मती ओजाःतेरा भगवानराः नपाय सरवन 28 - Korwa Bible

ईसूराः जियाव रिमुः

¹ लोड़ोनराः दिन अते एटाः दिन, एतवार दिन अनंगुः अंगुः मेला, मगदलियायिन मरियम अरू एटाःयीग मरियम ईसूराः लात मड़गट ञेल लगाकिन सेनेडा।

² दो ओहेन हंडा ओत मुरुक डोलाःआ अरू सेरमो देस अते परबू भगवानरीग बराहील मड़गट अगीय उतराव वेजेडा। अरू हना मरंग दिरि, दुवारते कोलोंग चलाःतेडखन हना दिरि चोटरेय दुड़ुःयान।

³ हाँयराः मुरइत ठेड़रे इया विड़चेड़ा अरू हाँयराः सोनहे फक-फक उजड़ ञिलुःआ।

⁴ हंडा अगुरा लगाकू दोहोना हँकुःआ अगुरादारकू बोर घड़ीनकू एकलाःआ अरू गोएगतो होड़कू इयाकू होयायान।

⁵ मनदो सेरमो देसरीग बराहील अइमीकिन एचेरेय कतातेड, “अबा अहाबा बोर। ईंग सुदीयतना कुरूसरेकू ठोंकाव गोएगतिरिया हाँयग ईसूराः मुरदाबा ञामतना।

⁶ हाँय नंडा कोवाया। हाँय कतातेरा हनन इयाय जियाव रेमकिया। दबूबा, हाँयराः मुरदाकू मंडावतेरा हना ततेररे अँननबा सेनेकियानखनबा ञेल।

⁷ हनते ओहेनबा सेन अरू हाँयरिकुःआ चेलाकू एचेरेबा कता उदुःगे, ईसू गोएगतो होड़कू अतेय जियाव रेमकिया, माःआन। अरू हाँय अपे अते मड़ंग गलील छतर अगीय सेनतना। हंडा हाँयपे ञेलेयता। ईंग कताकेरा हना कतापे उहियार।”

⁸ दो हँकिनाः अइमीकिन ओहेन हना लात मड़गट अते बोर अरू मुरुक बहालतेकिन कुदायान अरू चेलाकू एचेरे कता उदुःगे लगाकिन बतकाव सेनेडा।

⁹ मनदो हँकिन सेनेन सेन मेला ईसू हँकिन सुदाय जुमावनेना अरूय कतातेड, “सलाम।” हँकिन हाँय एचेरेकिन सेनेडा अरू हाँयराः काट साबतेडखन हाँयकिन जागतेरा।

¹⁰ हनते ईसू हँकिन एचेरेय कतातेड, “अबा अहाबा बोर। ईंगरिकुःआ अजी बोपोहकूतिंग एचेरेबा सेन अरूबा उदुःवाकू, अपे गलील अगीपे सेन। हंडा ईसूपे ञेलता, माःआन।”

अगुरादारकूराः हिदइत

¹¹ हँकिन सेनेन मेला अदोम अगुरादारकू सहर अगीकू सेनेडा अरू मरंग पुजउरीकू एचेरे होयानेना हना जमाकूनकू कता उदुःतेरा।

¹² हनते मरंग पुजउरीकू एहूदाकूरिकुःआ मूक होड़कूकू राः जुमावतेरा अरू मीटोंग बुइदकू तुलातेरा।

¹³ हँकू अगुरादारकू लगा मुरुक ढिबुवाकू एमेगोतेड अरूकू कतातेड, “अपे नाःआ इया होड़कू एचेरे कता उदुःगे लगा इदा, अले रइतरे अपीग मेला हाँयरिकुःआ चेलाकू वेजेडखन हाँयराः मुरदाकू इनिग गोःयरा, माःआन।

¹⁴ नाःआ कता मरंग हातपात होड़ पिलातूस अयुमे दो अपे लगा हाँय एचेरेले बुतुड़ुता अरू अपे लगा तोनोंगाः सिकिसता ओरो होयानेना।”

¹⁵ दो अगुरादारकू ढिबुवाकू पवावनेना अरू मूक होड़कू कता उदुःवातेडकुःआ हनन इया होड़कू एचेरेकू कता उदुःतेरा। नाःआ लबरा कता एहूदाकू तिसिंगाः दिन वरीकू बिसवासगेतना।

ईसूराः टुटीग हुकुम

¹⁶ हनते ईसूरिकुःआ गारहो मूक चेलाकू गलील छतरराः मीटोंग पहाड़ अगी तोराकू। हनानाः पहाड़रेकू सेन लगा हँकू एचेरे ईसू मड़ंगरेय कतातेरा।

¹⁷ हँकू ईसूकू ञेलतेरा दो, हँकू हाँयकू सलामतेरा। मनदो अदोम चेलाकू मेरकू बिसवासगाड।

¹⁸ हनते ईसू हँकू एचेरे सेनेडखने कतातेरा, “सेरमो देस अरू ओतराः जमा हातपात भगवान ईंगे जिमावारा।

¹⁹ हनालगा अपे जमा जइत होड़कू एचेरे सेनेकियानखन ईंगरिकुःआ चेलाकूपे बड़ाँव अरू हँकू अपात अरू बेटात अरू सुद बिरुवाराः ञावते बतिसमापे एमेवाकू।

²⁰ ईंग अपेयिंग हुकुमवारा हना जमा कताकून मनाः लगा हँकूपे चेडकू। अयुमेपे, नाःआ जूग अरीन टुटीगगुः वरी, ईंग सगर सइट अपे सुदायिंग दोहोनता।”