मती ओजाःतेरा भगवानराः नपाय सरवन 3 - Korwa Bible

बतिसमा एमे होड़ एहुनाराः परसार

¹ हनानाः दिनरे बतिसमा एमेयीग होड़ एहुना एहूदिया छतरराः टयंगाब ततररेय परसारतेरा,

² “भगवान अपे एचेरे राइजगे लगाय बुँहड़ीकेरा। हनालगा अपे कसूर अते जीवपे कुदा।”

³ ननाँयग होड़ बदीरे भगवानराः बड़रा कतायीग होड़ एसयाह कतातेरा, टयंगाब ततेररे खिररीवाडखने कतायता हाँयग होड़राः अरो, परबू वेग लगा दूरपे संजोड़का अरू हाँय लगा दूरपे सोएगगोड।

⁴ एहुना ऊँटराः ऊबते तुलात सोनहे अरू जानरराः हेड़ेतते तुलात पेटार अनँयग मयांगरेय तुसिंगगेःआ। हाँय पंपाकू अरू टयंगाब ततेररिकुःआ रासकूय जोमा।

⁵ दो मरंग सहर एरुसलेमरिकुःआ होड़कू, एहूदिया छतररिकुःआ होड़कू अरू एरदन नईराः चइरो गतररिकुःआ होड़कू अते मुरुक बगरा होड़कू एहुना एचेरेकू सेनेडा।

⁶ अँनकूराः कसूरकू कबुलावनेना, हँकुःआ होड़कू लगा एहुना बतिसमाय एमेतेरा।

⁷ फरीसी होड़कू अरू सदूकी होड़कू बतिसमा गोः लगाकू वेजेडा दो, हाँय हँकू एचेरेय कतातेड, “ने महुरा बींग इया होड़कू, दरवाःआ हना डंडियाव पवाः अते बनसाः लगा इये सेतावकेडपेःआ?

⁸ सींग दूब नपाय जोःओ जोःता, हना इया कसूर अते जीव कुदाकेडखन अपे नपाय जीवपे जियाः।

⁹ अपे अहापे ओंगोलगे, इबराहीम अलेरीग खुटिपहार होड़ हवे, अरू हनाते अले बनसाव जुवाःता, माःआन। अपे ईंगपे अयूम, नाःआ दिरिकूनते हों इबराहीम लगा लइंकू भगवान जनमाव अवेकूताय।

¹⁰ नुँहू सींग दूब घींग लगा वके सपड़ावतो इदा। नपाय जोःओ मेर जोःता हना जमा सींग दूबकून, घींगकेडखन सेंगेलरेकू बाल लोगोडता।

¹¹ अपे कसूर अते जीवपे कुदागे लगा, दाःते बतिसमायिंग एमेयतना। मनदो ईंग तयोमरेय वेगता, हाँयग होड़ ईंग अते मरंग इदानिया। हाँयराः चाटी रेम जुकूर हों कोवायिंगा। हाँय सुद बिरुवाते अरू सेंगेलते अपे बतिसमाय एमेवापेता।

¹² अनँयग गोहोम खनहियाड़ अतेय तेय अमिंग लगा अरू अकिडकेडखन पलारे दोहोय लगा हाँयराः हटाः अनँयग तिःईरे इदा। मनदो कहियो मेर इड़ीगगुःता हना सेंगेलरे कुटाय बालगेता।”

एहुना अते ईसू बतिसमाय गोःतेरा

¹³ हना तयोमरे ईसू गलील छतर अते एरदन नई अगी एहुनाते बतिसमा गोः लगाय सेनेडा।

¹⁴ दो एहुना हाँय रोंकावगेय लगा ओंगोलतेडखने कताया, “ईंग आम एचेरे बतिसमा गोः लगा इदा अरू नुँहू आम ईंग एचेरे बतिसमा गोः लगाम वेगकिया जा?”

¹⁵ मनदो ईसू हाँय एचेरेय कतातेड, “नुँहू नाःआ इया होनोयाः ओवामे। भगवान एचे लगाय ओंगलेतना, हना होयाः लगा नाःआ इयालंग एचेय दो नपाय दोहोनता।” हनते एहुना ईसूराः कताय मनावयान।

¹⁶ ईसू बतिसमा गोःतेडखन दाः अतेय उडुंगगुः मेला सेरमो देस गीगयान अरू भगवानराः बिरुवा, पेरवाँ तितीग इया ईसू चोटरे उतराव वेगनेना, हना अनँयग ञेलतेरा।

¹⁷ अरू सेरमो होरते बड़राय अयूमतेरा, “नाँय ईंगरीग दुलार बेटा हवे अरू नाँय सुदा राजू इदानिंगा।”