बदीतना?”

⁵ मनदो ईसू तोनोंगाः मेरेय कतागाड अरू हना अते पिलातूस मुरुके बयावयान।

ईसू एचे गोएगगे लगा हुकुम

⁶ सगर बरिस पसहा परोबराः दिनरे पिलातूस, जेहेलरे तोलतोकू दोहोनता हँकुःआ होड़कू अते एहूदाकू अड़गेय लगाकू चहाःआ हाँयग तोनोंगीग मी होड़े अड़ाःगोडेया।

⁷ दो बराबा ञावीग मी होड़ होड़ दोहोना। हाँय होड़कू बलवाद लगाय एचे जुमावतेडकुःआ अरू होड़कूकू ञेड एंडातेरा। हनालगा हाँय जेहेलरे तोलतोय दोहोना।

⁸ होड़कू पिलातूस एचेरे सेनेडखनकू कताया, “ने साहेब, आम सगर बरिस जेहेलरे सींगतोकू दोहोनता हँकुःआ होड़कू अते मी होड़मे अड़ाःगोडेयता, हनन इयाम एचेय।”

⁹ दो पिलातूस हँकू एचेरेय होंबोरतेरा, “अपे चाहाःतनापे जा ईंग एहूदाकूरीग राजा अपे लगायिंग अड़ाःगोडेय?”

¹⁰ हाँय सुसुदीःआ मरंग पुजउरीकू ईसू इरातेकू एचे साबतिरिया।

¹¹ मनदो मूक पुजउरीकू पिलातूस बराबाय एचे अड़ाःगेय लगा हँकुःआ होड़कूकू एचे कतातेरा।

¹² नाःआ अयूमतेडखन पिलातूस हँकू एचेरे अरूय होंबोरतेरा, “अपे एहूदाकूरीग राजा माःआनपे कतावायता हाँय ईंग करा इयायिंग करजेय?”

¹³ दो हँकुःआ होड़कू खिररीवाडखनकू कतातेड, “नाँय कुरूसरेम एचे ठोंकाव गोजेय।”

¹⁴ दो हँकू एचेरे पिलातूस कतातेरा, “नाँय चिला लगायिंग एचे ठोंकाव गोजेय? नाँय चिलाय कसूरकेरा?” मनदो हँकुःआ होड़कू अरू खिररीवाडखनकू कताया, “नाँय कुरूसरेम एचे ठोंकाव गोजेय।”

¹⁵ हनते हँकुःआ होड़कूराः जीव बहालगुः लगा पिलातूस बराबा हँकू लगाय अड़ाःगोतेडीग अरू ईसू गुरुंदते एचे ञेडवडीगखन कुरूसरे ठोंकाव गोएगगे लगा रूमी सइना होड़कू एचेरेय जिमागोतेडीग।

सइना होड़कू ईसूकू लंदावातेरा

¹⁶ हनते सइनाकू, परिटोरियूमकू कतावाता हना पिलातूसराः गड़ही पेंदाराः राचरे ईसूकू गोःयाडीग अरू जमा सइनाकूकू राः जुमावतेरा।

¹⁷ हनते हँकू हाँय धुः-धुमइल रंगाः सोनहेकू एचे तुसिंगतिरिया अरू जनुम उयिंगतेडखन हाँयराः बोःरेकू पगरीगोतेड।

¹⁸ हनते ईसूराः मड़ंगरे उकुड़ोमवाडखन हाँयकू लंदा घड़ीनकू कताया, “ने एहूदाकूरीग राजा, सलाम सलाम।”

¹⁹ हँकू सरपीते ईसू बोःरे मेमेड होड़ मेमेड होड़कू ञेडेय घड़ीन हाँय सेरमोकू बेगा अरू उकुड़ोम घड़ीनकू सलाम ञवना।

²⁰ हाँयकू लंदावातिरिया हना तयोमरे हाँय अते हाँयकू तुसिंगतिरिया हना धुः-धुमइल रंगाः झोलोंगतो सोनहे एचे तोलेगतेडखन अनँयगराः सोनहेकू एचे तुसिंगतिरिया अरू हाँय कुरूसरे ठोंकाव गोएगगेय लगा राजाराः गड़ही अते एरुसलेम सहर बहरीकू गोःयाडीग।

ईसू कुरूसरेकू ठोंकावगोतेडीग

²¹ कुरेन सहररीग सिमोन ञावीग मी होड़ होड़ दोहोना। हाँय सिकंदर अरू रुपूसरीग अपात दोहोना। ईसूकू गोःआ हनमेला हाँय तोनोंग गाँव अते वेग मेलाय सेने पारा। दो सइना होड़कू, ईसूराः कुरूस हाँय रेनहाकू एचे साबतिरिया।

²² हनते ईसू गुलगुता ञावराः मी ततेररेकू गोःयाडीग (अरू हना गुलगुताराः मतलोब बोः खुरपीराः ततेर हवे।)

²³ हँकू हाँय ञूय लगा मूर ञावाः जिड़ी, अंगूर रस सुदा मेसातेडखनकू एमेवातेरिया। मनदो ईसू मेरेय ञूगाड।

²⁴ हनते हँकू हाँय कुरूसरेकू ठोंकावगोतेडीग अरू हाँयराः सोनहेकून गोः लगा चिठीकू चीट-पोटतेरा अरू हँकू हटिंगगोतेडकू।

²⁵ मी डांग बेर देगनेना हना बेला ईसू कुरूसरेकू ठोंकावगोतेडीग।

²⁶ ईसू बदीराः जाः चिठी नाःआ इया ओजाःतो दोहोना, नाँय एहूदाकूरीग राजा हवे, माःआन।

²⁷ हाँय सुदा बार होड़ इनिग होड़किन बनर गतरकिन दोहोना, मी होड़ खउना गतर अरू मी होड़ डिरही गतर कुरूसरेकू ठोंकावगोतेडकिन।

²⁸ [भगवानराः कागदरे नाःआ इया ओजाःतो इदा, हाँय कसूर होड़कू सुदाकू मेसातिरिया। अरू हना कता इया होनोयायान।]

²⁹ हना दूररेकू सेने पारा हँकुःआ होड़कू ईसू कुरूसरे ठोंकावतो ञेलतिरिगखन बोः डोलावकेडखन बेग-हता घड़ीनकू कताया, “अहाँ! आम दो भगवानराः ओड़ाः एचे रूबकेडखन अरू पेय दिनरेम तुलागोडता, जा?

³⁰ कुरूस अते उतरावकियानखन अनम आम बनसाःमे।”

³¹ नान इया पुजउरीकूरिकुःआ मूक होड़कू, नियम चेडदार होड़कू सुदा अँननकू अँकू लंदा घड़ीनकू कताया, “नाँय एटाः होड़कूय बनसावतेरा, मनदो अनँयग आँयगते मेरेय बनसाव अवेनतना।

³² ने इसराएलरीग राजा, मसी, नुँहू कुरूस अतेम उतराव वेग दो आम ञेलकेडखनले बिसवासगेता।” अरू हाँय सुदा कुरूसरे ठोंकावतोकिन दोहोना, हँकिन हों हाँयकिन लंदावाया।

ईसूराः गुजुः

³³ हना तयोमते तिकिन बेला वरीते ढड़का बेला वरी जमा देस अंदरायान।

³⁴ हनते ईसू मुरुक सटीतेय कताया, “इलोई, इलोई, लमा सबकतनी।” नाःआ कताराः मतलोब नाःआ हवे, “ने भगवान, ने भगवान, आम चिला लगाम अड़ाःगोतेडिंगा?”

³⁵ हंडाकू चड़ाँकुःआ हँकुःआ होड़कू अते अदोम होड़कू हाँयराः खिररी अयूमतेडखनकू कताया, “अयुमेपे, माँय इलियाहे राःतना।”

³⁶ अरू मी होड़ बतकाव सेनेडखन अंबटयान हना अंगूर रसरे रुवाय जोबरावतेडा अरू मीटोंग सरपीरे गुतू रहावतेडखन ईसूय एचे सुहावतेरा। हाँय कताया, “रहापे, ञेलेयताबू इलियाह नाँय उतरावगेय लगाय वेगताय जा ओरो।”

³⁷ दो ईसू मुरुक सटीते खिररी घड़ीन मिनी तुरहाय सहेडतेरा।

³⁸ अरू भगवानराः ओड़ाःराः मरंग परदा सेरमो अते लतार वरी बार फड़ायान।

³⁹ अरू मी सव सइनाकूरीग हातपात होड़ हंडा ईसू मड़ंगरेय दोहोना। हाँय ईसू करा इयाय सहेडतेरा हना ञेलतेडखने कताया, “सनातायतो, नाँयग होड़ भगवानरीग बेटाते दोहोना।”

⁴⁰ मुरुक बगरा अइमीकू तोरेते ईसूकू ञेञेला। हँकू अते मगदलियायिन मरियम, हुडिंगीग एकूब अरू ओसेसरीग एंगात मरियम अरू सलोमी दोहोना।

⁴¹ ईसू गलील छतररेय दोहोना हनमेला नँकुःआ अइमीकू आँयगरिकुःआ चेलाकू दोहोना अरू हाँयकू सेवा हड़ाःआ। अरू एटाः अइमीकू हों ईसू सुदा एरुसलेमरेकू वेजेडा।

ईसूराः मुरदा लात पेंदारेकू मंडावतेरा

⁴² दो सिंगाड़यान अरू लोड़ोनराः दिन वेग अते मड़ंग सपड़ाःराः दिन दोहोना।

⁴³ अरमतिया सहररीग उसूप ञावीग मी होड़ होड़ दोहोना। हाँय एहूदाकूराः मरंग पंचाइतरीग मी होड़ होड़ दोहोना। अरू हाँय भगवानराः राइज बुँहड़ीनता हना बेला लगाय ततंगीःआ। हाँय डीड़तेडखन पिलातूस एचेरे तोराय अरू ईसूराः मुरदा दिरि लातरे मंडावगे लगाय असेतेरा।

⁴⁴ ईसू ओहेने गोएगयान, हना अते पिलातूस बयावयाने। अरू हाँय मी सव सइनाकूरीग हातपात होड़ राःतेडखने होंबोरतिरिया, “ईसू गोएगनेन अते दिरी होयायना जा?”

⁴⁵ ईसू गोएगयान, माःआन पिलातूस हाँयग होड़ सुदा सुदीयान, दो ईसूराः मुरदा तीलगे लगा उसूपे कता जिमावातेरा।

⁴⁶ दो उसूप कफन सोनहेय किजातेरा अरू मुरदा कुरूस अतेय उतरावतेरा। हनते हाँय हना मुरदा सोनहेते बेवटावतेडखन चटइनरे कोटेग कोटेगकू तुलातेरा हना लात पेंदारेय मंडावगोतेड। हनते हना लात दुवाररे मीटोंग दिरि कोलोंग रेडगोतेडे।

⁴⁷ मगदलियायिन मरियम अरू ओसेसरीग एंगात मरियम ञेञेलाकिन हाँय करेकू मंडावकिरिया।