मती ओजाःतेरा भगवानराः नपाय सरवन 23 - Korwa Bible

पचघुचिया चेडदारकू अते सवासिती

¹ हनते ईसू, जुमावतो होड़कू अरू अनँयगरिकुःआ चेलाकू एचेरेय कतातेड,

² “नियम चेडदार होड़कू अरू फरीसी होड़कू मोसेसराः गदीरेकू दुड़ुःकिया।

³ हनालगा अपे एचेरे कहिसाः एचे लगाकू कताय हनापे एचे अरू हँकूराः कतापे मनाः। मनदो हँकू परसारगेता हना इया हँकू मेरकू एचेयता। हनालगा अपे हँकू एचेयता हना अपे अलोपे एचेय।

⁴ हँकू हंबाल बोझा होड़कूराः पसारेकू मंडवेता। मनदो हँकू गुनमिन हों अंगरीते ससंघरा लगा मेरकू चहाःता।

⁵ अरू हँकू अँनकूराः जमा बुता, होड़कू ञेलले, माःआनते होड़कूकू बुता उदुःवाता। हँकू अँनकूराः अरजी बकसाकून सकड़कू तुलायता अरू हँकूराः अरजी पंछाराः असरा लंबी लंबीकू तुलायता।”

⁶ “हँकू जोम लगाकू राःकूता हँकुःआ होड़कूराः ओड़ाःरे मइद मइद ततेररे दुड़ुः लगा अरू अरजी ओड़ाःरे हों मरंग मरंग होड़कू दुड़ुःता हना ततेररे दुड़ुः लगाकू चहाःता।

⁷ अरू बजारकूनरे होड़कू अँकूकू सलामकू लगा अरू होड़कू, ने रबबी, माःआनकू एचे कतान लगाकू चहाःता।

⁸ मनदो अपेरीग मिनीटोंग गुरुजी इदा अरू अपे जमाकू वगीयाकू हवे। हनालगा अपे अँननपे रबबी माःआन अलोपे एचे कतान।

⁹ अपेरीग मिनीटोंग अपांग सेरमो देसरे इदानिया। हनालगा अपे नाःआ चउंदीसरे तोनोंगीग होड़ अपांग माःआन अलोपे कतावाय।

¹⁰ मसी अपेरीग मिनीटोंग मालिक इदानिया। हनालगा अपे अँननपे मालिक माःआन अलोपे एचे कतान।

¹¹ अपे अते तोनोंगीग मरंग इदानिया दो, हाँय जमाकूरीग सेवकियाय बड़ाँः।

¹² अनँयग आँयग मरंगे ओंगलुःता हाँयग होड़, भगवान हुडिंगे बड़ाँवगेयता। अरू अनँयग आँयग हुडिंगे बड़ाँःता हाँयग होड़, भगवान मरंगे बड़ाँवगेयता।

¹³ ने पचघुचिया नियम चेडदार होड़कू अरू फरीसी होड़कू, अपे दोपे ठीकयान। अपे एटाः होड़कू भगवानराः राइजरे बोल अतेपे रोंकावकूता। अपे अँननपे सेरमो देसरे मेरपे बोलता अरू एटाः होड़कू हों सेरमो देसरे मेरपे बोलो ओवाकूता।

¹⁴ [ने पचघुचिया नियम चेडदार होड़कू अरू फरीसी होड़कू, अपेराः जीव नपाय ओरो दोहोनेना। अपे रंडियाहीन अइमीकूराः ओड़ाःराः जमा जइतकूनपे अडिग जोमता। होड़कू उदुःवाकू लगा अपे मुरुकपे अरजीता। हनालगा भगवान अपे मुरुके डंडियावपेता।]

¹⁵ ने पचघुचिया नियम चेडदार होड़कू अरू फरीसी होड़कू, अपेराः जीव नपाय ओरो दोहोनेना। अपे मी होड़ अपेराः रायरे अगूय लगा ओतरे अरू दाः जहाजकूनरेपे दँड़ाता। अरू तोनोंगीग होड़ अपेराः रायरेय वेग जुवाःतान दो, हाँय अपे पवाःता, हनाते हों बार गुना नरगराः डंड पवाः जुकूरपे बड़ाँवकूता।

¹⁶ ने अंधा मूक होड़कू, अपेराः जीव नपाय ओरो दोहोनेना। अपे कतायता, तोनोंगीग होड़ भगवानराः ओड़ाःराः किरिया कसटे जोम दो कही ओरो होयानेना। मनदो तोनोंगीग हना ओड़ाःराः सोनाराः किरिया कसटे जोम दो हाँय हना कसट पुपुराव लगा इदा, माःआन।

¹⁷ ने बुयांग अंधाकू, अपे ईंगपे उदुःवा, मरंग चिला इदा? सोना मरंग इदा जा सोना सुद बड़ाँःता हान भगवानराः ओड़ाः मरंग इदा?

¹⁸ अपे नाःआ होँपे कतायता, तोनोंगीग धामराः किरियाय जोम दो कही ओरो होयानेना। मनदो हना धामरे देगतो इदा हना बलिदानराः किरिया तोनोंगीग जोम दो, हाँय हना कसट पुपुराव लगा इदा, माःआन।

¹⁹ ने बुयांग अंधाकू, अपे ईंगपे उदुःवा, बलिदान मरंग इदा जा बलिदान सुद बड़ाँःता हना धाम मरंग इदा?

²⁰ तोनोंगीग धामराः किरियाय जोम दो हाँय धाम अरू धामरे जे हों सकालाः देगतो दोहोनता हना जमाकूनराः किरियाय जोमता।

²¹ अरू तोनोंगीग भगवानराः ओड़ाःराः किरियाय जोमता हाँय हना ओड़ाः अरू हना ओड़ाःरेय दोहोनता हाँयग भगवानराः किरिया होंय जोमता।

²² ननन इया सेरमो देसराः किरियाय जोमता हाँय भगवानराः गदीराः अरू हना गदीरेय दुडुःता हाँयराः किरिया होंय जोमता।

²³ ने पचघुचिया नियम चेडदार होड़कू अरू फरीसी होड़कू, अपे दोपे ठीकयना। अपे फुदेना अड़ाः, सोंप अरू जीराकूनराः दस बंटारे मी बंटा भगवान लगापे एमेयता। मनदो अपे मोसेसराः नियमराः मइद कताकूनपे अड़ाःगोडता। अपे नाःआ जमाकून भगवान लगापे एमेय घड़ीन बिसवास अरू सोगा घड़ीन नपाय जीवपे जियाः दो नपाय दोहोकुःआ।

²⁴ ने अंधा मूक होड़कू, अपे धाँस रोःओपे गरागोडता, मनदो ऊँटपे ऊडगोडेयता।

²⁵ ने पचघुचिया नियम चेडदार होड़कू अरू फरीसी होड़कू, अपे दोपे ठीकयना। अपे डुभा अरू छिपी सेरमो सेरमो एकलापे मंजवेता मनदो अपेराः इंदरीरे मुरुक ललची अरू बेलूर ओंगोल इदा।

²⁶ ने अंधा फरीसी होड़कू, मड़ंगरे अपेराः इंदरीपे सफागोड दो बहरी हों सफा दोहोनता।

²⁷ ने पचघुचिया नियम चेडदार होड़कू अरू फरीसी होड़कू, अपे दोपे ठीकयना। अपे बहरी बहरी नपायते गुरीत, सुघर मड़गट इया इदानपेःआ, मनदो हना मड़गट पेंदारे गोएगतो होड़कूराः जांग अरू जमा बरानाः मइलावतो इदा।

²⁸ हनन इया अपे हों एटाः होड़कू एचेरे नपाय धरमिया होड़कू इयापे ञिलुःता, मनदो अपेराः इनिंदरी इंदरीरे जमा बरानाः गारबार अरू पचघुचियाते पेरेगतो इदा।

²⁹ ने पचघुचिया नियम चेडदार होड़कू अरू फरीसी होड़कू, अपे दोपे ठीकयना। अपे भगवानराः बड़रा कता होड़कू लगा मड़गटकूनपे तुलाता अरू धरमिया होड़कूराः मड़गटकूनपे सिंगरावता।

³⁰ अरू अपे कतायता, अले अबूरिकुःआ खुटिपरिया होड़कूराः जूगरेले दोहोकुः दो, भगवानराः बड़रा कता होड़कू ञेड एंडाकू लगा अबूरिकुःआ खुटिपरिया होड़कू सुदा ओरोबू मेसाकुःआ।

³¹ दो अपे अँननपे बदीरे हिदइतपे उदुःतना, भगवानराः बड़रा कता होड़कूकू ञेड एंडातेरा हँकुःआ होड़कूरिकुःआ नइड़-बाँस होड़कू अले इदानलेःआ, माःआन।

³² दो अपेरिकुःआ खुटिपरिया होड़कू बुँहड़ीकेरा हनानाः बेलूर बुता अँननपे अपे पुरावगोड।

³³ ने महुरा बींग इया होड़कू, भगवान अपे डंडियावकेडखन नरगरे सोलोंगपे अते करा उड़ीपे बनसावगुःता?

³⁴ हनालगा ईंग अपे एचेरे भगवानराः बड़रा कता होड़कू अरू कनहूनदारकू अरू चेडदार होड़कूयिंग वारकूतना। अपे अदोम होड़कूपे ञेड एंडागोडता अरू अदोम होड़कू कुरूसरेपे ठोंकावगोडकूता। अपे अदोम होड़कू अपेराः अरजी ओड़ाःकूनरे गुरुंदतेपे ञेडकूता अरू मी सहर अते एटाः सहर अगी हँकूपे झुटियावता।

³⁵ दो मनाड़ंगरे ञेड एंडात नपाय होड़ हाबील अते भगवानराः ओड़ाः अरू धामराः तला राचरेपे ञेड एंडातिरिया हाँयग बिरिकियाहरीग बेटात जकरिया वरी जमा नपाय होड़कूराः बलंगीराः आभा अपेके एएमे पराःता।

³⁶ अपे ईंगपे अयूम! नाःआ जमाकूराः आभा नाःआ जूगरिकुःआ होड़कूके एएमे पराःता।

³⁷ ने एरुसलेम मरंग सहररिकुःआ होड़कू, अपे भगवानराः बड़रा कता होड़कूपे ञेड एंडाता अरू भगवान अपे एचेरेय वारतेडकुःआ हँकुःआ होड़कू दिरितेपे ञेडतेडकुःआ। ईंग मुरुक तुरहा सिम अनँयग होनकूय बुरुमता हना इया बनसावपे लगायिंग ओंगलेःआ। मनदो अपे ईंग हना इया एचे लगा मेरपे एमेवागाडिंग।

³⁸ हनालगा अपेराः ओड़ाःकून नरी नठी एंडा जुवाःता।

³⁹ अपे ईंगपे अयूम! परबूराः ञावतेय वेगता हाँयग होड़राः जीव भगवान भलावाता, माःआन अपे अरीनपे कताय वरी अपे ईंग अरू ओरोपे ञेल अवेतिरिंगा।”