मती ओजाःतेरा भगवानराः नपाय सरवन 18 - Korwa Bible

जमाकू अते मरंग इये हवे?

¹ हनमेला चेलाकूतेन ईसू एचेरे सेनेडखनकू होंबरेःआ, “ने गुरुजी, भगवानराः राइजरे इये मरंग इदानिया?”

² दो ईसू मी होड़ लँइग राःतिरिगखन चेलाकूतेन मड़ंगरेय एचे चड़ाँतिरिया,

³ अरूय कतातेरा, “अपे ईंगपे अयूम! अपे अँननपेराः जीव कुदाकेडखन लँइग इया मेरपे बड़ाँः वरी, अपे भगवानराः राइजरे ओरोपे बोल अवेनेना।

⁴ नाँयग लँइग इया अनँयग हुडिंगे ओंगोलगुःता हाँयग होड़ भगवानराः राइजरे भगवान मरंगे बड़ाँवगेयता।

⁵ अरू तोनोंगीग होड़ ईंगराः ञावते नाँयग लँइग इया तोनोंगीगे नेत-नेवार दो हाँय ईंगे नेत-नेवारता।”

कसूर बदीरे ईसूराः सेताव

⁶ ईसू अरूय कताया, “मनदो तोनोंगीग ईंग एचेरेकू बिसवासगेता हँकुःआ होड़कू अते हुडिंगीग होड़े एचे कसूरता दो हाँयग होड़राः होटोःरे जंता इया दिरि तोलकेडखन समुंदररे तेनेके बोलो एंडाय, हाँय लगा ननपाय इदा।

⁷ होड़कूकू एचे कसूरकूता हना कताकूनते चउंदीसरिकुःआ होड़कूराः जीव ठीक जुवाःता। ननानाः कताकून होनोयाः लगा इदा। मनदो एटाः होड़े एचे कसूरता हाँयग होड़राः जीव ठीक जुवाःता।

⁸ आमराः तिःई सहे काट आम एचे कसूरमेतान दो हना बोंगोरकेडखन तेके एंडागोडमे। आमराः बनर तिःई सहे काट इदान हों नरगराः सेंगेलरे एचे सोलोंगुः अते लंगड़ा सहे लुलहाकियानखन सेरमो देसरे बोल, आम लगा ननपाय इदा।

⁹ अरू आमराः मेड एचे कसूरमेतान दो हना गुड़तीग उडुंगकेडखन तेके एंडागोडमे। आमराः बनर मेड इदान हों नरगराः सेंगेलरे एचे सोलोंगुः अते कनाँकियानखन सेरमो देसरे बोल आम लगा ननपाय इदा।”

केड़ेत भेड़ाराः कहड़ी

¹⁰ “अपे ईंगपे अयूम, ईंग एचेरेकू बिसवासगेता हँकुःआ होड़कू अते तोनोंगीग हुडिंगीग होड़ अहापे आड-बेकारवाय। सेरमो देसरे नँकूरिकुःआ अगुरादार बराहीलकू, हंडा इदानिया ईंगरीग अपांग भगवान सुदा सगर बेला इदानकुःआ।

¹¹ [मनुवारीग बेटात केड़ेत होड़कू ञामकेडखन सडावकू लगाय वेगकिया।]

¹² अपे चेले माःआनपे ओंगलेतना? तोनोंगीग होड़रिकुःआ मी सव भेड़ाकू इदानकुःआ अरू हनामिन अते मीटोंगमिन केड़े जुवाः दो, निनयानबेगोटोंग भेड़ाकू पहाड़रे अड़ाःकेडखन हाँयग केड़ेत भेड़ा ञाम लगा ओरोय सेनेडा जा?

¹³ अरू हाँयग होड़ हाँयग केड़ेत भेड़ाय ञामगोडेय दो, मेरकू केड़ेगान हँकुःआ निनयानबेगोटोंग भेड़ाकू अते केड़ेनेनाय हाँयग भेड़ा लगा मुरुक बगराय बहालगुःता।

¹⁴ ननन इया सेरमो देसरे इदानिया अपेरीग अपांग भगवान मेरेय चहाःता नाःआमिन अते हुडिंगीग हों केड़े एंडा जुवाः, माःआन।”

कसूरगे दो चिला एचे इदा

¹⁵ “तोनोंगीग बिसवासी होड़ आम बदीरेय कसूरगे दो हाँय एचेरे एकला सेनेकियानखनमे समझावगोडेय। अरू हाँय आमराः कताय मनाव जुवाः दो हाँयग बिसवासी होड़ कसूरतेम बनसावगोडेयता।

¹⁶ मनदो हाँय मेरेय अयुमे दो आम सुदा मी होड़ सहे बार होड़मे गोःया, जेमहा बार होड़ सहे पेय होड़राः हिदइतते तोनोंगाः कता-जमकाव जुवाः।

¹⁷ हाँय हँकिनराः कता हों मेरेय मनाः दो, कलसियारिकुःआ बिसवासी होड़कूम कतावा। अरू हँकुःआ होड़कूराः कता हों मेरेय मनाः दो, भगवानराः कता मेरकू मनाःता हँकुःआ बेगर एहूदाकू अरू मलगुजारी गोः होड़कू इया हाँय ओंगोलकिडिग हाँय सुदा अलोपे मेसान।

¹⁸ दो अपे ईंगपे अयूम, जे हों सकालाः अपे नाःआ चउंदीसरेपे तोल, हान सेरमो देसरे हों तोलतो दोहोनता। अरू जे हों सकालाः अपे चउंदीसरेपे गीगगे, हान सेरमो देसरे हों गीगतो दोहोनता।”

¹⁹ “अपे अरू ईंगपे अयूम, अपे अते बार होड़ चउंदीसरे तोनोंगाः जिनिस लगा मिनी जीवकियानखनकिन असेय दो, हना सेरमो देसरे इदानिया ईंगरीग अपांग भगवान हँकिन लगाय एनेमेगोडता।

²⁰ बार होड़ सहे पेय होड़ ईंगराः ञावरेकू जुमाःतान दो, हना ततेररे ईंग हँकू तलारेयिंग दोहोनता।”

बेगर सोगायीग सेवकिया होड़राः कहड़ी

²¹ हनते पतरस ईसू एचेरे सेनेकियानखने कतातेड, “ने परबू, तोनोंगीग बिसवासी होड़ ईंग बदीरेय कसूरगोड ञवन दो हाँयराः कसूर तुमिन तुरहायिंग बराव एंडाय? सात तुरहा वरी जा?”

²² दो ईसू कतातेड, “ईंगमे अयूम। ईंग आम मेरिंग कतावामतना हाँयग होड़राः कसूर सात तुरहाम बराव एंडाय माःआन, मनदो सात तुरहाःआ सतर गुना वरीम बराव एंडाय।

²³ नननलगा भगवानराः राइज अनँयग सेवकियाकू अते आभा गोः लगाय चहाःता हाँयग राजा इया इदा।

²⁴ हाँय हँकुःआ सेवकियाकू अते आभा गोः लगाय बुँहड़ीतेरा। मी होड़ सेवकिया होड़ आँयग मालिक अते दस हजार बोरा सोनाराः रीने गोःतेरा।

²⁵ मनदो नाँयग सेवकिया होड़ एचेरे कहिसाः एमे कुदाय लगा मेर दोहोगान। दो मालिकतेन हुकुमतेड, नाँयग होड़ अरू नाँयरीग अइमी अरू नाँयरिकुःआ लइंकू अरू नाँयराः जे हों सकालाः इदा हना जमा अकिरिंगकेडखन ईंग अते रीने गोःकेरा हनापे एमे कुदागोड, माःआन।

²⁶ दो हाँयग सेवकिया होड़ मालिकराः नाःआ कता अयूमकेडखने उकड़ोमनेना अरू गोड़न-पइयनकेडखने कतातेड, ने मालिक, सहावगेमे। जनामायिंग एमे कुदागोडवामता।

²⁷ दो मालिक सेवकियातेन सोगावातिडिगखने अड़ाःगोतेडीग अरू हाँयराः रीन होंय अड़ाःगोतेड।

²⁸ हनते हाँयग सेवकिया हना ओड़ाः अतेय उडुंगनेन दो हाँय अनँयगरीग संग सेवकिया सुदाय जुमावनेना। आँयग संग सेवकिया हाँय अते मी सव चाँदी रिचकीराः रीने गोःतेरा। दो हाँयग सेवकिया होड़ अनँयगरीग संग सेवकियाराः होटोःतोय होड़रेगतेरा अरूय कतावातिरिया, आम ईंग अतेम गोःतेरा हना रीन एमे कुदावायिंगमे।

²⁹ दो आँयग संग सेवकिया उकड़ोमनेना अरू गोड़न-पइयनकेडखने असेया, सहावगेमे। जनामायिंग एमे कुदागोडवामता।

³⁰ मनदो हाँय आँयग संग सेवकिया मेरेय सोगावागडिग। हाँय सेनेडखन आँयग संग सेवकिया हाँयराः जमा रीन अरीने एमे कुदाय वरी जेहेलरेय एचे सींगगोतेडीग।

³¹ एटाः सेवकियाकू हंडा होयानेना हना जमाकूनकू ञेलतेरा दो, हँकूराः जीव मुरुक हुडिंगनेना। हनते हँकू सेनेडखन मालिककूतेन एचेरे हंडा चिनचिला होयानेना हना जमाकूनकू कता उदुःवातेरिया।

³² हनते मालिक हाँयग सेवकिया होड़ राःतेडखने कताया, ने बेलूर सेवकिया। आम ईंग एचेरेम असेकेड अते आमराः जमा रीनिंग अड़ाःगोतेडा अरू आमिंग सोगावारा।

³³ हनन इया आम हों आमरीग संग सेवकिया सुदा चिला लगा मेरेम एचेगाड?

³⁴ हनते हाँयग मालिक मुरुक रीसनेनखन हाँयग सेवकिया होड़ जमा रीन अरीने एमे कुदाय वरी जेहेलरेय संतावगे लगाय जिमागोतेडीग।

³⁵ अपे अपेरिकुःआ बिसवासी वपक-बोपोहकूराः कसूर अपेराः ओंगोल अते अरीनपे बराव एंडागे वरी सेरमो देसरीग ईंगरीग अपांग भगवान हों अपे सुदा हनन इयाय एचेयता।”