मती ओजाःतेरा भगवानराः नपाय सरवन 20 - Korwa Bible

मंजुरियाकूराः अउल-तउल कहड़ी

¹ “निनिंदावा निंदावा अनँयग अंगूर बगइचारे बुता लगा मंजुरियाकू सपा लगाय सेनेडा हाँयग अंगूर बगइचारीग मालिक इया इदा भगवानराः राइज।

² हाँय हँकुःआ मंजुरियाकू लगा मी दिनराः बुता बनी एमे लगा हँकू सुदाय रायनेना। हनते हाँय हँकुःआ होड़कू अनँयग बगइचारे बुता लगाय वारगोतेडकू।

³ हाँयग मालिक मी डांग बेर देगनेना हना बेला बजाररेय सेनेडा। हंडा तोनोंग तोनोंग होड़कू इसने चड़ाँतोकू दोहोना।

⁴ हँकू ञेलतेडखन हाँयग मालिक कतातेड, अपे हों ईंगराः अंगूर बगइचारे बुता लगापे सलाव जुवाः अरू अपेराः बुता बनी बड़ाँःतना हनामिनिंग एमेवापेता।

⁵ दो हँकू हों तोराकू। हनते हाँय तिकिन बेलारे अरू ढड़काः बेलारे हों सेनेडखन हनन इयाय एचेतेरा।

⁶ हेचेर-हेचेर बेर दोहोनेन मेला हाँय बजार अगी अरूय सेनेडा अरू हनमेला हों तोनोंग तोनोंग होड़कू इसने चड़ाँत ञेलतेडकूखने होंबोरतेडकुःआ, अपे ननंडा दिन भइर चिला लगा इसने चड़ाँत इदानपेःआ?

⁷ दो हँकू कता कुदातेरा, अले तोनोंगीग बुता लगा मेरकू उदुःवागाडले। हनालगा अले इसने ननंडा इदानलेःआ। दो हाँय हँकू एचेरेय कतातेड, अपे हों सेनेकियानखन ईंगराः अंगूर बगइचारेपे बुता।

⁸ सिंगाड़यान दो हाँयग मालिक अनँयगरीग सेवकियाय राःतेरा अरूय कतातेरा, जमा मंजुरियाकू लगा अँनकूराः बुता बनीम एमेवाकू। तयोमरेकू वेगनेना हँकुःआ होड़कू लगा मड़ंगमे एमेय अरू हना तयोमरे मड़ंगरेकू वेगनेना हँकुःआ होड़कूम एमेवा।

⁹ हँकू वेगनेना दो मी घंटाकू बुतानेना हँकुःआ होड़कू मेमेड होड़ मेमेड होड़ लगा मी दिनराः बनीय एमेवातेडकुःआ।

¹⁰ दो मड़ंगरे बुता लगाकू हेलावनेना हँकुःआ होड़कू ओंगोलतेरा, अबू बगराबू पवाःता, माःआन।

¹¹ हँकू बनीकू पवावनेन दो ढिबुवा ञेलतेडखन मालिक एचेरे कुरबुराः घड़ीनकू कतातेरा,

¹² नँकुःआ होड़कू अले अते तयोमते बुता लगाकू हेलावनेना अरू मिनी घंटा लगाकू बुताकिया। मनदो आम दिन भइर सितोंग सितोंगले बुताकेरा अले बरोबइर नँकुःआ होड़कू होंम बड़ाँवगोतेडकुःआ जा?

¹³ मनदो हाँयग मालिक हँकुःआ होड़कू अते मी होड़ एचेरेय कतातेरा, ने सउंगता, ईंग आम सुदा तोनोंगाः गारबार मेरिंग एचेगरा। आम ईंग सुदाम रायनेना हनानाः बुता बनी ईंग मेरिंग एमेवागडमेःआ जा?

¹⁴ अपे अँननपेराः बुता बनीपे गोःया। अपेयिंग एमेवारा हिनिनमिन तयोमतेकू वेगकिया हँकू हों एमेवा लगा ईंगराः ओंगोल इदा।

¹⁵ ईंग इनिंगराः आन-धानते ईंग चहाःतना हन इया ओरोयिंग एचे अवेतेरा जा? ईंग मयादार इदानिंगा अते गेरा मेडतेपे ञेलिंगता जा?

¹⁶ ननन इया तयोमरे इदानकुःआ हँकुःआ होड़कू मड़ंग जुवाःता अरू मड़ंगरे इदानकुःआ हँकुःआ होड़कू तयोम जुवाःता।”

ईसू अनँयग गुजुः बदीरे अरूय कतातेरा

¹⁷ ईसू एरुसलेम सेन मेला आँयगरिकुःआ बारहगोटोंग चेलाकू, होड़कू अते एटाःतेडकूखने कतावाडकू,

¹⁸ “अबू एरुसलेम सहर अगीबू सलाःतना। अरू हंडा मरंग पुजउरीकू अरू नियम चेडदार होड़कूराः तिःईरे मनुवारीग बेटातकू एचे सबेयता। अरू ञेड एंडागे लगाकू फड़ियावगेयता,

¹⁹ अरू बेगर एहूदाकूराः तिःईरेकू जिमागेयता अरू लंदा एरंगवा घड़ीनकू ञेडेयता अरू कुरूसरेकू ठोंकाव गोजेयता। मनदो पेय दिनरेय जियाव रिमुःता।”

मी होड़ एंगातराः अरजी

²⁰ हनते जबदीरिकिनाः बेटाकिनरीग एंगात बेटाकिनतेन सुदा ईसू एचेरेय सेनेडा अरू ईसू मड़ंगरे उकुड़ोमकियानखन हाँय एचेरे तोनोंगाःय असेतेरा।

²¹ दो ईसू हाँय एचेरेय होंबोरतेरा, “आम चिलाम चहाःतना?” दो हाँयग अइमी कतातेड, “नँकिनाः बेटाकिनतिंग आमराः राइजरे मी होड़ आमराः खउना तिःई गतर अरू मी होड़ आमराः दिरही तिःई गतर दुड़ुः लगाम ओवाकिन।”

²² दो ईसू हँकिनाः चेलाकिनतेने कतावातेड, “अबा मेरबा सुसुदीतना अबा चिलाबा असेतना। ईंगके ञूय लगा इदा हना कटसियाराः डुबहातेबा ञू अवेयता जा?” दो हँकिन कतातेड, “अलिंग ञू अवेयता।”

²³ दो ईसू कतातेड, “अबा ईंगराः कटसियाराः डुबहातेबा ञूयता, मनदो ईंगराः खउना अरू डिरही तिःई गतर तोनोंगीग एचे दुड़ुःगेयराः हातपात ईंगके कोवानेःआ। ईंगराः बनर परोम दुड़ुः लगा ईंगरीग अपांग भगवान सपड़ाव दोहोकेडकिना, हँकिनाः होड़किन लगा इदा।”

²⁴ नाःआ बड़रा अयूमतेडखन ईसूरिकुःआ एटाः दसगोटोंग मूक चेलाकूतेन एहुना अरू एकूब सुदाकू रीसा।

²⁵ मनदो ईसू चेलाकूतेन जमाकू आँयग एचेरे राःतेडकूखने कतावाडकू, “अपे सुसुदीतना, बेगर एहूदाकूरिकुःआ राजाकू हँकू एचेरेकू राइजगेता अरू मरंग होड़कू अँननकूरिकुःआ होड़कू एचेरेकू हातपातगेता।

²⁶ मनदो अपे सुदा नाःआ इया अलो होयाः। अपे अते तोनोंगीग मरंग बड़ाँः लगाय चहाःतना दो, हाँय अपेरीग सेवादारे बड़ाँः,

²⁷ अरू जमाकू अते मरंग बड़ाँः लगाय चाहाःतान दो, हाँयग होड़ अपेरीग बेगारी होड़े बड़ाँः।

²⁸ मनुवारीग बेटा अनँयग एचे सेवान लगा मेरेय वेगगना। मनदो हाँय जमा होड़कूय सेवा लगा अरू अनँयग जीव एमे अटूकेडखन होड़कू सडावकू लगाय वेगकिया। हनन इया अपे हों एटाःकूपे सेवाकू।”

अंधा होड़किनराः मेड ईसू नपायतेरा

²⁹ मी दिन ईसू अरू चेलाकूतेन एरीहो सहर अते उडुंगनेनखनकू सलाःआ हनमेला, मुरुक बगरा होड़कू हँकू देह दूरकू ओतोंग सेना।

³⁰ अरू बार होड़ अंधा होड़किन दूर कुटीरेकिन दुड़ुःकुःआ। ईसू नाःआ दूरतेय सलाःतना माःआनकिन अयूमतेरा दो हँकिन मुरुक सटी खिररी घड़ीनकिन कताया, “ने परबू, ने दाऊद राजारीग नइड़-बाँस होड़, अलिंगमे सोगावा।”

³¹ दो होड़कू कलेकालकिन दोहोन लगाकू डंटावकिना। मनदो हँकिन अनउर हुमइसके खिररी घड़ीनकिन कताया, “ने परबू, ने दाऊद राजारीग नइड़-बाँस होड़, अलिंगमे मयावा।”

³² दो ईसू चड़ाँनेन अरू हाँय हँकिन राःतेडखने होंबोरतेड, “ईंग अबा लगा चिलायिंग एचे?”

³³ दो अंधा होड़किन ईसू एचेरेकिन कतातेड, “ने परबू, अलिंग ञेल लगालिंग चहाःतना।”

³⁴ ईसू हँकिने सोगावातेडकिना अरू हँकिनराः मेडे टोँवावतेरा अरू हनानाः मेला बना होड़राः मेड नपाययान अरू हँकिन ईसूराः देह दूर तोराकिन।