मती ओजाःतेरा भगवानराः नपाय सरवन 27 - Korwa Bible

ईसू पिलातूस मड़ंगरेकू अगूतिरिया

¹ निनिंदावा निंदावा जमा मरंग पुजउरीकू अरू एहूदाकूरिकुःआ मूक होड़कू पंचायतकू दुड़ुःनेना अरू ईसू बदीरे बुइद तुलातेडखनकू रायनेना, हाँयग ईसू ञेड एंडागे लगा इदा, माःआन।

² हनते हँकू ईसूकू एचे तोलतिरिया अरू एहूदिया छतररीग मरंग हातपात होड़ पिलातूस एचेरेकू गोःतिरिया।

जूदाराः वका गुजुः

³ दो मड़ंगरे ईसूय एचे साबतिरिया हाँयग जूदा सुदीगोतेड ईसू ञेड एंडा लगाकू रायनेना। दो हाँय एचेतेरा हना कता बदीरेय पसताःआ अरू चाँदीराः तीसगोटोंग रिचकी ढिबुवा गोःकेडखन मरंग पुजउरीकू अरू एहूदा मूक होड़कू एचेरे सेनेडखने कतातेरा,

⁴ “ईंग बेगर कसूर होड़ एचे साबतिरिगखनिंग कसूरकेरा।” मनदो हँकू कतातेड, “हनारे अले लगा तोनोंगाः मतलोब कोवानेःआ। हना दो अनम ञेल।”

⁵ हनते जूदा हना रिचकी चाँदीकून भगवानराः ओड़ाःरेय तेके एंडा अटूड, अरू हाँय बहरी सेनेकियानखन अनँयग आँयगतेय वका गोएगयान।

⁶ हनते मरंग पुजउरीकू हना चाँदीराः रिचकी ढिबुवाकून हलंगतेडखनकू कताया, “नाःआ रिचकी ढिबुवाकून बलंगीराः बनी हवे। हनालगा अले नाःआ ढिबुवाकून भगवान ओड़ाःराः दसिना बकसारे ओरोले सोलोंग अवेतेरा।”

⁷ दो हँकू मिनी रायनेनखन हना ढिबुवाते दुरीन देसरिकुःआ होड़कू तीलकू लगा कुमहारराः दोहोड़कू किजातेरा।

⁸ हनालगा हना दोहोड़ तिसिंगाः दिन वरी बलंगीराः दोहोड़ माःआनकू कतायता।

⁹ नाःआ कता भगवानराः बड़रा कतायीग होड़ इरमिया कतातेरा हनन इया होयानेना, “हँकू हना तीसगोटोंग चाँदीराः रिचकी ढिबुवाकू गोःतेरा, परबू ईंग एचेरेय हुकुमतेरा हन इया, इसराएल होड़कू हाँय लगाकू लगावतेरा हना दामते

¹⁰ कुमहारराः दोहोड़कू किजातेरा।”

ईसू पिलातूस मड़ंगरे

¹¹ दो ईसू एहूदिया छतररीग मरंग हातपात होड़ पिलातूस मड़ंगरेय चड़ाँनेन दो हाँय ईसू एचेरेय होंबोरतेरा, “आम एहूदाकूरीग राजा हवे जा?” दो ईसू कता कुदातेरा, “हाव, हनन इयाम कताकेरा।”

¹² मरंग पुजउरीकू अरू एहूदा मूक होड़कू ईसू बदीतेडखनकू कतातेरा, हनमेला ईसू तोनोंग माःआन मेरेय सालगान।

¹³ दो पिलातूस ईसू एचेरेय होंबोरतेड, “नँकुःआ होड़कू आम बदीकेडखनकू कतायतना हना कताकून आम मेरेम अयूमतना जा?”

¹⁴ हनते हों ईसू तोनोंग माःआन मेरेय कता कुदागाड। दो मरंग हातपात होड़ पिलातूस मुरुके बयावयान।

ईसू एचे गोएगगे लगा पिलातूस एमेवाडकू

¹⁵ पसहा परोबराः बेलारे, होड़कू सुनावता हाँयग तोलतो होड़, मरंग हातपात होड़ एचे लड़ागेयता।

¹⁶ अरू हनानाः मेला बराबा ञावीग मुरुक बेलूर मी होड़ तोलतोय दोहोना।

¹⁷ दो होड़कू जुमावनेना दो पिलातूस हँकू एचेरेय होंबोरतेरा, “अपे लगा इये ईंग अड़ाःगोड, मसी माःआनपे कतावायता हाँयग ईसू जा बराबा?”

¹⁸ पिलातूस सुसुदीःआ, नँकुःआ होड़कू ईसू इरातेकू एचे साबतिरिया।

¹⁹ पिलातूस गदीरे फड़ियावगे लगाय दुड़ुःआ हनमेला आँयगरीग अइमी हाँय एचेरे मीटोंग सरवने वारतेरा, “हाँयग सुधिया होड़राः जीवरे तोनोंगाः अलोम एचे। हाँय बदीरे ईंग मीटोंग सपनायिंग ञेलकेरा अरू हनाते नुँहू वरी ईंगराः जीव ओंगोल कुंभलाःतना।”

²⁰ मनदो मरंग पुजउरीकू अरू एहूदाकूरिकुःआ मूक होड़कू लहराव-फुसलावतेडखन होड़कूकू कतावाःआ, अपे बराबा अड़ाःगे लगा अरू ईसू एचे गोजेय लगापे असे, माःआन।

²¹ पिलातूस होंबोरतेरा, “नँकिनाः बना होड़ अते इये ईंग एचे अड़ाःगे लागापे चहाःतना?” दो हँकू कतातेड, “बराबा।”

²² दो पिलातूस होंबोरतेडकुःआ, “मसी माःआनकू कतवायता हाँयग ईसू चिला ईंग एचेय?” दो जमा होड़कू कतातेड, “नाँय कुरूसरेम एचे ठोंकाव गोजेय।”

²³ पिलातूस होंबोरतेरा, “चिला लगा? नाँय चिला गारबारे एचेकेरा?” मनदो हँकू अरू हुमइसके खिररी घड़ीनकू कताया, “नाँय कुरूसरेम एचे ठोंकाव गोजेय।”

²⁴ पिलातूस सुदीगोतेड, ईंग नाःआरे तोनोंगाः ओरोयिंग एचे अवेतेरा, अरू होड़कू तलारे हलो-गदउड़ी होयाःतना, माःआन। दो हाँय जमा होड़कू मड़ंगरे अनँयग तिःई अचंगनेनखने कताया, “नाँयग होड़ गुजुः दो, ईंगराः तोनोंग जिमा कोवानेःआ। जमा अँननपेराः हवे।”

²⁵ जमा होड़कू कतातेड, “हाव, नाँयग होड़राः गुजुःराः जिमेवारी अलेराः अरू अलेरिकुःआ लइंकूराः होया जुवाः।”

²⁶ हनते पिलातूस हँकू लगा बराबाय अड़ाःगोतेडीग। मनदो हाँय ईसूय एचे ञेडतेरा अरू कुरूसरे ठोंकाव गोजेय लगाय जिमागोतेडीग।

सइना होड़कू ईसूकू लंदावाःआ

²⁷ दो मरंग हातपात होड़रिकुःआ सइना होड़कू, ईसू सइना होड़कूराः अपीसरेकू गोयाडीग अरू जमा सइना होड़कू ईसूराः चइरो गतरकू एचे जुमावगोतेड।

²⁸ हँकू हाँयराः बहरी तुसिंगतो सोनहेकू तोलेगगोतेड अरू लाल रंगाः झोलोंग सोनहेकू तुसिंगगोतेडीग,

²⁹ अरू हनते जनुम उयिंगतेडखन हाँयराः बोःरेकू पगरीगोतेड। हनते हाँय मीटोंग हापकू एचे साबगोतेडीग अरू हाँय मड़ंगरे टोबोः भरसारे उकुड़ोम घड़ीन हाँय लंदावाडिगखनकू कताया, “ने एहूदाकूरीग राजा, सलाम सलाम।”

³⁰ हँकू हाँय सेरमोकू बेगा अरू हापते हाँयराः बोःरे घड़ी घड़ीकू ञेंडेया।

³¹ हँकू हाँयकू लंदावाया हना तयोमरे हाँयकू तुसिंगतेरा हना झोलोंग सोनहेकू तोलेगगोतेड अरू हाँयराः सोनहे हँकू तुसिंगगोतेडीग। हनते हँकू ईसू कुरूसरे ठोंकाव गोजेय लगाकू गोःयाडीग।

कुरूसरे ईसूकू ठोंकाव गोएगतेरा

³² दो सइना होड़कू हना सहर बहरी ईसूकू गोः मेला, हँकू कुरेन सहररीग सिमोन ञावीग मी होड़ होड़ सुदाकू जुमावनेना अरू हाँय ईसूराः कुरूस रेम लगाकू रेनहातिडिया।

³³ हँकू गुलगुता ञावराः ततेररेकू सोदोरनेना (गुलगुताराः मतलोब बोः खुरपीराः ततेर हवे)।

³⁴ हंडा हँकू ईसू ञूय लगा हटी सकम मेसातो अंगूर रसकू एमेतेरा। मनदो हाँय हना रस सेबेलतेडखन मेरेय ञूगाड।

³⁵ हँकू ईसू कुरूसरेकू ठोंकावतिडीगखन हाँयराः सोनहे अँननकू अँकू हटिंगगुः लगाकू चीट-पोटतेरा।

³⁶ हनते हँकू हंडा दुडुःकियानखन ईसूकू अगुरातेरा।

³⁷ हाँयराः बोः सेरमो हँकू मीटोंग जाः चिठी ओजाःतेडखनकू टंगावतेरा, नाँय एहूदाकूरीग राजा ईसू हवे, माःआन।

³⁸ बार होड़ इनिग होड़कू ईसू सुदा कुरूसरेकू ठोंकावतेडकिना, मी होड़ ईसूराः खउना गतर अरू मी होड़ डिरही गतर।

³⁹ हना दूरतेकू सेना हँकुःआ होड़कू बोः डोलावकेडखन बेग-हता घड़ीनकू कताया,

⁴⁰ “आम भगवानराः ओड़ाः एचे रूबकेडखन अरू पेय दिनरेम तुलागोडता जा? दो अनम बनसाः। आम भगवानरीग बेटा हवे दो कुरूस अतेम उतराव वेग।”

⁴¹ हनन इया मरंग पुजउरीकू, नियम चेडदार होड़कू अरू एहूदाकूरिकुःआ मूक होड़कू हों लंदावाय घड़ीनकू कताया,

⁴² “नाँय एटाःकूय बनसावा, मनदो अनँयग मेरेय बनसाव अवेतना। नाँय इसराएल होड़कूरीग राजा हवे दो, नाँय कुरूस अतेय उतराव वेग अरू अले नाँय एचेरेले बिसवासगेता।

⁴³ नाँय भगवान एचेरेय भरसाःतना। हाँय कतातेरा, ईंग भगवानरीग बेटा हवे, माःआन। दो भगवान चहाःतना दो नुँहू नाँये बनसाव।”

⁴⁴ ईसू सुदा कुरूसरे ठोंकावतोकिन दोहोना हँकिनाः इनिग होड़किन होंकिन बेग-हतावातेरा।

ईसूराः गुजुः

⁴⁵ तिकिन बेला वरीते ढड़काः बेला वरी जमा देस अंदरायान।

⁴⁶ ढड़काः बेला ईसू मुरुक सटीते खिररीनेनखने कताया, “इलोई, इलोई, लमा सबकतनी।” नाःआ कताराः मतलोब नाःआ हवे, “ने भगवान, ने भगवान, आम चिला लगाम अड़ाःगोतेडिंगा?”

⁴⁷ हंडा चड़ाँतकू दोहोना हँकुःआ अदोम होड़कू नाःआ बड़राकू अयूमतेरा दो हँकू कतातेड, “नाँय इलियाहे राःतना।”

⁴⁸ हनते ओहेन मी होड़ बतकाव सेनेडखन अंबटयान हना अंगूर रसरे रुवाय जोबरावतेडा अरू मीटोंग सरपीरे गुतू रहावतेडखन ईसूय एचे सुहावतेरा।

⁴⁹ एटाः होड़कू कतातेड, “रहा, ञेलेयताबू इलियाह नाँय उतरावगेय लगाय वेगता जा ओरो।”

⁵⁰ दो ईसू मुरुक सटीते खिररीनेनखन अनँयगराः हनसा भगवान एचेरेय जिमागोतेड।

⁵¹ अरू हननमेला भगवानराः ओड़ाःराः मरंग परदा सेरमो अते लतार वरी बार फड़ायान। ओत डोलाःआ अरू चटइनकून हों बार फड़ायान।

⁵² मड़गटकून उसाडयान अरू मड़ंगरेकू गोएगनेना हँकुःआ मुरुक बगरा सुद होड़कू अरूकू जियाव रेमनेना।

⁵³ हँकू मड़गटतेकू उडुंगनेना अरू ईसू गोएगतो होड़कू अतेय जियाव रेमनेना हना तयोमरे सुद सहर, एरुसलेमरे मुरुक बगरा होड़कू एचेरेकू एचे ञेलयान।

⁵⁴ मी सव सइना होड़कूरीग हातपात होड़ अरू ईसूकू अगुरातेरा हँकुःआ होड़कू ओत डोलोवतो अरू नाःआ जमाकून ञेलतेडखन मुनुरुककू बोरोयान अरूकू कतातेड, “सतायरे नाँय भगवानरीग बेटात दोहोना।”

⁵⁵ हंडा मुरुक अइमीकू होंकू दोहोना अरू हँकू गुनहोन तोरेते नाःआ जमाकूनकू ञेला। हँकू गलील छतर अते ईसू देह दूर वेजेडखन ईसूकू संघरावाःआ।

⁵⁶ हँकुःआ अइमीकू अते मगदलियायिन मरियम, एकूब अरू ओसेसरीग एंगात मरियम अरू जबदीरिकिनाः बेटाकिनरीग एंगात होंकू दोहोना।

ईसूराः मुरदा, लात पेंदाकू अदेरतेरा

⁵⁷ सिंगाड़यान दो अरमतिया सहररीग मी होड़ गिरहत होड़ अरू ईसूरीग चेला होंय दोहोना हाँयग उसूप वेजेडा।

⁵⁸ हाँय पिलातूस एचेरे सेनेडखन ईसूराः मुरदा लगाय असेतेरा। अरू हना मुरदा गोःगे लगा पिलातूस हुकुमतेरा।

⁵⁹ हनते उसूप ईसूराः मुरदाय गोःतेरा अरू मीटोंग नपाय कफन सोनहेतेय ओयोतेरा।

⁶⁰ अरू चटइनरे कोटेग कोटेगकू तुलातेरा अनँयगराः नँवा लात मड़गटरेय मंडावतेरा। हनते हना लात दुवाररे मीटोंग मरंग दिरिय कोलोंग रेडतेरा। हनते हाँय अनँयग ओड़ाः तोराय।

⁶¹ हनमेला मगदलियायिन मरियम अरू एटाःयीग मरियम हों मड़गट ततेररेकिन दोहोना।

ईसूराः मड़गटराः अगुरा

⁶² सपड़ाःराः दिन अते एटाः दिन, लोड़ोनराः दिनरे मरंग पुजउरीकू अरू फरीसी होड़कू पिलातूस एचेरेकू सेनेडा,

⁶³ अरूकू कताया, “हाँयग अडिग होड़ जीयत दोहोन मेला नाःआ इयाय कतातेरा माःआनले उहियारगेतना, पेय दिन तयोमरेयिंग जियाव रिमुःता, माःआन।

⁶⁴ हनालगा हाँयराः मड़गट पेय दिन वरी अगुरागे लगाम हुकुमवाकू। नाःआ इया मेरेम एचेय दो, हाँयरिकुःआ चेलाकू सेनेकियानखन हाँयराः मुरदा इनिगकेडखन होड़कूकू कतावाता, ईसू गोएगतो होड़कू अतेय जियाव रेमकिया, माःआन। नाःआ अडिग बड़रा मड़ंगाः अडिग कता अते अरू बेलूर दोहोनता।”

⁶⁵ दो पिलातूस कतातेड, “अपे अगुरागे लगा अगुरादारकूपे गोः अवेता। सलाव जुवाःपे अरू मुरुक नपायतेपे अगुरागे।”

⁶⁶ दो हँकू सेनेडखन नपायते हना दिरि लातराः मड़गटकू रेडतेरा अरू हना मड़गट लातराः दिरि चोटरे मीटोंग मोहरकू लगावतेरा अरू अगुरागे लगा अगुरादारकू लगावतेरा।